1981-ին Յուիչի Տակահաշին նկարեց «Կապիտան Ցուբասա» սեւ-սպիտակ մանգայի առաջին դրվագը: Սյուժեն պարզ էր. ճապոնացի ֆուտբոլիստ Ցուբասան ձգտում է դառնալ լավագույն ֆուտբոլիստ, մեկնում է Բրազիլիա փորձ ձեռք բերելու, հաղթում է Ճապոնիայի հետ աշխարհի երիտասարդական առաջնությունում և տեղափոխվում Կատալոնիա (այսինքն ՝ «Բարսելոնա»)։ Հատկանշական է, որ մուլտֆիլմի ամենամեծ երկրպագուներից մեկը՝ Անդրես Ինյեստան մի քանի տարի առաջ հակառակ ուղղությամբ է շարժվել:
Կարճ ժամանակահատվածում մանգայի հիման վրա նկարահանված անիմե սերիալը մեծ համբավ ձեռք բերեց ոչ միայն Ճապոնիայում, այլ նաև ամբողջ աշխարհում՝ դառնալով թերևս ամենահաջողված մուլֆիլմներից մեկը սպորտային թեմատիկայով։
Ցուբասան՝ թալիսման ֆուտբոլիստների համար
1998 թվականից ի վեր Ճապոնիան մասնակցել է աշխարհի բոլոր առաջնություններում: Առաջին մրցաշարերում թիմը բաղկացած էր խաղացողներից, ովքեր մեծացել էին մուլտֆիլմի վրա 80-ականներին: Ցուբասան խաղում է տասը համարով: Ճապոնիայում համոզված են, որ հենց այդ պատճառով էլ այդ համարը շատ պահանջված էր. բոլոր ճապոնացի երեխաները երազում էին խաղալ կուռքի դիրքում։ Եվ արդյունքում՝ երկիրը լի էր հարձակվողական ոճի կիսապաշտպաններով (Նակատայի օրինակը միայն ուժեղացնում էր ազդեցությունը), բայց պաշտպաններ ու հարձակվողներ գրեթե չկային:
Ցուբասայի ազդեցությունը չի սահմանափակվում միայն տղամարդկանց ֆուտբոլով: 2011 թվականին Ժապոնիայի կանանց հավաքականը մեկնել էր Գերմանիա՝ մասնակցելու Աշխարհի Գավաթի խաղարկությանը: Ֆուտբոլիստներին աջակցելու համար Տակահաշին ստեղծեց նոր կերպար՝ ֆուտբոլիստ Կաեդան: Նախատիպը ազգային թիմի ավագ Սավա Հոմարեն էր, ով հավաստիացրեց, որ խաղացողները դիտում էին սերիալը՝ նախապատրաստվելով մրցաշարին: Այդ ժամանակ Ճապոնիան սենսացիոն կերպով դարձավ աշխարհի չեմպիոն, և Հոմարեն ստացավ մրցաշարի ամենաարժեքավոր խաղացողի մրցանակը:
Ինյեստան, Տորեսը և Ցուբասան
Ինչպես խոստովանել է «Բարսելոնայի» լեգենդ Անդրեաս Ինյեստան՝ նա ճապոնական «Վիսել Կոբե» տեղափոխվեց Ցուբասայի հանդեպ մեծ սիրո պատճառով: Իսպանացուն պարբերաբար տեսել են կրծքավանդակի վրա T և N տառերով շապիկներ, որոնք ոճավորված են «Tohu» և «Nankatsu» դպրոցական թիմերի տարբերանշաններով: Նույնիսկ Իսպանիան ընդդեմ Իտալիայի հայտնի կադրերը, որտեղ Ինյեստան շրջապատված է հինգ իտալացիներով, ունի նախատիպ Ցուբասայից: 2018-ի մայիսին Անդրեասը հանդիպեց Տակահաշիի հետ, և նկարիչը նրան նվիրեց իր մի քանի դիմանկարներ՝ արված Ցուբասայի ոճով:
2018-ին Ֆերնանդո Տորեսը նույնպես տեղափոխվեց Ճապոնիա, բայց այլ թիմ ՝ «Սագան Տոսու»: Իսպանացին նաև պատմել է, թե ինչպես է «Կապիտան Ցուբասան» ազդել ֆուտբոլի նկատմամբ իր սիրո վրա.
Հատկանշական է, որ գերմանացի հանրահայտ ֆուտբոլիստ Լուկաշ Պոդոլսին, ով Ինյեստայի թիմակիցն էր ճապոնական ակումբում, նշել է, որ ևս տեղափոխվել է Ծագող արևի երկիր հենց այդ անիմեի նկատմամբ մեծ սիրուց ելնելով։ Նա նաև իր առաջին հանդիպումը նոր ակումբի կազմում անցկացրել է անիմեի մոտիվներով պատրաստված խաղակոշիկներով։ Ի դեպ, «Բարսելոնայի» մեկ այլ լեգենդ՝ Չավին, ինչպես նաև կոլումբիացի աստղ Խամես Ռոսրիգեսը, ևս այս ֆուտբոլային անիմեի սիրահարներից են։
2019թ Ինյեստան մասնակցեց Տոկիոյի մետրոյի նոր կայարանի բացմանը, որը ձևավորված էր «Կապիտան Ցուբասան» անիմեի մոտիվներով։ Անդրեսի ձայնը առաջիկա տարիներին նաև կհնչի մետրոյի այդ կայարանում՝ կատալոներեն ուղերձների տեսքով։
Իր հերթին «Կապիտան Ցուբասա» մուլտֆիլմի հեղինակը, ճապոնացի հայտնի նկարիչ Յուիչի Տակահաշին անիմե ոճով պատկերել է «Բարսելոնայի» առաջատարներին: Նկարում պատկերված են պաշտպան Ժերար Պիկեն, կիսապաշտպան Անդրես Ինյեստան, ինչպես նաև հարձակվողներ Լիոնել Մեսսին, Նեյմարը և Լուիս Սուարեսը: Նշենք, որ Տակահաշին իր ստեղծագործությունը ներկայացրեց Տոկիոյում «Բարսայի» կողմից կազմակերպված ընդունելությանը: Հայտնի է նաև, որ նկարիչը կատալոնական ակումբի մեծ երկրպագու է ՝ օգնելով ավելի ճանաչելի դարձնել ակումբը Ճապոնիայում:
Հանրահայտ ֆուտբոլիստները մեծ հաճույքով գնում են մուլտֆիլմի հերոսի հայրենիք, մուլտֆիլմ՝ որը շատ են սիրել մանկության տարիներին: Ի վերջո, J-League-ի (Ճապոնիայի առաջնություն) ստեղծողները նույնպես ոգեշնչված էին «Կապիտան Ցուբասայից», նախքան նրանք որոշեցին հիմնել առաջին պրոֆեսիոնալ ֆուտբոլային լիգան երկրում․․․
Վար Բաբայան
Փետրվարի 13, 2021 թ․
