Հյուսիսի և հարավի բախումը. Ի՞նչ կազմով կժամանեն վիկինգները Երևան

Իսլանդիայի ազգային հավաքականի մարզիչ Արնար Տոր Վիդարսոնը, ով վերջերս է գլխավորել ազգային ընտրանին, հրապարակել է թիմի հայտացուցակն ԱԱ-2022 ընտրական փուլի առաջիկա խաղերի համար։ Իսլանդիան մարտի 25-ին ուժերը կչափի Գերմանիայի, մարտի 28-ին Հայաստանի և մարտի 31-ին Լիխտենշտեյնի հետ, որոնք բոլորը ընդգրկված են 2022 թվականի Աշխարհի առաջնության ընտրական փուլի միևնույն խմբում։

Սրանք առաջին խաղերն են Արնար Տորի գլխավորությամբ, և միևնույն ժամանակ, Գերմանիայի դեմ խաղը կլինի Իսլանդիայի հավաքականի պաշտոնական 500-րդ հանդիպումը բոլոր մրցաշարերում:

Առաջին պաշտոնական հանդիպումը Իսլանդիան անցկացրել է 1930 թվականին՝ մրցելով Ֆարերյան կղզիների դեմ (0-1)։ Ամենամեծ հաշվով հաղթանակը նշել է 1985 թվականի հուլիսի 10-ին ինը գնդակի առավելությամբ հաղթել է Ֆարերներին։ 1967 թվականի օգոստոսի 23-ին Իսլանդիան տարավ իր ամենածանր պարտությունը Դանիայի կողմից (14-2)։

Իսկ հավաքականի ամենամեծ հաջողությունը կարելի է համարել Եվրո-2016-ում ունեցած ելույթները։ Իրենց պատմության մեջ առաջին խոշոր մրցաշարում նրանք պարզապես հիանալի հանդես եկան՝ դուրս գալով մրցաշարի 1/4 եզրափակիչ, և ամբողջ աշխարհի ապացուցեցին, որ Իսլանդիայի նման փոքրիկ բնակչություն ունեցող երկրում (մոտ 370 հազար բնակչություն) ևս ֆուտբոլ խաղալ գիտեն։ Իսկ 2018թ նրանք մասնակցեցին Ռուսաստանում կայացած Աշխարհի առաջնությանը, սակայն այնտեղ չկարողացան հաղթահարել խմբային փուլի արգելքը։

Հայաստանի հավաքականի հետ կղզիաբնակները կհանդիպեն մարտի 28-ին՝ Երևանում։ Մինչ այժմ երկու թիմերը հանդիպել են 3 անգամ և առավելությունն Իսլանդիայի կողմն է՝ 2 հաղթանակ և մեկ ոչ-ոքի։

1998թ․ Հայաստան-Իսլանդիա 0։0 (ԵԱ ընտրական խումբ)
1999թ․ Իսլանդիա-Հայաստան 2։0 (ԵԱ ընտրական խումբ)
2008թ․ Հայաստան-Իսլանդիա 0։2 (Ընկերական հանդիպում)

Առաջիկա հանդիպումները վնասվածքի պատճառով բաց կթողնի «Աուգսբուրգի» հարձակվող Ալֆրեդ Ֆինբոգասոնը, որը թերևս միակ լուրջ կորուստն է հավաքականի համար։ Ընդհանուր առմամբ բոլոր առաջատարները պատրաստ են առաջիկա հանդիպումներին։

Իսլանդիայի հավաքականը համարվում է եվրոպական ֆուտբոլի «ամուր ընկույզներից» մեկը, որի կազմում հանդես են գալիս նաև թոփ-լիգաների ներկայացուցիչներ։ Գիլֆի Սիգուրդսոնը «Էվերտոնից» և Յոհան Գուդմունդսոնը «Բարնլիից» համարվում են թիմի գլխավոր աստղերը, սակայն բացի նրանցից կան ևս մի քանի ֆուտբոլային աշխարհին հայտնի ֆուտբոլիստներ․ Ինգասոնը՝ ՊԱՕԿ-ից, Բյարնասոնը՝ «Բրեշիայից» և Ալբերտ Գուդմունդսոնը՝ «Ալկմարից»։ Իսկ թիմի ավագ Արոն Գունարսոնն այժմ հանդես է գալիս Քաթարը ներկայացնող «Ալ Արաբիում»։

