«Ֆիլադելֆիա Յունիոնն» ու «Ինտեր Մայամին» գոլառատ և չափազանց էմոցիոնալ ոչ-ոքի (2:2) գրանցեցին ՄԼՍ-ի կանոնավոր առաջնության հերթական տուրում:
Չեսթերի «Սուբարու Պարկ» մարզադաշտում կայացած հանդիպումն աչքի ընկավ ոչ միայն աստղային ֆուտբոլիստների արդյունավետ գործողություններով, այլև դրամատիկ զարգացումներով ու խաղավարտին գրանցված ծեծկռտուքով:
Խաղի հաշիվը 11-րդ րոպեին բացեց տանտերերի հարձակվող Ինդիանա Վասիլևը: Սակայն առաջին խաղակեսի միջնամասում ընդամենը 5 րոպեի ընթացքում «Ինտեր Մայամիին» հաջողվեց երկու գնդակ ուղարկել մրցակցի դարպասը. աչքի ընկան Դանիել Պինտերն ու արգենտինացի հարձակվող Լիոնել Մեսսին։ Վերջինիս գոլային փոխանցում կատարեց ուրուգվայցի ռմբարկու Լուիս Սուարեսը:
Ընդմիջումից հետո «Ֆիլադելֆիան» կարողացավ վերականգնել հաշվի հավասարությունը Նիլ Պիերի խփած գոլի շնորհիվ: Քիչ անց դաշտի տերերը հնարավորություն ունեին նաև առաջ անցնելու հաշվի մեջ, սակայն Միլան Իլոսկիի գոլը չեղարկվեց VAR-ի միջամտությունից հետո՝ խաղից դուրս վիճակի պատճառով: Խաղի վերջին րոպեներն անցան գերլարված մթնոլորտում. ֆուտբոլիստների միջև զանգվածային բախում սկսվեց, ինչի արդյունքում երկու թիմերն էլ հանդիպումն ավարտեցին փոքրամասնությամբ:
Այս հանդիպումն առանձնահատուկ էր արգենտինացի աստղի համար: Սա Մեսսիի առաջին գոլն էր ԱԱ-2026-ից և հոր՝ Խորխեի մահվանից հետո: 39-ամյա ֆուտբոլիստի համար սա պրոֆեսիոնալ կարիերայում 922-րդ գոլն էր (795-ը՝ ակումբային, 125-ը՝ հավաքականի մակարդակով), որին հասնելու համար նրանից պահանջվեց 1191 հանդիպում:
Ամերիկյան ակումբի կազմում, որին նա միացել է 2023-ի ամռանը և որի հետ հոկտեմբերին երկարաձգել է պայմանագիրը մինչև 2028 թվականը, նա անցկացրել է 109 խաղ և դարձել 91 գոլի հեղինակ: Հիշեցնենք, որ ՊՍԺ-ի կազմում նա դարձել է 32 գոլի հեղինակ 75 խաղում, իսկ «Բարսելոնայում»՝ 672 գոլի (778 խաղում)։ Արգենտինայի հավաքականի մարզաշապիկով Մեսսին դաշտ է դուրս եկել 207 անգամ:
Այս ոչ-ոքիից հետո «Ֆիլադելֆիան» ընդհատեց իր չորս հանդիպումից բաղկացած հաղթական շարքը: Թիմը վաստակած 20 միավորով Արևելյան կոնֆերենցիայում զբաղեցնում է 13-րդ հորիզոնականը:
«Ինտեր Մայամին» էլ իր հերթին ՄԼՍ-ում առանց հաղթանակների շարքը հասցրեց երեք խաղի ․մինչ այս թիմը պարտվել էր «Նեշվիլին» ու ոչ-ոքի խաղացել «Քոլամբուս Քրյուի» հետ։ Մայամին ներկայացնող ակումբը 20 խաղից հետո 39 միավորով Արևելյան կոնֆերենցիայի 2-րդ տեղում է:
Հաջորդ տուրում, որը կկայանա օգոստոսի 23-ին, «Ինտեր Մայամին» կմրցի «Տորոնտոյի», իսկ «Ֆիլադելֆիա Յունիոնը»՝ «Օստինի» հետ:
Տեսանյութը՝ ստորև․
Մրցաշարային աղյուսակն այս պահին
