Իսպանական ֆուտբոլային հանրությունը ցնցված է «Տեներիֆեի» 30-ամյա հարձակվող Խեսուս դե Միգելի ողբերգական մահվան լուրից։ Ֆուտբոլիստը կյանքից հեռացել է նոյեմբերի 3-ին՝ Իսպանիայի երկրորդ դիվիզիոնի շրջանակում կայացած «Անդորրայի» դեմ խաղում ստացած ծանր վնասվածքի հետևանքով։ Ճակատագրական բախման անմիջական մասնակիցը՝ «Անդորրայի» դարպասապահ Խեսուս Օվոնոն, ծանր հոգեբանական վիճակում է և փորձում է անձամբ կապ հաստատել մահացած գործընկերոջ ընտանիքի հետ։
Ինչպես հաղորդում է Mundo Deportivo-ն՝ հղում անելով COPE ռադիոկայանի El Partidazo հաղորդմանը, Օվոնոն խորապես ընկճված է տեղի ունեցածից։ Ծանր մթնոլորտ է տիրում նաև «Անդորրայի» հանդերձարանում, որտեղ մի շարք ֆուտբոլիստներ կատարվածը որակել են որպես իրենց մարզական կարիերայի ամենադաժան փորձությունը։
Ակումբում պնդում են, որ դարպասապահը մրցակցին վնասելու որևէ դիտավորություն չի ունեցել, թեև ընդունում են, որ դարպասից ժամանակին դուրս չգալու սխալ որոշումն ավարտվել է ողբերգությամբ։ Անմիջապես միջադեպից հետո տրիբունաներից Օվոնոյի հասցեին հնչել են «մարդասպա՛ն, մարդասպա՛ն» վանկարկումներ։ Ստացած բազմաթիվ սպառնալիքների ու հոգեբանական ճնշման պատճառով դարպասապահն ավելի ուշ ստիպված է եղել ջնջել Instagram-ի իր պաշտոնական էջը։
El Desmarque-ի փոխանցմամբ՝ ողջ ընթացքում դարպասապահը «Անդորրայի» ներկայացուցչի և բժշկական շտաբի միջոցով մշտապես հետաքրքրվել է Դե Միգելի առողջական վիճակով։ Նա ցանկանում է անձամբ ցավակցել ֆուտբոլիստի հարազատներին, սակայն նախընտրում է սպասել հարմար պահի։ Օվոնոն մտադիր է նախ մասնավոր զրույց ունենալ ընտանիքի անդամների հետ և միայն դրանից հետո հանդես գալ հրապարակային հայտարարությամբ։
«Անդորրայում համատարած անհանգստություն է։ Որոշ խաղացողներ խոստովանել են, որ սա խաղադաշտում իրենց ապրած ամենածանր պահն է։ Օվոնոն չափազանց ծանր է տանում այս ամենը։ Ակումբում վստահեցնում են, որ վնասելու միտում չի եղել»,– նշել է COPE-ի լրագրող Իվան Ալվարեսը։
«Տեներիֆե» – «Անդորրա» հանդիպումը մոտենում էր ավարտին 2:2 հաշվով, երբ ավելացված ժամանակի 96-րդ րոպեին խաղադաշտի կենտրոնական հատվածում տեղի ունեցավ չարաբաստիկ բախումը։ Երկար փոխանցումից հետո Խեսուս դե Միգելը ձգտել է տիրել գնդակին, իսկ Օվոնոն, լքելով տուգանային հրապարակը, փորձել է հեռացնել այն։ Մեծ արագությամբ տեղի ունեցած բախման պահին դարպասապահի ծունկը հարվածել է հարձակվողի կրծքավանդակին։
Դե Միգելն անգիտակից վիճակում ընկել է խոտածածկին։ Բժիշկները մի քանի րոպե առաջին օգնություն են ցուցաբերել հենց դաշտում, ապա նրան շտապ տեղափոխել հիվանդանոց։ Ճանապարհին ֆուտբոլիստի մոտ սրտի կանգ է գրանցվել, սակայն բուժանձնակազմին հաջողվել է վերականգնել սրտի աշխատանքը։ Մրցավարն Օվոնոյին պատժել է ուղիղ կարմիր քարտով, իսկ հանդիպումն այդպես էլ չի վերսկսվել, քանի որ երկու թիմերի ֆուտբոլիստներն էլ հոգեբանորեն ի վիճակի չեն եղել շարունակել խաղը։
Նոյեմբերի 3-ի առավոտյան «Տեներիֆեն» պաշտոնապես հայտնեց, որ Խեսուս դե Միգելը ժամը 08:00-ին մահացել է հիվանդանոցում։ Չնայած վնասվածքի ծանրությանը՝ սկզբնական շրջանում բժիշկները նրա վիճակը գնահատել էին կայուն, սակայն գիշերվա ընթացքում ֆուտբոլիստի մոտ նյարդաբանական վիճակի կտրուկ վատթարացում է գրանցվել։
«Ցավից կոտրված, կոկորդում սեղմված գնդով և չկարողանալով հավատալ կատարվածին՝ հայտնում ենք Խեսուս դե Միգել Ալամեդայի ողբերգական մահվան մասին։ Մեր մտքերը նրա ընտանիքի, հարազատների և բոլոր նրանց հետ են, ովքեր սգում են այս անդառնալի կորուստը»,– ասված է ակումբի տարածած հաղորդագրության մեջ։
Ողբերգության կապակցությամբ ցավակցական ուղերձներ են հղել իսպանական գրանդները՝ «Բարսելոնան» և Մադրիդի «Ռեալը»՝ իրենց զորակցությունը հայտնելով ֆուտբոլիստի ընտանիքին ու «Տեներիֆեին»։ Իսպանիայի ֆուտբոլի թագավորական ֆեդերացիան հարգանքի տուրք է մատուցել հարձակվողի հիշատակին՝ հետաձգելով նոյեմբերի 3-ին նախատեսված բոլոր հանդիպումները։
Խեսուս դե Միգելը «Տեներիֆե» էր տեղափոխվել 2025 թվականի ամռանը «Կաստելյոնից»։ Նախորդ մրցաշրջանում 30-ամյա հարձակվողը դարձել էր 11 գոլի հեղինակ։
