Դրամատիկ սերիալի ավարտը․ Բրազիլիայի առաջնության ամփոփում

Ավարտվեց Բրազիլիայի Ա Սերիայի 2020թ մրցաշրջանը։ Այո, հենց 2020 մրցաշրջանը, քանի որ հայտնի պատճառներով այն հետաձգվել էր դեռ անցած տարվա կեսերից և մրցաշրջանի վերջին սուլիչը լսվեց միայն նախորդ շաբաթ։

Ինչպես բրազիլական սերիալների մեծամասնությունը, ֆուտբոլային մրցաշրջանը ևս դրամատիկ ստացվեց։ Դրամատիկ էր ոչ միայն վերջին տուրը, այլ ընդհանրապես, մրցաշրջանի արդյունքները որոշ ակումբների համար։ Տեղավորվեք, հիմա մանրամասն կբացատրեմ, թե ինչ սյուժե ունի այսօրվա մեր սերիալը․․․

🎬 Ֆլամենգոն՝ կրկին չեմպիոն

Եթե նախորդ մրցաշրջանում «Ֆլամենգոն» բացահայտ առավելություն ուներ մրցակիցների նկատմամբ և վստահորեն ձևակերպեց չեմպիոնությունը դեռ մրցաշարի ավարտից մի քանի տուր առաջ, այս անգամ Ռոժեյրո Սենիի թիմի բախտը պարզապես բերեց․ նրանց չեմպիոնությունը ապահովեց հենց հիմնական մրցակիցը։ Բրազիլիայի առաջնության վերջին տուրում «Ինտերնասիոնալը» չկարողացավ հաղթել «Կորինտիանսին» (0: 0) ՝ որպեսզի առաջ անցնի «Ֆլամենգոյից», որն իր հերթին զիջել էր «Սան Պաուլոյին» (1: 2):

Այսպիսով, «Ֆլամենգոն», չնայած վճռական տուրում կրած պարտությանը, երկրորդ անգամ անընդմեջ նվաճեց Բրազիլիայի Ա Սերիայի ոսկե մեդալները։ Ռիո դե Ժանեյրոն ներկայացնող ակումբը 8-րդ անգամ իր պատմութան մեջ դարձավ Բրազիլիայի չեմպիոն։ Այդ ցուցանիշով «Ֆլամենգոն» հավասարվեց «Սանթոսին», և երկու ակումբները չեմպիոնական տիտղոսի քանակով զիջում են միայն «Պալմեյրասին», որը 9 անգամ դարձել է Բրազիլիայի չեմպիոն։

Այս մրցաշրջանում «Ֆլամենգոյի» չեմպիոնական կազմն այսպիսին էր․

Թիմի լավագույն ռմբարկուն Գաբիգոլն (Գաբրիել Բարբոսա) էր՝ 14 գոլով

🇧🇷 Մրցաշարային աղյուսակ

Նշենք, որ 1-4-րդ տեղերը զբաղեցրած թիմերը ստանում են Հարավային Ամերիկայի ակումբային գլխավոր մրցաշարին՝ Լիբերտադորեսի գավաթին մասնակցելու իրավունք, 5-6-րդ տեղեր զբաղեցրած թիմերը կմասնակցեն այդ մրցաշարի որակավորման փուլին։ Իսկ ահա 7-12-րդ տեղերը զբաղեցնող թիմերը իրավունք են ստանում մասնակցելու կարևորությամբ երկրորդ մայրցամաքային մրցաշարին՝ Սուդամերկանային։ Վերջին 4 թիմերը լքում են մրցաշարը։