Քիչ չեն նաև վետերաններն ազգային հավաքականում։ 36-ամյա դարպասապահ Հաննես Հալդորսոնը հանդես է գալիս հայրենի «Վալյուրում», նույն թիմում է հանդես գալիս նրա հասակակից Բիկիր Սաևարսոնը, 38-ամյա Կարի Արնասոնը ևս իր փորձն է փոխանցում «Վիկինգուրի» երիտասարդ ֆուտբոլիստներին։

Թիմի հայտացուցակն առաջիկա խաղերի համար

Դարպասապահներ

Հաննես Հալդորսոն |«Վալյուր» | 74 խաղ

Օգմունդուր Կրիստինսոն | «Օլիմպիակոս» | 17 խաղ

Ռունար Ռունարսոն | «Արսենալ»․ Լոնդոն| 7 խաղ

Պաշտպաններ

Բիրկիր Սաևարսոն| «Վալյուր» | 95 խաղ, 2 գոլ

Գուլագոր Պալսոն | «Դարմշտադ» | 23 խաղ

Սվերիր Ինգասոն | ՊԱՕԿ | 36 խաղ, 3 գոլ

Ռագնար Սիգուրդսոն| «Ռուխ» Լվով | 97 խաղ, 5 գոլ

Ալֆոնս Սամպստեդ | «Բոդո Գլիմտ»| 2 խաղ

Արի Սկուլասոն | «Օստենդե» | 77 խաղ

Կարի Արնասոն | «Վիկինգուր» | 87 խաղ, 6 գոլ

Հորդուր Մագնուսոն| ԲԿՄԱ Մոսկվա | 34 խաղ, 2 գոլ

Հոլմար Էյոլֆսոն |«Ռոսենբորգ» | 19 խաղ, 2 գոլ

Հյորտուր Հերմանսոն| «Բրոնդբյու» | 18 խաղ, 1 գոլ

Կիսապաշտպաններ

Արոոն Գունարսոն|«Էլ Արաբի»| 91 խաղ, 2 գոլ

Բիրկիր Բյարնասոն | «Բրեշիա»| 92 խաղ, 13 գոլ

Ռունար Սիգուրյոնսոն| «Կլուժ»| 30 խաղ, 1 գոլ

Արնոր Տրաուտասոն | «Նյու Ինգլանդ Ռեվոլույշն» | 37 խաղ, 5 գոլ

Գիլֆի Սիգուրդսոն | «Էվերտոն»| 78 խաղ, 25 գոլ

Յոհան Գուդմունդսոն | «Բարնլի» | 77 խաղ, 8 գոլ

Արնոր Սիգուրդսոն | ԲԿՄԱ Մոսկվա | 11 գոլ, 1 գոլ

Յոն Բովարսոն | «Միլոուլ»| 55 խաղ, 3 գոլ

Հարձակվողներ

Քոլբեյն Սիգուրդսոն| «Գյոտեմբորգ»| 60 խաղ, 26 գոլ

Ալբերտ Գուդմունդսոն | «Ալկմար» | 18 խաղ, 3 գոլ

Հոլմբերտ Ֆրիսոնյոնսոն| «Բրեշիա» | 4 խաղ, 2 գոլ

Բյորն Սիգուրդարսոն | «Մյոլդե» | 17 խաղ, 1 գոլ

FIFA-ի դասակարգման աղյուսակում Իսլանդիայի հավաքականը զբաղեցնում է 46-րդ հորիզոնականը, Հայաստանի հավաքականը՝ 99-րդ։

Վար Բաբայան

Շարքի նախորդ մասերը

Արդեն հարազատ դարձած մրցակիցը․ Լիխտեյնշտեյն