Ինչպես արդեն տեղեկացրել ենք, սեպտեմբերի 7-ին «Փյունիկի» գլխավոր մարզիչ Արտակ Օսեյանը հեռացել է զբաղեցրած պաշտոնից։
Օսեյանի հետ համագործակցության դադարեցումից հետո թիմի մարզչական շտաբը լքել են նաև նրա օգնականներ Արթուր Մկրտչյանն ու Գոռ Մալաքյանը, ինչպես նաև դարպասապահների մարզիչ Գուրգեն Հակոբյանը։
Այս պահին «Փյունիկի» գլխավոր մարզչի պարտականությունները ժամանակավորապես ստանձնել է Արամ Գյուլբուդաղյանը։ Փորձառու մասնագետը երևանյան ակումբի համակարգում աշխատում է դեռևս 2017 թվականից և զուգահեռաբար ղեկավարում է մանկապատանեկան ֆուտբոլի զարգացման ծրագիրը։
Ակումբի ներսում տեղի ունեցող խմորումներն իրենց յուրօրինակ արձագանքը գտան նաև խաղադաշտում։ Այսօր՝ սեպտեմբերի 9-ին կայացած Հայաստանի Պրեմիեր լիգայի 3-րդ տուրից հետաձգված «Սարդարապատ» — «Փյունիկ» հանդիպման մեկնարկից առաջ երևանյան թիմի ֆուտբոլիստներն անակնկալ ակցիա են իրականացրել՝ նախավարժանքի դուրս գալով նախկին գլխավոր մարզիչ Արտակ Օսեյանի լուսանկարով տպագրված խաղաշապիկներով։
