Արգենտինացի հարձակվող, «Ոսկե գնդակի» ութակի դափնեկիր Լիոնել Մեսսին սկզբունքային համաձայնության է եկել Իսպանիայի Սեգունդայում հանդես եկող «Էլդենսե» ֆուտբոլային ակումբը ձեռք բերելու շուրջ: Սա 39-ամյա ֆուտբոլիստի արդեն երկրորդ նմանատիպ գործարքն է 2026 թվականի ընթացքում։
«Ինտեր Մայամիի» աստղի իրավաբաններն արդեն որոշ ժամանակ բանակցություններ էին վարում ակումբի ներկայիս սեփականատերերի՝ Խուան Կառլոս Տրուխիլիոյի գլխավորած կոլումբիական TH ներդրումային խմբի հետ։ Ակնկալվում է, որ Մեսսին կգնի ակումբի բաժնետոմսերի 100%-ը՝ հանդես գալով որպես միակ ներդրող՝ առանց երրորդ անձանց կամ նախկին ֆուտբոլիստների ներգրավման։ Գործարքի պաշտոնական ավարտը կախված է Իսպանիայի սպորտի բարձրագույն խորհրդի (CSD) թույլտվությունից, որի ստացումից հետո այն կհայտարարվի առաջիկա օրերին։ Մեսսին կդառնա առաջին արգենտինացին, ով պրոֆեսիոնալ ֆուտբոլային ակումբի սեփականատեր կդառնա Իսպանիայում:
Ակումբի ընտրությունը պատահական չէ։ «Էլդենսեն» տեղակայված է Ալիկանտե նահանգի Էլդա քաղաքում, որը գտնվում է Կատալոնիայի հարևանությամբ։ Հենց այստեղ է Մեսսին ծրագրում հաստատվել կարիերան ավարտելուց հետո։ Ակումբն այս պահին ելույթ է ունենում Իսպանիայի ուժով երկրորդ դիվիզիոնում՝ Սեգունդայում, սակայն մրցաշրջանի մեկնարկն անհաջող է ստացվել. անցկացրած տուրերից հետո թիմն ունի ընդամենը 2 միավոր և գտնվում է վտանգավոր գոտում՝ զբաղեցնելով 20-րդ հորիզոնականը:
Եթե գործարքը բարեհաջող ավարտվի, սա կլինի 2026 թվականին Մեսսիի կողմից ձեռք բերված երկրորդ ակումբը։ Ապրիլին նա արդեն դարձել էր կատալոնական «Կոռնելյայի» սեփականատերը։ Այս ակումբը, որը հանդես է գալիս Իսպանիայի ցածր դիվիզիոններից մեկում, հայտնի է իր հզոր ակադեմիայով, որտեղ ժամանակին կրթվել են այնպիսի ֆուտբոլիստներ, ինչպիսիք են Ժորդի Ալբան, Դավիդ Ռայան և Կեյտա Բալդեն:
Գործող և նախկին ֆուտբոլիստների կողմից ակումբներ գնելու պրակտիկան ավելի ու ավելի է տարածվում։ Կրիշտիանու Ռոնալդուն ունի իսպանական «Ալմերիայի» բաժնետոմսերի 25%-ը, Լուկա Մոդրիչն ու Զլատան Իբրահիմովիչը փոքրամասնական բաժնետերեր են համապատասխանաբար «Սուոնսիում» և «Համարբյուում»։ Կիլիան Մբապեն 2024-ին 15 մլն եվրոյով գնեց ֆրանսիական «Կանը», թեև այս նախագիծն առայժմ այնքան էլ հաջողված չէ։ Իսկ ահա Ժերար Պիկեն 2018-ին ձեռք բերեց ցածր դիվիզիոնում հանդես եկող «Անդորրան», որը նրա ղեկավարությամբ կարճ ժամանակում բարձրացավ Սեգունդա։
Հիշեցնենք, որ 39-ամյա Լիոնել Մեսսին, ով «Ինտեր Մայամիի» կազմում 2025 թվականին դարձավ MLS-ի չեմպիոն և երկարաձգեց պայմանագիրն ակումբի հետ մինչև 2028 թվականը, վերջերս ավարտեց կարիերան Արգենտինայի ազգային հավաքականում՝ 2026 թվականի աշխարհի առաջնության եզրափակչին հասնելուց հետո։ Նա նաև ընդգրկված է 2026 թվականի «Ոսկե գնդակի» հավակնորդների ցանկում։