🎬 Անակընկալները

Սկսենք վերջից․ 4 թիմերը լքում են մրցաշարը, այդ թվում՝ «Բոտաֆոգոն»։ Մրցաշրջանի սկզբում Ռիոն ներկայցնող ակումբը առաջնության գլխավոր նյուզմեյքերն էր։ Կեյսուկե Հոնդա, Սոլոմոն Կալու, բազմաթիվ խոսակցություններ նաև այլ ֆուտբոլիստների տեղափոխությունների մասին (օրինակ՝ Յայա Տուրեն, ով արդյունքում ավարտեց ֆուտբոլիստի կարիերան և անցավ մարզչական գործունեության Ուկրաինայում)։ Ակումբը բավականին ագրեսիվ մարքեթինգային գործունեություն ծավալեց, բայց․․․ արդյունքում՝ վաստակած 27 միավոր և վերջին հորիզոնական, իսկ Հոնդան՝ մրցաշրջանը դեռ չավարտված, կրկին փոխեց ակումբային գրանցումն ու գնաց նվաճելու Պորտուգալիայի առաջնությունը․․․ good bye, «Բոտաֆոգո», հուսով եմ կրկին կհանդիպենք Ա Սերիայում՝ կարճ ժամանակ անց։

Եվս մեկ անակնկալ, անձամբ ինձ համար, դա «ՌԲ Բրագանտինոն» է։ Արդեն երևի հասկացաք, թե որ հոլդինգին է պատկանում այս թիմը։ Այո՛-այո՛, «Ռեդ Բուլլին», որին պատկանում են նաև «ՌԲ Լայպցիգը», «ՌԲ Զալցբուրգը» և «ՌԲ Նյու Յորքը» (ավելի վաղ անդրադարձել ենք հոլդինգի սպորտային գործունեությանը. մանրամասները՝ այստեղ): Թիմը, որի համար այս մրցաշրջանն առաջինն էր Ա Սերիայում, ոչ այդքան հաջող էր մեկնարկել 2020 մրցաշրջանում, և անձամբ ես թերհավատորեն էի վերաբվերում այս թիմի հաջողություններին և կարծում էի, որ Մաուրիսիո Բարբիերիի սաները մաքսիմում կարող են պայքարել իրենց տեղն առաջնությունում պահպանելու համար։ Սակայն թիմը ոչ միայն պահպանեց իր տեղը առաջնությունում, այլ նաև հաջորդ մրցաշրջանում հանդես կգա Սուդամերիկանայի մրցաշարին։ Թիմը կազմված է ինչպես փորձառու, այնպես էլ տաղանդավոր երիտասարդ ֆուտբոլիստներից, որոնցից ամենահեռանկարայինն ըստ իս, դա հարձակվողական ոճի կիսապաշտպան, թիմի ավագ Կլաուդինյոն է․ 24 ամյա ֆուտբոլիստը առաջնության գլխավոր երկու ռմբարկուներից մեկն է, բայց այդ մասին քիչ հետո կխոսենք։

Հետաքրքիր ևս մեկ փաստ․ երկար տարիների ընթացքում առաջին անգամ «Սան Պաուլոյի» պաշտպան և աշխարհի ամենատիտղոսակիր ֆուտբոլիստներից մեկը՝ Դանի Ալվեշը, մրցաշրջանն ավարտեց առանց որևէ տիտղոսի։ Նրա թիմը ոչ մի մրցաշարում այդպես էլ հաջողության չհասավ։

🎬 Սպասված վերադարձ

2016-ին բրազիլական «Չապեկոենսեն» ավիավթարի էր ենթարկվել, երբ մեկնում էր Սուդամերիկանա գավաթի եզրափակչին մասնակցելու համար: Միայն երեք խաղացող ողջ մնաց ամբողջ թիմից, իսկ կարիերան շարունակեց միայն պաշտպան Ալան Ռուշելը: 2019-ին նա ակումբի հետ դուրս մնաց բրազիլական ֆուտբոլային էլիտայից, և թիմը շարունակեց հանդես գալ Բրազիլիայի Սերիա Բ-ում: Անցավ ավելի քան մեկ տարի (մրցաշրջանը մի փոքր ավելի երկար տևեց կորոնավիրուսի պատճառով), և «Չապեկոենսեն» դարձավ առաջին դիվիզիոնի չեմպիոն (Բ Սերիա) և վերադարձավ Ա Սերիա:

