Let’s talk about six baby, let’s talk about you and me…Հենց այս երգի մոտիվներով Յուրգեն Կլոպը ազդարարեց նախորդ մրցաշրջանի իր տրիումֆատիկ հաղթանակը Չեմպիոնների լիգայում։ Ժամանակն է եկել խոսել ուրիշ 6-ի մասին։ Այո՛, լիգայի խաղարկությունում 6 գավաթ ունենալը մեծագույն ձեռքբերում է «մերսիսայդցիների» համար, բայց մենք հո՜ գիտե՞նք, թե ինչի մասին են լուռ ու բարձրաձայն երազում «Լիվերպուլի» երկրպագուները։
Անգլիայի Պրեմիեր լիգայի մեկնարկային վեց տուրերը եկան լուսավորելու, որ նախորդ մրցաշրջանից հայտնի դարձած ու ռուսական «ну погоди»-ի ձևաչափով անցկացվող չեմպիոնական մրցավազքը դարձյալ ունենալու է երկու հերոս։ Դե իհարկե, խոսքը «Լիվերպուլի» ու «Ման․Սիթիի» մասին է։
«Լիվերպուլի» «ոչինչ չասող» ռեկորդները մեկնարկում
«Էնֆիլդի» տիրակալները դարձյալ ԱՊԼ-ում սկսել են գերազանց կերպով։ Մեկնարկային վեց խաղերում վեց հաղթանակ «Լիվերպուլը» երբեք չէր տարել ԱՊԼ-ում իր պատմության ընթացքում։ Սա իսկապես տպավորիչ ռեկորդ է, բայց այն ոչինչ չի ասում դեռևս։ Նախորդ մրցաշրջանում «մերսիսայդցիները» «պայթեցրել» էին վիճակագրական Opta-ի Twitter-յան էջը։ Դա մոտավորապես դեկտեմբերն էր։ Opta-ն գրում էր ու գրում, որ մինչ սուրբծննդյան տոները նման արդյունք գրանցած երկու թիմ է եղել նախկինում, երկուսն էլ չեմպիոն են հռչակվել արդյունքում։ Բայց «Լիվերպուլը» դա չարեց։ Մեծ հաշվով թվերն ու վիճակագրությունները ոչինչ չեն նշանակում, քանի որ առաջնությունը ավարտվում է վերջին տուրում, վերջին պահին ու հաղթում է նա, ով այդ ռեկորդների մեջ ավելի շատ միավոր է վաստակում։
Ինչու՞ նրանք և ուրիշ ոչ մեկը
Հեղինակավոր Goal-ը դեռևս երրորդ տուրից հետո «որոշեց», որ ԱՊԼ-ում չեմպիոնության համար պայքարը ծավալվելու է այս երկու թիմերի միջև։ Ինչու՞։ Փորձենք հասկանալ։ Անգլիական թվացյալ թոփ-6-ի մեջ ամենակայուն ֆուտբոլը ցուցադրում են հենց «Ման․ Սիթին» և «Լիվերպուլը»։ «Չելսին» վերակազմավորման փուլում է։ Ֆրենկ Լեմպարդը մեծ տեղ է տվել երիտասարդներին ու ինչպես օրեր առաջ ասաց Յուրգեն Կլոպը․ «Նրանք չեն խաղում նրա համար, որովհետև երիտասարդ են, այլ խաղում են նրա համար, որովհետև արժանի են»։ Եվ իսկապես, «կապույտները» փայլուն երիտասարդություն ունեն ի դեմս Տեմմի Աբրահամի, Քրիստիան Պուլիշիչի, Մեյսոն Մաունտի։ Սակայն այս ամենի հետ մեկտեղ դժվար է պատկերացնել, որ «Չելսին» ի զորու կլինի պայքարել չեմպիոնության համար։
«Մանչեսթեր Յունայթեդը» սարսափելի վիճակում է:
Երեկ «կարմիր սատանաների» նախկին գլխավոր մարզիչԺոզե Մոուրինյուն Sky Sports-ի եթերում խոստովանեց, որ 2018-ի դեկտեմբերին նա արժանի էր հեռացվելուն: Ժոզեի կարծիքով, սակայն, վատն այն է, որ հիմա ՄՅՈւ-ն ավելի վատ վիճակում է: Եվ իսկապես. «Ման. Յունայթեդին» նայելիս հասկանում ես, որ այդ թիմը ոչ թե չեմպիոնության համար չի կարող պայքարել, այլ նաև մեծ դժվարությունների է առերեսվելու ՉԼ գոտում հայտնվելու պայքարում:
Այդ նույն Ժոզեն այդ նույն Sky sports-ի եթերում մրցաշրջանի մեկնարկում ասաց հետևյալը. «Չեմպիոնության համար չորս թիմեր կարող են պայքարել՝ «Ման. Սիթին», «Լիվերպուլը», «Տոտենհեմը» և «Ման. Սիթի B»-ն, որովհետև երբ ես նայում եմ նրանց երկրորդ կազմին, իսկապես հասկանում եմ, որ նրանք ի զորու են չեմպիոնության»: Ժոզեն ճիշտ «կրակեց» նաև այստեղ՝ փոքրիկ բացառությամբ: Պատասխանի բնույթը նրանում էր, թե որ թիմի կազմն է ի զորու անցնել այս երկար մարաթոնը, որի վերջում չեմպիոնական գահն է:
«Խցանների» անշուք մեկնարկը
«Տոտենհեմը» վերջին տարիներին Անգլիայում ամենակայուն ֆուտբոլ ցուցադրող թիմերից մեկն է:
Պոչետինոյի տղաները 6 խաղերից երկուսում կորցրել են հաղթանակը հանդիպման ընթացքում: Հյուսիսլոնդոնյան դերբիում «Տոտենհեմը» 2-0-ից 2-2 խաղաց «Արսենալի» հետ, իսկ նախորդ տուրում 2-1 հաշվով պարտվեց «Լեսթերին»՝ հանդիպման ընթացքում հաղթելիս լինելով 1-0 հաշվով: Ավելին, «Տոտենհեմը» տանը պարտվել է «Նյուքասլին» ու ոչ-ոքի խաղացել (2-2) «Ման. Սիթիի» հետ: Քեյնն ու ընկերները շուտ են թուլանում: Դա ակնհայտ է: Բուն մրցավազքին «Տոտենհեմը» դժվար թե միանա, քանզի pit stop-երը չափից շատ են: Բայց նրանք կարող են լինել այն թիմը, որը երկու առաջատարների թիկունքում «շնչում» է՝ ստիպելով մշտապես հետհայացք նետել:
«Արսենալը» վատ տեսք չունի։ Էմերիի թիմը բնավորություն ցույց տվեց «Տոտենհեմի» հետ տնային խաղում, սակայն, հիմնահատակ ձախողվեց «Էնֆիլդում»։ Նրանք ևս դուրս են մնում չեմպիոնական մրցավազքից մեկ պարզ պատճառով։ «Ման․ Սիթին» հաղթում է «Ուոթֆորդին» 8-0 հաշվով, իսկ «Արսենալը» 2-0-ից հետո ոչ-ոքի է խաղում նրանց հետ, ակնհայտ է որակական տարբերությունը, ակնհայտ է, թե այս երկուսից ով է պայքարելու տիտղոսի համար։
Let’s talk about six
«Լիվերպուլը» վեց տուրից հետո առաջ է պոկվել «Ման. Սիթիից» 5 միավորով: Սա դեռևս ոչինչ չի նշանակում: Նախորդ տարի Պեպի թիմը հետ էր 7 միավորով: Հոգ չէ: Նրանք չեմպիոն դարձան: Մինչ նոյեմբերի 10-ը («Էնֆիլդում» հանդիպելու են «Լիվերպուլն» ու «Սիթին») շատ բան կարող է փոխվել: «Լիվերպուլը» ևս միավորներ է կորցնելու։ Ամեն ինչ դարձյալ որոշվելու է նման մեծ կարևորություն ունեցող խաղերում, ինչպես նախորդ տարի որոշվեց «goal — no goal» դրամատիկ ձևով։
Ու 6 տուրից հետո թերևս ակնհայտ է, որ հենց «Լիվերպուլն» ու «Ման․ Սիթին» են պայքարելու տիտղոսի համար, բայց արդյոք կկայանա՞ երկար սպասված բաղձալի հաղթանակը, թե՞ «Ման․ Սիթին» խելահեղ կերպով կճանապարհի իր նորագույն պատմության մեկ այլ լեգենդի ևս՝ Դավիդ Սիլվային։
Օրեր առաջ համացանցի ֆուտբոլային կատակների տիրույթում մի լուսանկար էր հայտնվել, որի բովանդակությունը հետևյալն էր․
«Լիվերպուլի»՝ ԱՊԼ-ի մրցաշարային աղյուսակում առաջին տեղում գտնվելը նման է փղի՝ ծառի վրա լինելուն։ Դու չգիտես, թե ինչպես է նա այնտեղ հայտնվել, բայց գիտես, որ հաստատ վայր է ընկնելու»։ Այս կատակի դառը իրականությունը սարսափեցնում է «մերսիսայդցիների» երկրպագուներին։ Ի՞նչ կլինի վերջում՝ կիմանանք միայն ԱՊԼ-ն մեր դիտակետում պահելու դեպքում․․․
Արամ Սահակյան
