Ֆուտբոլային սկաուտ․ Սևիլյայի սելեկցիան շարունակում է փայլել

Ֆուտբոլային սկաուտ շարքում այս անգամ կանդրադառնանք բավականին լավ մրցաշրջան անցկացնող «Սևիլյայի» ամենահեռանկարային ֆուտբոլիստներին։ Անդալուսական ակումբի սելեկցիոն բաժինը շարունակում է ապացուցել, որ լավագույններից մեկն է ոչ միայն Իսպանիայում, այլև ընդհանրապես Եվրոպայում։ Այսօր մեր դիտակետում են «Սևիլյայի» այն հեռանկարային ֆուտբոլիստներն, ովքեր թիմին են միացել 2019/20 մրցաշրջանում և իրենց լուման են ներդրել թիմի հաջողություններում։

Յուսեֆ Էն-Նեսիրի

Մարոկկո
«Սևիլյա»
23 տարեկան

Ֆուտբոլասերները, ովքեր առանձնապես չէին հետաքրքրվում «Լեգանեսի» ելույթներով, բավականին զարմացան, երբ այս ձմեռ «Սևիլյան» 20 մլն եվրո վճարեց աֆրիկացի ֆուտբոլիստի տրանսֆերի դիմաց։ Սակայն կարճ ժամանակահատվածում, Յուսեֆը ապացուցեց, որ անդալուսական ակումբի սելեկցիոն բաժինը դեռևս կարող է գտնել տաղանդներ այնտեղ, որտեղ շատ ակումբներ պարզապես ուշադրություն չեն դարձնում։ 23-ամյա ֆուտբոլիստը կարողացավ արագ հարմարվել նոր թիմի ֆուտբոլային փիլիսոփայությանը և կարճ ժամանակատվածում ամրապնդվեց նոր թիմի հիմնական կազում․ այս ընթացքում մարոկկացի ֆուտբոլիստն արդեն հասցրել է անցկացնել 11 հանդիպում «Սևիլյայի» կազմում՝ դառնալով 6 գոլի հեղինակ։

Ժուլես Կունդե

Ֆրանսիա
«Սևիլյա»
21 տարեկան

Ֆրանսիացի պաշտպանը այս մրցաշրջանից առաջ է միացել «Սևիլյային»՝ 25 մլն եվրոյի դիմաց։ Մինչ այդ նա բավականին տպավորիչ մրցաշրջան էր անցկացրել «Բորդոյի» կազմում։ Երիտասարդ պաշտպանը բավականին արագ ադապտացվեց իսպանական ֆուտբոլում և այժմ համարվում է անդալուսական թիմի պաշտպանության հենասյուներից մեկը՝ ցուցադրելով իր տարիքի համար բավականին հասուն և գրագետ ֆուտբոլ։ Եթե Ժուլեսը այդպես շարունակի, շուտով մենք կտեսնենք նրան որևէ գրանդ ակումբի մարզաշապիկով, նամանավանդ, որ արդեն իսկ մի քանի գրանդ ակումբներ սկսել են բավականին լուրջ հետաքրքրություն ցուցաբերել ֆրանսիացու նկատմամբ։

Դիեգո Կարլոս

🇧🇷 Բրազիլիա
«Սևիլյա»
27 տարեկան

Դիեգոն, ինչպես և մեր նախորդ հերոսը՝ Կունդեն, անդալուսական ակումբ է տեղափոխվել նախորդ մրցաշրջանում և կրկին՝ Ֆրանսիայի առաջնությունից, իսկ ավելի կոնկրետ՝ «Նանտից»։ Այո, նա արդեն 27 տարեկան է, սակայն կենտրոնական պաշտպանի համար դա այդքան էլ մեծ տարիք չէ։ Դիեգոյի համար, հավանաբար, 2019/20 մրցաշրջանը լավագույնն էր իր կարիերայում։ Պատահական չէ, որ նրա վստահ և որակյալ խաղը պաշտպանությունում աննկատ չի մնացել գրանդ ակումբների կողմից։ Այժմ բավականին շատ է խոսվում այն մասին, որ բրազիլացին նոր մրցաշրջանը կսկսի որևէ գրանդ ակումբի կազմում։ Մասնավորապես նշվում է, որ Յուրգեն Կլոպը ցանկանում է տեսնել Կարլոսին «Լիվերպուլում»։