Հաղթանակի ճակատագիրը որոշվեց վերջին տուրի վերջին րոպեներին: Նույն քանակի միավորներով «Չապեկոենսեն» ու «Ամերիկա Մինեյրոն» կիսում էին առաջին տեղը: Հաղթանակների, ոչ-ոքիների, պարտությունների քանակը (19-13-5) և նույնիսկ գոլի տարբերությունը (+20) համընկնում էին: Վերջին տուրում երկու թիմերն էլ հաղթում էին իրենց մրցակիցներին միաժամանակ մեկ գնդակի առավելությամբ, բայց 98-րդ րոպեին «Չապեկոենսեն» տուգանային վաստակեց «Կոֆիդենցայի» դեմ խաղում: Հարձակվող Անսելմո Ռամոնը մոտեցավ գնդակին և պանենկայով հաղթեց դարպասապահին: Չեմպիոնություն ստանալու ամենաարդյունավետ միջոցը․․․․«Չապեկոենսեն» ստացավ գավաթը, և թիմի ավագն առաջինը բարձրացրեց այն գլխավերևում: Նույն Ալան Ռուշելը՝ կենդանի մնացած երեք ֆուտբոլիստներից մեկը:

Այսպիսով, Ա Սերիա են վերադառնում «Չապեկոենսեն», «Ժուվենտուդը», «Կուիյաբան» և «Ամերիկա Մինեյրոն»։

🎬 Լավագույնները

Ես խոստացել էի, որ դեռ կանդրադառնանք Կլաուդինյոյին։ Բրազիլացի ֆուտբոլիստը, հավանաբար այս մրցաշրջանի գլխավոր բացահայտումն էր Ա Սերիայում։ «Կորինտիանսի» սանը «ՌԲ Բրագանտինո» է տեղափոխվել 2019թ և կարճ ժամանակահատվածում դարձել է թիմի գլխավոր աստղը։ Նա 18 գոլով դարձավ ավարտված մրցաշրջանի գլխավոր ռմբարկուներից մեկը․ նույնքան գոլ է խփել է նաև «Սան Պաուլոյի» 27-ամյա հարձակվող Լուսիանոն։ Երկու լավագույն ռմբարկուներին հաջորդում են Տյագու Գալյարդոն («Ինտերնասիոնալ») և Մարինյոն («Սանթոս»)՝ 17-ական գոլով։ Կլաուդինյոյի ծառայություններով արդեն իսկ հետաքրքրված են Եվրոպայում, մասնավորապես, նշվում է «Այաքս» տեղափոխվելու տարբերակը, բայց չի բացառվում նաև «Ռեդ Բուլլի» ակումբերից մեկը տեղափոխվելը, վերջ ի վերջո, սեփական կադրն է, չէ՞։

Ինչ վերաբերվում է լավագույն դիսպետչերին, ապա այս մրցաշրջանում բոլորից շատ թիմակիցներին գոլի հեղինակ դառնալուն աջակցել են երեք ֆուտբոլիստներ՝ Կենոն («Ա․ Մինեյրո»), Վինյան («Սեարա») և ուրուգվայցի Դե Արասկաետան («Ֆլամենգո»), ովքեր դարձել են 9-ական գոլային փոխանցման հեղինակ։

Իսկ մրցաշրջանի լավագույն մարզիչ է ճանաչվել «Ֆլամենգոյի» գլխավոր մարզիչ, բրազիլական ֆուտբոլի լեգենդար ռմբարկու-դարպասապահ Ռոժեյրո Սենին։

«Վասկու դա Գամայի» հարձակվող Մարտին Բենիտեսը ստացել է Բրազիլիայի Ա Սերիայի 2020թ մրցաշրջանի լավագույն գոլի մրցանակը: Նրա մկրատաձև հարվածը «Ատլետիկ Մինեյրոյի» դարպասը  ճանաչվել է մրցաշրջանի ամենագեղեցիկ գոլը:

 

Վար Բաբայան