Հարավաֆրիկյան Հանրապետության (ՀԱՀ) հավաքականի և «Մամելոդի Սանդաունզի» կիսապաշտպան Ջեյդեն Ադամսը կյանքից հեռացել է 25 տարեկանում։ Ողբերգական լուրը հաստատել են Հարավաֆրիկյան ֆուտբոլիստների ասոցիացիան և խաղացողի մենթորը։
Ֆուտբոլիստի մահվան հստակ պատճառները դեռևս չեն հաղորդվում:
«Մեր երկիրը կորցրեց ականավոր ֆուտբոլիստի, սակայն Ջեյդեն Ադամսի մասին հիշատակն ու նրա ժառանգությունը միշտ մեզ հետ կմնան։ Մենք երբեք չենք մոռանա նրա համեստությունը, բացառիկ տաղանդն ու այն հպարտությունը, որով նա ներկայացնում էր ՀԱՀ-ը։ Հանգչիր խաղաղությամբ, Ջեյդեն»,- ասված է ասոցիացիայի տարածած պաշտոնական հայտարարության մեջ։
Ադամսի մենթորը Soccer Laduma պորտալի հետ զրույցում նշել է, որ կատարվածն իսկական շոկ էր բոլորի համար.
«Այս կորուստը պարզապես ոչնչացրեց մեզ։ Նոր էինք վերադարձել Աշխարհի առաջնությունից… Հինգշաբթի խոսել էինք, տղան շատ մոտիվացված էր և ցանկանում էր վերադառնալ ու շարունակել խաղալ։ Ոչ ոք չէր սպասում նման բանի։ Այս պահին ուղղակի բառեր չեմ գտնում, բայց խնդրում ենք հարգել ընտանիքի անձնական տարածքը»։
Նշենք, որ ԱԱ-2026-ում Ադամսը մասնակցել էր խմբային փուլի բոլոր 3 հանդիպումներին, սակայն Կանադայի դեմ 1/16 եզրափակչի խաղում (0:1) դաշտ դուրս չէր եկել։ Ազգային հավաքականի կազմում նա ընդհանուր առմամբ անցկացրել է 9 հանդիպում և դարձել 1 գոլի հեղինակ։
Ակումբային մակարդակում կիսապաշտպանը 5 տարի պաշտպանել է «Ստելենբոսի» գույները, իսկ 2025 թվականին տեղափոխվել է «Մամելոդի Սանդաունզ»։ Նոր ակումբի կազմում անցկացրած 27 խաղում նա խփել էր 4 գնդակ, իսկ 2025/26 մրցաշրջանում նվաճել էր Աֆրիկայի Չեմպիոնների լիգայի գավաթը։
