Վերջերս տեղեկություն հայտնվեց, որ «Ուֆան» բանակցություններ է վարում ավստրիական Red Bull-ի և City Football Group ֆուտբոլային հոլդինգի հետ, որին պատկանում է նաև «Մանչեսթեր Սիթին»․ երկու մեծ կազմակերպությունները ցանկանում են ձեռք բերել ռուսական ակումբը։
Իսկ ի՞նչ են իրենցից ներկայացնում այդ երկու միջազգային հոլդինգները և ինչպե՞ս են առնչվում ֆուտբոլային աշխարհի հետ․․․
⚽ City Football Group
CFG-ն հոլդինգային ընկերություն է, որը մաս է կազմում Abu Dhabi United Group-ին (ADUG) և վերահսկում է ADUG-ին պատկանող ֆուտբոլային ակումբները: CFG-ի բաժնետոմսերի 78%-ը պատկանում է ADUG-ին, 12%-ը պատկանում է չինական China Media Capital և CITIC Capital ընկերություններին: 2019-ի աշնանը բաժնետոմսերի 10%-ը գնվել է ամերիկյան Silver Lake ընկերության կողմից, որն աշխարհում տեխնոլոգիայի ոլորտում խոշորագույն ներդրողներից մեկն է, և որի գլխամասային գրասենյակը գտնվում է Սիլիկոնային հովտում: Ինչպես հաղորդում է City Football Group-ի պաշտոնական կայքը, այս գործարքների շնորհիվ հոլդինգի արժեքը բարձրացել է մինչև 4,8 միլիարդ դոլար:
Ինչ վերաբերում է գործունեության տեսակներին, ապա CFG-ն զբաղվում է ֆուտբոլային բիզնեսում ներդրումներ կատարելով, աշխարհի տարբեր երկրներում ակադեմիաների ցանցերի ընդլայնմամբ, մարքեթինգով, կառավարմամբ և այլն:
Այսպես թե այնպես, CFG-ն ասոցացվում է ամբողջ աշխարհի գրեթե տասնյակ ակումբների հետ: Դրանք են՝ «Մանչեսթեր Սիթի» (Անգլիա), «Նյու Յորք Սիթի» (ԱՄՆ), «Մելբուրն Սիթի» (Ավստրալիա), «Մոնտեվիդեո Սիթի Տորկե» (Ուրուգվայ), «Մումբայ Սիթի» (Հնդկաստան), «Լոմել» (Բելգիա) ), «Ժիրոնա» (Իսպանիա), «Սիչուան» (Չինաստան) և «Յոկոհամա Մարինոս» (Ճապոնիա): Այնուամենայնիվ, միայն առաջին երեք ակումբներն են հոլդինգում պաշտոնապես հայտարարվում իրենցը, ինչը նույնիսկ արտացոլվում է պաշտոնական կայքում: Մնացածը ներկայացվում է «այլ ներդրումներ» սյունակի ներքո: Այդ մասին նշում է bobsoccer-ը։
«Նյու Յորք Սիթիում» հանդես է գալիս «Ալաշկերտի» նախկին հարձակովող Հեբերը
Եվ իրոք, թե ինչ ծավալի ներդրումներ են կատարվում անգիական գրանդում, մենք արդեն մի քանի տարի է՝ ականատես ենք լինում։ Արաբական հոլդինգը կարողացավ մի քանի տարվա ընթացքում «Մանչեսթեր Սիթին» դարձնել համաշխարհային ֆուտբոլի գրանդներից մեկը։ «Նյու Յորք Սիթին» և «Մելբուրն Սիթին» ևս ուժեղագույն և կայուն ակումբներից են իրենց առաջնություններում։
Մյուս ակումբներում, ըստ երևույթին, CFG-ն հանդիսանում է որպես բաժնետեր, այլ ոչ սեփականատեր։ Կարելի է առանձնացնել «Ժիրոնան», որը ոչ վաղ անցյալում հանդես էր գալիս Լա Լիգայում, իսկ այժմ հանդես է գալիս Սեգունդայում և պայքարում է կրկին իսպանական ֆուտբոլային էլիտա վերադառնալու համար։ Հնդկական «Մումբայ Սիթին» հանդես է գալիս Հնդկաստանի Սուպերլիգայում, այնտեղ ժամանակին հանդես են եկել Նիկոլա Անելկան և Դիեգո Ֆորլանը։ Սակայն ակումբը նշանակալի հաջողությունների, կարելի է ասել, չի հասել։ Բայց Հնդկասատանի խոշորագույն քաղաքը ներկայացնող ակումբը հանդիսանում է հնդկական լիգայի ամենակայուն թիմերից մեկը։
Ինչ վերաբերվում է ճապոնական «Յոկոհամա Մարինոսին», ապա այն երկրի գործող չեմպիոնն է և համարվում է Ճապոնիայի ուժեղագույն ակումբներից մեկը։
«Մանչեսթեր Սիթիի» սեփականատերերը վերջերս ձեռք են բերել իրենց իններորդ ակումբը։ Խոսքը բելգիական «Լոմմել» ակումբը գնելու մասին է: Նշվում է, որ City Football Group-ը մարելու է ակումբի պարտքերը՝ 1,75 միլիոն ֆունտի չափով: Մինչ Բելգիայում կորոնավիրուսի պատճառով մրցաշրջանի ընդհատվելը , «Լոմմելը» զբաղեցնում էր վեցերորդ տեղը Ազգային առաջնության երկրորդ դիվիզիոնի մրցաշարային աղյուսակում:
CFG-ն ցանկանում է ձեռք բերել նաև ֆրանսիական «Նանսի» ակումբը։ Ֆրանսիական ակումբի նախագահ Ժակ Ռուսելը պատմել է, թե ինչպես է ընթանում ակումբը City Football Group հոլդինգին վաճառելու գործընթացը.
