Մադրիդի «Ռեալի» գլխավոր մարզիչ Ժոզե Մոուրինյուն մեկնաբանել է ավստրիական Կլագենֆուրտում կայացած «Ֆիորենտինայի» հետ ընկերական հանդիպման արդյունքը (2:2):
Պորտուգալացի մասնագետը, ով վերադարձել է «արքայական» ակումբ, Real Madrid TV-ի եթերում կիսվել է իր տպավորություններով՝ առանձնացնելով թիմի երեք տարբեր դեմքերը։
«Ես տեսա երեք տարբեր «Ռեալ»՝ թարմ, հոգնած և գերհոգնած։ Թարմ թիմը պարզապես հրաշալի էր խաղում։ Ընդմիջմանը գրանցված 2-1 հաշիվը նույնիսկ փոքր էր մեզ համար. մենք առաջին 45 րոպեներն անցկացրինք բարձրագույն մակարդակով և հանգիստ կարող էինք հանդերձարան գնալ 3-0 կամ 4-0 հաշվի պայմաններում»։
Ըստ մարզչի՝ երկրորդ խաղակեսում հանդիպումն ավելի կոշտ և ֆիզիկական բնույթ ստացավ.
«Մրցակիցը սկսեց ճնշում գործադրել, և ի հայտ եկավ թիմի երկրորդ դեմքը։ Տուգանային հրապարակում Խոան Մարտինեսի և Մարիո Ռիվասի պես երեխաների հետ խաղալը բարդ էր։ Քանի դեռ խաղը չէր մտել ֆիզիկական պայքարի փուլ, նրանք անհավանական բարձր կարգ էին ցուցադրում ու ֆանտաստիկ հանդիպում անցկացրին։ Բայց ֆիզիկապես նրանք դեռ պատրաստ չեն դիմակայելու այնպիսի «հրեշի», ինչպիսին Մոյզե Քինն է»։
Խոսելով խաղավերջի և «երրորդ դեմքի» մասին՝ Ժոզեն ընդգծել է ֆուտբոլիստների նվիրվածությունն ու թիմային ոգին.
«Այդ վիճակն ինձ ամենաշատը դուր եկավ։ Թիմը գերհոգնած էր, բայց կարողացավ մնալ միասնական ու վերադարձնել խաղի վերահսկողությունը։ Դումֆրիսն ու Էնդրիկը ընդամենը երեք օր են մարզվել մեզ հետ, բայց 70 րոպեից ավելի խաղացին։ Դա ֆանտաստիկ ջանք էր, որն ինձ համար մեծ նշանակություն ունի։ Ես շնորհակալություն հայտնեցի նրանց իրենց նվիրվածության համար։ Ինձ ամեն ինչ դուր եկավ»։
Մոուրինյուն հավելել է, որ հանդիպումից առաջ ֆուտբոլիստներին հիշեցրել է գլխավոր կանոնը. «Ռեալը» մնում է «Ռեալ» անգամ ընկերական խաղերում, ուստի պետք է խաղադաշտ դուրս բերեր բոլոր նրանց, ովքեր այդ պահին հասանելի էին.
«Առաջին թիմի հասանելի յոթ ֆուտբոլիստներից երկուսն ընդամենը երեք մարզում են անցկացրել։ Հետո մենք դաշտ դուրս բերեցինք խեղճ Կառլոս Էսպիին, ով կարծես նոր էր արթնացել երազից. նա երեկ մարզվել էր ընդամենը մեկ ժամ, բայց այսօր օգնեց մեզ ու հնարավորություն ստացավ հասկանալու, թե ինչ է իրենից ներկայացնում Մադրիդը։
Իհարկե, ինձ անհանգստացնում է հիմնական կազմի մյուս խաղացողների բացակայությունը։ Կցանկանայի երեք շաբաթ լիարժեք նախապատրաստվել նրանց հետ միասին, բայց դա անհնար է։ Երկուշաբթի մեզ կմիանան Վինիսիուսը, Բրահիմն ու Բերնարդու Սիլվան, իսկ մնացածներն աստիճանաբար կժամանեն»։
Հարցին, թե ինչ է զգում կրկին «Ռեալը» գլխավորելիս, պորտուգալացին պատասխանել է իրեն բնորոշ սառնասրտությամբ.
«Առայժմ ոչինչ։ Իսկական խաղերը դեռ առջևում են»։