Լուկաս Օկամպոս

🇦🇷 Արգենտինա
«Սևիլյա»
26 տարեկան

Բավականին հետաքրքիր է ստացվել, որ Օկամպոսը արդեն երրորդ ֆուտբոլիստն է մեր ցուցակում, ով տեղափոխվել է անդալուսկան ակումբ 2019/20 մրցաշրջանից առաջ և․․․ գուշակեցի՞ք որտեղից․ այո՛, Ֆրանսիայի առաջնությունից, բայց այս դեպքում արդեն «Օլիմպիկից»։ Օկամպոսը միանգամից դարձավ թիմի առաջատարներից մեկը և համարվում է նաև անցած մրցաշրջանի՝ թիմի գլխավոր ռմբարկուն՝ իր ակտիվում ունենալով 17 գոլ բոլոր մրցաշարերում։ Օկամպոսը, թերևս, մինչ այժմ լավագույն մրցաշրջանն անցկացրեց իր կարիերայում և ինչ որ բան հուշում է, որ այսքանով արգենտինացին չի բավարարվի և հաջորդ մրցաշրջանում Լուկասը անհատական առաջընթաց կգրանցի։ Չշտապենք, նոր մրցաշրջանի մեկնարկը սարերի ետևում չէ և շուտով մենք ինքներս ականատես կլինենք՝ ո՞ւր կտանի տաղանդավոր ֆուտբոլիստի ուղին։

Մունիր Էլ-Հադադի

🇪🇸 Իսպանիա
«Սևիլյա»
24 տարեկան

Մեր այսօրվա ցուցակում կարելի էր ընդգրկել նաև Սերխիո Ռեգիլոնին, ով, միանշանակ, հրաշալի մրցաշրջան անցկացրեց «Սևիլյայի» կազմում։ Սակայն ֆուտբոլիստը անդալուսական թիմում հանդես էր գալիս վարձավճարով, իսկ նրա տրանսֆերային իրավունքները պատկանում են «Ռեալին»։ Թե ինչպիսի լավ ֆուտբոլիստ է Ռեգիլոնը, կարծում եմ, կարիք չկա ներկայացնելու, դուք ինքներդ դա լավ գիտեք։ Իսկ քանի որ մենք այսօր անդրադառնում ենք այն ֆուտբոլիստներին, ովքեր առաջին մրցաշրջանն էին անցկացնում «Սևիլյայի» կազմում՝ հանդիսանալով այդ թիմի ֆուտբոլիստ, ապա որպես հեռանկարային ֆուտբոլիստ կարելի է առանձնացնել նաև ևս մեկ մարոկկացի ֆուտբոլիստի (հանդես է գալիս Իսպանիայի դրոշի ներքո)՝ Մունիր էլ-Հադադիին։ Ճիշտ է, ֆուտբոլիստը «Սևիլյային» է միացել դեռ նախորդ տարվա ձմռանը, սակայն 2019/20-ը առաջին լիարժեք մրցաշրջանն էր Մունիրի համար նոր թիմի կազմում։ Թիմի նախորդ մրցաշրջանի նորեկներից կարելի է առանձնացնել նաև Ժոան Ժորդանին և Օլիվեր Տորեսին, ովքեր ևս համեմատաբար լավ մրցաշրջան անցկացրեցին։ Ինչ վերաբերում է Մունիրին, ապա «Բարսելոնայի» նախկին ֆուտբոլիստը առաջիկայում կարող է դառնալ Լոպետեգիի թիմի գլխավոր դերակատարներից մեկը․ տաղանդն առկա է, մնում է պարզապես շարունակել քրտնաջան աշխատել․․․

Վար Բաբայան

Շարքի նախորդ մասերը

Նրանք դեռ Չինաստանում են

ՌՊԼ-ի ամենահեռանկարային ֆուտբոլիստները

Վալենսիան շարունակում է մնալ ֆուտբոլային քաղաք

Աֆրիկայի ամենաթանկարժեք 5 ադամանդները

5 ռմբարկուներ ոչ թոփ առաջնություններից

ՌԲ Լայպցիգը՝ ապագա աստղերի դարբնոց

Դեղձանիկները դեռ կճախրեն ֆուտբոլային երկնակամարում

Շոտլանդիայի առաջնության ամենահեռանկարային ֆուտբոլիստները

Լավագույնները Ա Սերիայի նկուղում

Ամերիկացիների երիտասարդ դեսանտը Եվրոպայում