Մարզիչ Գոռ Ազիզյանը կիսվել է UFC-ում Արման Ծառուկյանի առաջիկա մենամարտի վերաբերյալ իր սպասելիքներով ու գնահատականներով: Հիշեցնենք, որ սեպտեմբերի 20-ին Ծառուկյանը UFC 331 մրցաշարի երկրորդ գլխավոր մենամարտում ուժերը կչափի բրազիլացի Մաուրիսիո Ռուֆիի հետ:
Sport24-ի թղթակցի հետ զրույցում մասնագետը վերլուծել է Արմանի ընտրությունն ու հնարավոր դիմակայություններն ապագայում։
«Ծառուկյանն ընդունել է Ռուֆիի հետ մարտը, քանի որ վստահ է իր հաղթանակին։ Մինչ այդ նրան առաջարկել էին մենամարտել Մատեուշ Գամրոտի հետ, սակայն նա մերժեց։ Ընդ որում, Գամրոտն այն ժամանակ դասակարգման 5-րդ համարն էր, իսկ հիմա Արմանը համաձայնել է մենամարտել 7-րդ համարի հետ»,- նշել է Ազիզյանը։
Հարցին, թե արդյոք Ռուֆիի դեմ մենամարտը բարդ չի լինի հայ մարտիկի համար, մարզիչը պատասխանել է միանշանակ.
«Իհարկե ոչ: Նա պարզապես պարտեր կտեղափոխի մրցակցին ու վերջ կտա նրան։ Արմանը երբեք ռիսկի չէր դիմի և ըմբիշի հետ չէր մենամարտի։ Ինչի՞ն է դա նրան պետք»:
Անդրադառնալով Ծառուկյան — Ուսման Նուրմագոմեդով հնարավոր սուպերմենամարտին՝ Ազիզյանն ընդգծել է ոճերի տարբերությունը.
«Դա ոճերի շատ հետաքրքիր բախում է: Ուսմանը, որպես մարտիկ, շատ ավելի հարուստ զինանոց ունի՝ ոտքեր, ձեռքեր, գրեփլինգ… այն ամենը, ինչ ուզում ես: Սակայն չեմ կարծում, թե Արմանին այս մենամարտը հետաքրքրում է, այն ձեռնտու է միայն UFC-ին: Ուսմանը նույն Խաբիբն է, պարզապես նաև կանգնած դիրքում է վտանգավոր հարվածներ հասցնում»:
