Իտալական «Կալյարիի» կիսապաշտպան և լեգենդար Պաոլո Մալդինիի որդի Դանիել Մալդինին Միլանում ավտովթարի է ենթարկվել, ինչից անմիջապես հետո զրկվել է վարորդական իրավունքից՝ ոչ սթափ վիճակում մեքենա վարելու համար:
Միջադեպը տեղի է ունեցել Միլանի կենտրոնում։ Ըստ ոստիկանության նախնական տվյալների՝ Դանիելը վարել է Porsche Carrera 4 մակնիշի ավտոմեքենա և, խախտելով երթևեկության կանոններն ու չզիջելով ճանապարհը, բախվել է Volkswagen Golf-ի։ Ուժգին հարվածի հետևանքով Golf-ն էլ բախվել է մոտակայքում կայանված Mercedes-ին։
Վթարի հետևանքով տուժել է 6 մարդ, այդ թվում՝ անձամբ Մալդինին և ևս հինգ երիտասարդ (20 և 22 տարեկան երկու աղջիկ, ինչպես նաև 19, 20 և 21 տարեկան երեք տղա)։ Բարեբախտաբար, բոլորը ստացել են միայն թեթև մարմնական վնասվածքներ և տեղափոխվել են հիվանդանոցներ՝ լրացուցիչ բուժզննման համար։
Դեպքի վայրում իրականացված ալկոթեստը ցույց է տվել, որ Մալդինին գտնվել է ալկոհոլի ուժեղ ազդեցության տակ։ Առաջին փորձարկման ժամանակ գրանցվել է 0,91 մգ/լ, իսկ երկրորդի դեպքում՝ 0,89 մգ/լ արդյունք, ինչը հավասարազոր է արյան մեջ 1,82 գ/լ ալկոհոլի պարունակության։ Այժմ ոստիկանությունը սպասում է նաև հիվանդանոցից փոխանցվող թմրանյութերի առկայության ստուգման արդյունքներին։
Իտալիայի ճանապարհային երթևեկության կանոնների համաձայն՝ 1,5 գ/լ-ից բարձր ցուցանիշը համարվում է ամենածանր խախտումը, որը ենթադրում է քրեական պատասխանատվություն։ Ֆուտբոլիստին սպառնում է վարորդական իրավունքից զրկում 1-ից 2 տարի ժամկետով, ինչպես նաև ավտոմեքենայի բռնագրավում։
Ֆուտբոլիստի փաստաբան Դանիլո Բուոնջոռնոն պաշտոնական հայտարարությամբ հանգստացրել է երկրպագուներին.
«Դանիելն իրեն լավ է զգում և ոչ մի լուրջ վնասվածք չի ստացել։ Հիվանդանոցում կարճատև հետազոտությունից հետո նա անմիջապես դուրս է գրվել, վերադարձել տուն և գտնվում է ապահով վիճակում»:
