Առաջին խումբ. Հայկական ֆուտբոլի գերգոլառատ հետնախորշը

Հայաստանի Առաջին խմբի ընթացիկ առաջնությունը բոլոր առումներով տարբերվում է նախորդներից: Այն, որ թիմերի քանակը 17-ն է, իհարկե ողջունելի է, բայց արդյո՞ք քանակի և որակի մասին հայտնի միտքն այստեղ գործում է:

Կայացել է 10 տուր. գրեթե յուրաքանչյուր խաղային օրվանից հետո ակումբները հրապարակել են մրցավարների որոշումները բողոքարկող տեսանյութեր, գրառումներ են կատարվել ոչ ֆուտբոլային հաշիվների մասին, խաղերի կազմակերպման վերաբերյալ մի շարք թերություններ են մատնանշվել:

Այս շաբաթ Առաջին խմբի առաջնությունում դադար է՝ կապված հավաքականների միջազգային հանդիպումների հետ։ ArmSport.am-ը փորձել է հասկանալ՝ ինչ է կատարվում հայրենական ֆուտբոլի 2-րդ լիգայում:

Նախևառաջ, ուրվագծելով հայկական ակումբային ֆուտբոլի տեսլականը՝ հասկանում ենք, որ Ազգային առաջնության գլխավոր ռեզերվը որոշ չափով նաև Բարձրագույն խմբի առաջնության ապագան է: Առաջին խմբի այսօրը Բարձրագույն խմբի վաղն է: ՀՖՖ-ն հայտնել է, որ միայն առաջին հորիզոնականը գրաված թիմն է Բարձրագույն խմբի ուղեգիր ձեռք բերելու: Այստեղ կարելի է կանգ առնել:

Ֆեդերացիան, ըստ երևույթին, նման որոշում է կայացրել, որպեսզի ավելի լավ ընկալի նորաբաց թիմերի մոտեցումները, ծրագրերը: Իհարկե, եթե ակումբը նախապես իմանա, որ ուղեգիր ունի, ինչպես առաջ էր, միգուցե աշխատանքները այլ կերպ կազմակերպի, իսկ լրացուցիչ մոտիվացիան՝ այս դեպքում չեմպիոնությունը Առաջին խմբում, ստիպում է արդեն իսկ լայն աշխատանքներ իրականացնել:

Հատկանշական է նաև, որ Առաջին խմբի առաջնությունում խաղերի կազմակերպման առումով պահանջները հիմնովին փոխվել են: Այժմ ակումբներն արդեն իսկ տուգանվում են օրինակ՝ էլեկտրոնային լուսատախտակ չունենալու համար:

Կարգապահական կոմիտեն տուգանքներ է սահմանել նաև ֆուտբոլիստների խաղաշապիկներին ազգանունները չտպագրելու համար (էական փոփոխությունների ենթարկված կանոնադրությունը նաև դա է պահանջում):

Այս ամենը ներքին ֆուտբոլի զարգացման համար, այո, առաջ քայլ են: Բայց այլ բան է պահանջել, մեկ այլ բան՝ ստանալ: Ընթացիկ դրությամբ ոչ բոլոր ակումբներն են պատրաստ այս ամենին: Եվս մեկ հավելում. պահանջների խստացումը կարող է հաջորդ տարիներին բացառել Բարձրագույն խմբի հաջորդ առաջնություններում աղյուսակի ստորոտում հանգրվանող և ոչ մի առաջադեմ ծրագրեր չունեցող ակումբների ներկայությունը:

Ամեն ինչ, կարծես թե, հիանալի է: Ֆեդերացիան գծել է սահմանները, թելադրում է խելամիտ կանոններ և հայկական ֆուտբոլը կարող է զարգանալ, բայց…

Մրցավարություն

Հայկական ֆուտբոլի զարգացմանը էականորեն խանգարում է մրցավարության որակը: Քանի որ երկրի առաջատար մրցավարները սպասարկում են Բարձրագույն խմբի առաջնության հանդիպումները, իսկ Առաջին խմբի յուրաքանչյուր տուրում կայանում է 8 հանդիպում, խաղերը հաճախ սպասարկում են անփորձ և ցածր որակավորում ունեցող մի շարք մրցավարներ:

Գրեթե բոլոր թիմերը բողոք-դժգոհություններ են ներկայացրել ՀՖՖ մրցավարների դեմ:

Մրցավարական ակնհայտ սխալների օրինակներ.

Արձանագրվել է խաղից դուրս վիճակ

Հիմնականում ցածրակարգ ֆուտբոլ

Առաջին խմբի ընթացիկ առաջնությունը, մեղմ ասած, գոլառատ է. մի շարք խաղերում գրանցվում են ոչ ֆուտբոլային հաշիվներ՝ 2:8, 3:7, 0:8… Կայացած 10 տուրերը, բացառությամբ մեկի, անցել են գոլառատ.

1-ին տուր – 24 գոլ (1 հանդիպում պակաս)

2-րդ տուր – 34 գոլ

3-րդ տուր – 34 գոլ

4-րդ տուր – 43 գոլ

5-րդ տուր – 36 գոլ

6-րդ տուր – 18 գոլ

7-րդ տուր – 45 գոլ

8-րդ տուր – 25 գոլ

9-րդ տուր – 32 գոլ

10-րդ տուր – 45 գոլ

Սա ապացույց է, որ կայացած շատ հանդիպումներ բարձրակարգ չեն և տևական ժամանակ անց ֆուտբոլիստի կարիերայում աճ չի լինի: «Վանը» այս ամենի կոնտեքստում հաճելիորեն զարմացնում է: Լեգիոներները բարձրակարգ են, կա բոլոր հարմարություններով սեփական մարզադաշտ, զարկ է տրվում նաև մանկապատանեկան ֆուտբոլի զարգացմանը:

Ակումբի տեսլականի հետ կապված մյուս ակումբները դեռևս շատ հարցերի պետք է պատասխանեն: Առաջիկա 24 տուրը լավ ժամանակահատված է ամեն ինչ հասկանալու և Բարձրագույն խմբի հաջորդ առաջնության մասին պատկերացում ունենալու համար:

Վաղվա ֆուտբոլը սկսվում է նաև այստեղից՝ Հայաստանի Առաջին խմբից: