Հարձակվողական ոճի կիսապաշտպան Ստանիսլավ Եֆիմովը, որը վերջերս հեռացավ «Վանից», ասում է՝ պայմանագրի ժամկետի ավարտից հետո Չարենցավանի ակումբն այն չի երկարաձգել․
«Ակումբում փոխվել է մարզչական շտաբը, ղեկավար կազմը ու նրանք ակումբի զարգացման իրենց պատկերացումներն ունեն։ Ինձ ասացին, որ շեշտը դնելու են կազմի երիտասարդացման վրա»,- ArmSport-ի հետ զրույցում ասում է Եֆիմովը ու նշում, որ ակումբում նոր է միայն գլխավոր մարզիչը․ ղեկավար պաշտոններ են ստանձնել մարդիկ, ովքեր մինչ այս ակումբում այլ կարգավիճակում են եղել։
Եֆիմովն ասում է՝ Հայաստանից շատ ջերմ հիշողություններով է հեռանում․
«Հուսով եմ նորից կվերադառնամ, բայց այս փուլում կարծում եմ կարիերաս կշարունակեմ Ռուսաստանում։ Տարբերակներ կան, բայց քանի դեռ պայմանագիր չեմ կնքել, չեմ կարող կոնկրետ որևէ բան ասել»։
Եֆիմովի խոսքով, հայաստանյան կարիերայի հետ կապված շատ են անմոռանալի պահերը․
«Քիչ չեն եղել նման պահերը, բայց առաջատարն անկասկած «Փյունիկի» կազմում Եվրոպա լիգայի խաղերն են, հատկապես «Վուլվերհեմփթոնի» դեմ։ Չնայած կնշեի նաև Հայաստանի Առաջին խմբի առաջնությունում խփած 46 գոլերը։ Կարծում եմ՝ շատերը թերագնահատում են այդ արդյունքը»։
Հիշեցնենք՝ Առաջին խմբի առաջնությունում Եֆիմովը հանդես է եկել «Երևանի» կազմում, իսկ ամփոփելով չարենցավանյան ակումբում իր ելույթները՝ ռուս ֆուտբոլիստն ասում է՝ կարող էր ավելի լավ լինել․
«Ցանկացած փորձում ես ինձ համար դրականն եմ գտնում։ Ինչ վերաբերում է ելույթներին, կարծում եմ՝ կարող էր ավելի լավ լինել, բայց հեշտ ժամանակներ չէին․ քովիդն ու պատերազմն իրենց հետքը թողեցին։ Ամենևին հեշտ չէր այդ ամենը հաղթահարելը։ Երկրի համար շատ ավելի դժվար էր։ Ես անհանգստանում եմ Հայաստանի համար և ցավում եմ բոլոր կորուստների համար, ես ևս լավ տղաների ու ընկերների եմ կորցրել պատերազմում։ Շատ ցավալի է։ Հուսով եմ՝ ամեն բան լավ կլինի, Հայաստանին ու հայ ազգին ամենալավն եմ ցանկանում»,- եզրափակում է իր խոսքը Ստանիսլավ Եֆիմովը։
Հիշեցնենք՝ Չարենցավանի «Վանում» Եֆիմովը 25 խաղում 5 գոլ է խփել ու կատարել 5 գոլային փոխանցում: Ըստ լուրերի, թիմը մրցաշրջանի երկրորդ հատվածին պատրաստվում է ուկրաինացի Կոնստանտին Զայցևի գլխավորությամբ:
«Վանի» համար սա նորամուտի մրցաշրջանն է Հայաստանի Պրեմիեր լիգայում: Նախորդ մրցաշրջանում թիմը Կարեն Բարսեղյանի գլխավորությամբ հանդես էր գալիս Առաջին խմբի առաջնությունում, այնուհետև նրան փոխարինեց Սևադա Արզումանյանը:
Հայաստանի ընթացիկ առաջնությունում «Վանը» 11 խաղից հետո 10 միավորով 7-րդ տեղում է: