Մոլորակի ամենաթանկարժեք ֆուտբոլիստները հանդես են գալիս թոփ-5 լիգաներում, իսկ դրանից դուրս հազվադեպ կարելի է հանդիպել ֆուտբոլիստների, որոնց տրանսֆերային արժեքը հատում է 20-25 մլն եվրոյի շեմը։
Հենց այդպիսի ֆուտբոլիստների մասին էլ ցանկանում ենք այսօր խոսել, ովքեր հանդես են գալիս ոչ ամենամեծ լիգաներում, սակայն չի բացառվում, որ մենք նրանց կտեսնենք թոփ-5 լիգաներից որևէ մեկում հենց այս ամառ։
Այսօր մեր ցուցակում ընդգրկվել է 12 ֆուտբոլիստ, ում տրանսֆերային արժեքը, ըստ հեղինակավոր Transfermarkt-ի, 25 մլն և ավել է։ 12-7-րդ հորիզոնականը զբաղեցնող բոլոր ֆուտբոլիստների արժեքը կազմում է 25-ական մլն եվրո։
Առաջին եռյակում են Դոնյել Մալենը, Դարվին Նունյեսը և Նիկոլաս Տալյաֆիկոն։
Մալենը համարվում է նիդերլանդական ֆուտբոլի ամենահեռանկարային ֆուտբոլիստներից մեկը, այս մրցաշրջանում արդեն դարձել է 9 գոլի հեղինակ Էրեդիվիզիում, և չի բացառվում, որ շուտով մենք կտեսնենք նրան որևէ գրանդ ակումբի կազմում։
Ուրուգվայցի հարձակվող Նունյեսը, ով այս մրցաշրջանից առաջ է համալրել թիմը, միանգամից դարձավ «արծիվների» առաջատարներից մեկը (9-ական գոլ և գոլային փոխանցում), և 21-ամյա ֆուտբոլիստին, կարծես թե, սպասվում է մեծ ապագա համաշխարհային ֆուտբոլում։
Տալյաֆիկոն հանդիսանում է Մալենի թիմի գլխավոր մրցակցի՝ «Այաքսի» առաջատարներից մեկը, ում մենք առաջին մրցարջանը չէ, որ սպասում ենք տեսնել որևէ թոփ լիգայում։ Արգենտինացի պաշտպանն արդեն 28 տարեկան է, գտնվում է իր մարզական կարիերայի պիկում, միգուցե ժամանա՞կն է փորձել ուժերը ավելի բարձր մակարդակում․․․
Հաջորդ եռյակը մեզ մոտ ամբողջովին բրազիլական է՝ Վերոն, Էնթոնի և Էվերտոն։
18-ամյա Վերոնը, հավանաբար, այսօրվա մեր ցուցակում ամենից քիչ հայտնի ֆուտբոլիստն է։ Նա միակն է, ով ներկայացնում է ոչ եվրոպական առաջնություն։ «Պալմեյրասի» և բրազիլական ֆուտբոլի ծագող աստղը խաղում է եզրային հարձակվողի դիրքում (հիմնականում աջից, սակայն հարկ եղած դեպքում խաղում է նաև մյուս եզրում), Բրազիլիայի Ա Սերիայի շրջանակում դարձել է 4 գոլի և 2 գոլային փոխանցման հեղինակ։
«Այաքսի» ևս մեկ ներկայացուցիչ՝ Էնթոնին, նախորդ ամառ է համալրել ամստերդամյան ակումբի կազմը, տեղափոխվելով Եվրոպա հարազատ «Սանթոսից», և շատ կարճ ժամանակաշրջանում հարձակվողական ոճի կիսապաշտպանը դարձել է թիմի առաջատարներից մեկը՝ այս մրցաշրջանում հասցնելով մասնակցել թիմի 24 հանդիպման բոլոր մրցաշարերում և դառնալով 8-ական գոլի և գոլային փոխանցման հեղինակ։ Շատ տպավորիչ ցուցանիշ է։
Իսկ «Էվերտոնը կտեղափոխվի «Էվերթոն»» սլոգանը հայտնի է գրեթե բոլոր ֆուտբոլասերներին։ Բայց ո՛չ, բրազիլացի հարձակվողը այդպես էլ չտեղափոխվեց անգլիական ակումբ, այլ, մեր այսօրվա հերոսներից մեկի՝ Նունյեսի հետ միասին համալրեց «Բենֆիկայի» կազմը։ Նա նույնքան արդյունավետ չէ, որքան Դարվինը, սակայն ևս բավականին արագ հարմարվեց եվրոպական ֆուտբոլին։
«Բենֆիկայի» ևս մեկ ներկայացուիչ Գրիմալդոն միայնակ զբաղեցնում է մեր թոփի 6-րդ հորիզոնականը՝ 28 մլն եվրո տրանսֆերային արժեքով, որն ամենաբարձրն է պորտուգալական թիմում։ 25-ամյա իսպանացի ձախ պաշտպանը «Բարսելոնայի» սան է և 2016 թվականից հանդես է գալիս «Բենֆիկայում»։ Նրա խաղամակարդակը, մեր կարծիով, արդեն իսկ գերազանցում է պորտուգալական լիգան և մոտ ապագայում սպասում ենք նրան Լա Լիգայում կամ թեկուզ այլ թոփ առաջնություններում։
Հաջորդ եռյակը ներկայացնում են ֆուտբոլիստներ, որոնց տրանսֆերային արժեքը կազմում է 30-ական մլն եվրո։
Ռուսաստանի Պրեմիեր լիգայի միակ ներկայացուցիչը՝ Նիկոլա Վլաշիչը, շատ լավ մրցաշրջան է անցկացնում ԲԿՄԱ-ի կազմում․ 23-ամյա ֆուտբոլիստը ՌՊԼ-ի ընթացիկ մրցաշրջանում դարձել է 8 գոլի և 5 գոլային փոխանցման հեղինակ։ Հայրենիքում նա համարվում է խորվաթական ֆուտբոլի ապագա աստղերից մեկը և ամենայն հավանականությամբ նա երկար չի մնա մոսկովյան ակումբում։
Ֆրանսիացի հարձակվող Ալերը բոլորին հայտնի է «Այնտրախտում» ունեցած իր վառ ելույթներով, սակայն հետո, տեղափոխվելով «Վեստ Հեմ», չկարողացավ նույնքան արդյունավետ լինել նաև ԱՊԼ-ում։ Անակընկալ էր այս ձմեռ նրա տեղափոխությունը «Այաքս», սակայն չի էլ կարելի համարել այն սխալ որոշում։ Նա արագ ադապտացվեց նոր թիմում, արդեն դարձել է 2 գոլի ու 4 գոլային փոխանցման հեղինակ, և այս տրանսֆերը կարելի է համարել այսպես ասած ռեստարտ ֆրանսիացու համար։
Խեսուս Կորոնան Պորտուգալիայի առաջնության ամենաթանկարժեք ֆուտբոլիստն է։ Ունիվերսալ մեքսիկացին, ով խաղում է ամբողջ աջ եզրով՝ պաշտպանից մինչև հարձակվողական ոճի կիսապաշտպան, շատ լավ մրցաշրջան է անցկացնում և դա հավանաբար չի վրիպի նաև եվրոպական գրանդների ուշադրությունից։
Եվ այսօրվա երկու առաջատարները կրկին «Այաքսի» ներկայացուցիչներն են՝ դարպասապահ Օնանան և բրազիլացի հարձակվող Ներեսը, որոնց տրանսֆերային արժեքը կազմում է 36-ական մլն եվրո։
Կամերունացին ընդհանրապես համարվում է մոլորակի ամենահեռանկարային դարպասապահներից մեկը, ում գրեթե ցանկացած գրանդ ակումբ կցանկանա տեսնել իր կազմում, իսկ Ներեսն արդեն վաղուց է ապացուցել իր բարձր կարգը և այս ամառ կլինի տրանսֆերային շուկայի ամենացանկալի լոտերից մեկը։ Իսկ դուք ո՞ր թիմերի կազմում եք տեսնում այս դուետից յուրաքանչյուրին․ գրեք տարբերակները մեկնաբանություններում, մեզ հետաքրքիր կլինի կարդալ Ձեր կարծիքը․․․
Ամփոփելով այսօրվա մեր նյութը՝ առանձնացնենք հետաքրքիր երկու փաստ․
🇳🇱 Վերը նշված 12 ֆուտբոլիստներից կեսը՝ 6 հոգի, ներկայացնում են Նիդերլանդների առաջնությունը, ընդ որում, նրանցից 5-ը «Այաքսի» ֆուտբոլիստ են: 4 հոգի ներկայացնում են Պորտուգալիայի առաջնությունը, որոնցից 3-ը՝ «Բենֆիկան»։ Այդ երկու առաջնություններն էլ կարելի է համարել թոփ-5-ից հետո ուժեղագույններն աշխարհում։
🇧🇷 Ամենաշատ ներկայացուցիչն այօրվա թոփում ունի Բրազիլիան՝ 4 հոգի, ինչը ևս մեկ անգամ վկայում է այն մասին, որ լատինամերիկյան երկիրը թերևս մնում է ֆուտբոլային գլխավոր դարբնոցը։ Մնացած բոլոր ֆուտբոլիստներն այսօրվա մեր թոփից տարբեր երկրների ներկայացուցիչներ են։
Վար Բաբայան
