Հայաստանի Բարձրագույն խմբի առաջնության համար տարին ավարտված է: ArmSport.am-ը շարունակում է անդրադառնալ հայկական թիմերին: Երկրորդը գործող չեմպիոն, տարին 2-րդ հորիզոնականում ավարտած «Արարատ-Արմենիան» է:
«Արարատ-Արմենիա». 15 հանդիպում, 8 հաղթանակ, 3 ոչ-ոքի, 4 պարտություն
Եվրոպա լիգայում «Դյուդելանժի» հետ հանդիպումներով պայմանավորված՝ «Արարատ-Արմենիան» իր հանդիպումներն անցկացնում էր ավելի ուշ:
3 անընդմեջ հաղթանակներից թիմը առաջին տուրից հետաձգված խաղում պարտվեց «Ալաշկերտին», ապա երկու անընդմեջ ոչ-ոքի խաղաց:
Առաջնության մեկնարկից առաջ շատերը սպասում էին, որ «Արարատ-Արմենիան» և «Փյունիկը» առաջ են պոկվելու մրցակիցներից և պայքարելու են չեմպիոնության համար: «Արարատ-Արմենիան» առաջ չի պոկվել, բայց փաստ է, որ շարունակում է մնալ չեմպիոնության հիմնական հավակնորդներից մեկը:
Մարզչի գործոնը
Ներկայիս «Արարատ-Արմենիան» գրեթե անհնար է պատկերացնել առանց Վարդան Մինասյանի: Թիմը հսկայական ճանապարհ է անցել Մինասյանի հետ և առավել քան ակնհայտ է, որ կողմերը մտադիր են երկար համագործակցել:
Կազմը
Ինչպես «Լոռիի» պարագայում, այնպես էլ այստեղ, տոն տվող ֆուտբոլիստները լեգիոներներն են: Ինչն է ուրախալի «Արարատ-Արմենիայի» պարագայում. լեգիոներները Հայաստանի առաջնության համար բավականին բարձրակարգ են: Սպասումները շատ մեծ են նախորդ առաջնությունում թիմի լավագույն ռմբարկու Անտոն Կոբյալկոյից, ով դեռ 4 գոլ է խփել: Ընթացիկ առաջնությունում թիմի ամենաշատ գոլ խփած ֆուտբոլիստը Մաիլսոն Լիման է (5):
«Արարատ-Արմենիայի» կազմում բարձրակարգ լեգիոներների կողքին հանդես են գալիս Պետրոս Ավետիսյանը, Գոռ Մալաքյանը, Արթուր Դանիելյանը, Արմեն Համբարձումյանը, Արտյոմ Ավանեսյանը: Հայկական ֆուտբոլին թիմի գլխավոր օգուտներից մեկը այժմ էլ և ապագայում էլ թիմի 2-րդ կազմն է, որը բաղկացած է բացառապես հայ ֆուտբոլիստներից՝ Հովհաննես Հարությունյան, Արմեն Նահապետյան, Ալբերտ Խաչումյան, Արամ Խամոյան, իսկական հայտնություն Հակոբ Խաչատրյան: Մնում է հուսալ, որ այս ֆուտբոլիստներն առաջնության երկրորդ հատվածում ավելի շատ խաղաժամանակ կստանան գլխավոր թիմում:
Հայաստանի Գավաթ
Հայաստանի Գավաթի ընթացիկ խաղարկության 1/8 եզրափակչում «Արարատ-Արմենիան» 5:0 հաշվով հաղթել է Առաջին խմբի այժմյան առաջատար «Վեստ Արմենիային»: Քառորդ եզրափակչում «Արարատ-Արմենիայի» մրցակիցը «Սևանն» էր. «Արարատ-Արմենիան» հաղթեց հայկական ակումբային ֆուտբոլի պատմության ամենախոշոր հաշիվներից մեկով՝ 11:2:
Լուիս Ուգոչուկվուն և Արտյոմ Ավանեսյանը ընթացիկ խաղարկության լավագույն ռմբարկուներն են 5-ական գոլով:
Համակրելի և հայկական ֆուտբոլի մասին ավելի շատ մտածող թիմը
«Արարատ-Արմենիան» բավականին համակրելի թիմ է: Ստեղծման օրվանից մինչ այժմ զարգացման ուղին բռնած «Արարատ-Արմենիան» արդեն իսկ համաշխարհային ֆուտբոլում բարձրացրել է հայկական ակումբային ֆուտբոլի հարգը: Մեր երկրի չեմպիոնը շատ մոտ էր Եվրոպա լիգայի խմբային փուլին: «Արարատ-Արմենիայի» օրինակը պետք է «վարակիչ» լինի մյուս թիմերի համար, քանի որ խմբային փուլը սարերի հետևում չէ: «Արարատ-Արմենիան» Հայաստանում ֆուտբոլային ուրույն մշակույթ է ձևավորում և դա փաստ է:
Նախորդ տարվա համեմատ էլ էականորեն ավելացել են հայ ֆուտբոլիստների թիվը: Այո, լեգիոներների լիմիտն է ներդրվել, բայց դրանից զատ էլ նկատելի է, որ ակումբը հայկական ֆուտբոլի զարգացմանը համահունչ քայլելու տեսլական ունի:
Պայքարը
Բարձրագույն խմբի ընթացիկ առաջնությունը բարդ պայքար է խոստանում: Աղյուսակի վերնամասը խիտ է դասավորված: «Արարատ-Արմենիան» միանշանակ լինելու է լավագույն 6-նյակում և պայքարելու է չեմպիոնության համար: Գործող չեմպիոնի առավելությունն այն է, որ բոլոր թիմերի դեմ խաղերում նրանք ֆավորիտ են: Մրցակից թիմերը «Արարատ-Արմենիային» որպես չեմպիոն են վերաբերվում և ավելի են մղված հաղթանակի. այս հանգամանքը գեղեցկացնում է մեր երկրորդ և շատ ավելի նպատակային «Արարատի» մասնակցությամբ հանդիպումները:
Արման Առաքելյան