«Ես անհանգստացած եմ, քանի որ գործարքը նախատեսված էր մարտի 31-ին, բայց կարանտինի պատճառով բանակցությունները դադարեցվել են մարտի 16-ից: Այնուամենայնիվ, սա չի նշանակում, որ դրանք դադարեցված են: Ես ստիպված կլինեմ ռեսուրսներ որոնել ակումբի գործունեության համար»: City Football Group-ի ներկայացուցիչն ասել է, որ հոլդինգը մտադիր է ձեռք բերել «Նանսին». «Մենք դեռ ցանկանում ենք գնել «Նանսին»: Մեզ սպասում է համաշխարհային ճգնաժամ, բայց մեր ծրագրերը չեն փոխվել»:
Ըստ Lequipe-ի՝ գործարքը գնահատվում է 14 միլիոն եվրո:
🐂 Red Bull
Ավստրիական հոլդինգը, որն ամբողջ աշխարհում հայտնի է որպես էներգետիկ ըմպելիքներ արտադրող ընկերություն, ֆուտբոլային աշխարհում ևս բավականին ակտիվ է։ Ներկա դրությամբ հոլդինգին են պատկանում 5 ֆուտբոլային ակումբներ։
«ՌԲ Զալցբուրգը» վերջին տարիներին ավստրիական ֆուտբոլի դոմինանտն է, որը բավականին հաջող է հանդես գալիս նաև միջազգային ասպարեզում, իսկ «ՌԲ Լայպցիգը» ուժեղագույններից մեկն է Գերմանիայում։ Բավականին հաջող է հանդես գալիս MLS-ում նաև «ՌԲ Նյու Յորքը»․ հետաքրքիր է հետևել հատկապես Նյու Յորքի դերբիին՝ «ՌԲ Նյու Յորք»- «Նյու Յորք Սիթի»։
Եվս երկու թիմ Red Bull-ն ունի Բրազիլիայում՝ «ՌԲ Կամպինաս» և «ՌԲ Բրագանսա», որոնք սակայն առանձնապես այդքան էլ հայտնի չեն։
Ի տարբերություն արաբական հոլդինգի՝ ավստրիական ընկերությունը ակտիվ է ոչ միայն ֆուտբոլում, այլ ընդհանրապես սպորտում։ Բացի մի քանի ֆուտբոլային ակումբներից, «կարմիր ցուլերի» հոլդինգը ներառում է նաև այլ մարզական ակումբներ։ Ֆորմուլա 1-ում Red Bull-ն ունի միանգամից երկու թիմ` Red Bull Racing ևScuderia Toro Rosso։ Դրանցից առաջինը բավականին հաջող է ելույթ ունենում ամենահեղինակավոր ավտոմրցաշարում և ուժեղագույններից մեկն է Ֆորմուլա-1-ում։
Red Bull-ն ունի նաև հոկեյի երկու ակումբ՝ «ՌԲ Զալցբուրգ» և «ՌԲ Մյունխեն», ինչպես նաև թիմեր կիբերսպորտում և այլ մարզաձևերում։ Ավստրիական ընկերությունը հովանավորում է նաև բազմաթիվ մրցաշարեր։
🇷🇺 ՈւՖԱ
Նախորդ շաբաթ Match TV- ի մեկնաբան Ռոման Նագուչևն ասել է, որ «Ուֆան» կարող է դառնալ այն ակումբը, որի ներդրումներն իրականացվեն արտասահմանից:
«Իմ տեղեկություններով, «Ուֆան» կդառնա այդ ակումբը: Շամիլ Գազիզովն ունի ոչ միայն մեկ, այլև միանգամից երկու շատ լավ առաջարկ: Դրանցից մեկը City Football Group հոլդինգն է (CFG), որը գնել էր ռուսական ակումբից Ալեքսանդր Զինչենկոյին: Նրանց դուր եկավ ակումբի վերաբերմունքը ինչպես ֆուտբոլիստի, այնպես էլ «Ման Սիթիի» նկատմամբ: Երբ այդպիսի ակումբ է ձեզ առաջարկ անում, ուզում եք պահանջել առնվազն 10-ը՝ 4 միլիոն եվրոյի փոխարեն, բայց «Ուֆան» նույնիսկ չի փորձել մեկ լումա ավելացնել պայմանագրին: Չորս՝ ուրեմն չորս: Արևելքում դա գնահատվում է: Բացի այդ, Բաշկորտոստանը նավթային շրջան է, և դա շատ հնարավորություններ է տալիս փոխշահավետ համագործակցության համար:
Երկրորդ տարբերակը Red Bull-ն է: Եվ հետաքրքրական է, որ «Ուֆայի» գլխավոր տնօրենը միտված է այս տարբերակին: Նկատելիորեն առաջարկն ավելի համեստ է, բայց շատ ավելի հեռանկարային: RB-ն չի հրաժարվում իր մարզական նախագծերից: Բրազիլիայում, ԱՄՆ-ում, Ավստրիայում և Գերմանիայում, արդյունքն ակներև է: RB Ghana-ն բացառություն է, ակումբը անհետացավ 6 տարի առաջ: Բայց ես հավատում եմ, որ Ռուսաստանում բիզնես վարելը ավելի հեշտ է: «Ուֆայի» ղեկավարությունն արդեն մի քանի հանդիպումներ է անցկացրել: Շուտով ամեն ինչ կորոշվի», – գրել է Նագուչևը:
Ավելի վաղ արդեն հայտնել էինք, որ City Football Group հոլդինգը պատրաստվում է ձեռք բերել ռուսական ակումբներից մեկը: Առաջին հերթին ընկերությունը դիտարկում է ՌՊԼ- ի թիմերից մեկը:
Ռուսական «Ուֆա» ֆուտբոլային ակումբի Հոգաբարձուների խորհրդի նախագահ Ռոստիսլավ Մուրզագուլովը հաստատեց ակումբում օտարերկրյա ներդրումների մասին տեղեկատվությունը, բայց շեշտեց, որ խոսքը թիմի ամբողջական վաճառքի մասին չէ:
«Իրոք, «Ուֆան», լինելով Ռուսաստանի ամենաարդյունավետ մարզական ակումբներից մեկը, վաղուց հետաքրքրություն է առաջացրել Ռուսաստանի և միջազգային խոշոր ընկերությունների մոտ: Կարող ենք հաստատել, որ դրանց թվում կան և ավստրիական, և արաբական ընկերություններ: Միևնույն ժամանակ, մենք չենք խոսում ակումբի լիարժեք վաճառքի մասին, դա հանրապետության սեփականությունն է և Բաշկիրիայի բնակչության երկու երրորդի կողմից աջակցվող թիմ: Մենք ողջունում ենք, եթե նոր ներդրողը կարողանա ակումբին նոր զարգացում հաղորդել, և բանակցությունները շարունակվում են:
Մենք ունենք ֆինանսավորման հստակ աղբյուրներ, կան շահաբաժիններ, որոնք վճարում են որոշ ընկերություններ: Բայց եթե մենք ուզում ենք ունենալ նոր հորիզոններ, ապա ավելի լավ է դա անել անձնական փողերի հաշվին, այլ ոչ թե ավելացնել պետական աղբյուրներից ֆինանսավորումը՝ կրճատելով այլ կարևոր պետական ծրագրեր», – մեջբերում է Մուրզագուլովին Правда ПФО-ն:
Ըստ bobsoccer-ի, վերջին տարիներին Բաշկիրիան փորձում էր համագործակցել Ավստրիայի հետ և եվրոպական ներդրողներին հրավիրել տարածաշրջան: Անցած տարի Ուֆայում Ավստրիայի ներկայացուցչությունը բացվեց, և նույնիսկ հայտնվեց կանոնավոր թռիչք Ուֆայից Վիեննա: Աշնանը Բաշկիրիայի գործարարների մի մեծ պատվիրակություն Վիեննայում ավստրիական բիզնես-կոնֆերանսում ներկայացրեց տարածաշրջանի ներդրումային ներուժը:
Դե ինչ, հետաքրքիր կլինի համենայն դեպս հետևել, թե ինչպիսին կլինի նոր «Ուֆան»․․․
Վար Բաբայան
Շարքի նախորդ մասերը
Տրանսֆերային շուկան արդեն իսկ փոփոխվո՞ւմ է․ Իկարդիի տրանսֆերի հետքերով
Ֆլիկի մեքենան ընդդեմ խայթող մեղուների․ Ի՞նչ ակնկալել գերմանական կլասիկոյից
Չիրականացված հույսեր և փրկարարական օղակ․ Անավարտ մրցաշրջանի հետքերով
Ֆուտբոլային աշխարհն անմասն չի մնում կորոնավիրուսի դեմ պայքարից
Ի՞նչ է սպասվում մառախլապատ Ալբիոնում. Լիվերպուլը կզրկվի՞ չեմպիոնությունից
4 պատճառ, թե ինչո՞ւ արժե հետևել 4 Մայրցամաքների մրցաշարին
Հայաստանը՝ կիբերսպորտի քարտեզին․ Ե՞րբ չափելի կդառնա մեր կիբերսպորտի ֆինանսական հմայքը
