Մադրիդի «Ռեալը» պաշտոնական հաղորդագրություն է տարածել՝ արձագանքելով Մյունխենի «Բավարիայի» եզրային հարձակվող Մայքլ Օլիսեի հնարավոր տրանսֆերի վերաբերյալ ակտիվորեն շրջանառվող լուրերին։
«Արձագանքելով տարբեր ԶԼՄ-ներում շրջանառվող այն տեղեկություններին, թե իբր մեր ակումբը հետաքրքրված է «Բավարիայի» ֆուտբոլիստ Մայքլ Օլիսեի ծառայություններով՝ Մադրիդի «Ռեալը» ցանկանում է հայտարարել, որ որևէ ուղղակի կամ անուղղակի կապ չի ունեցել վերոնշյալ խաղացողի, նրա ներկայացուցիչների կամ նրա շրջապատի որևէ անձի հետ»,- նշված է մադրիդյան ակումբի պաշտոնական կայքում հրապարակված հայտարարության մեջ։
«Արքայական» ակումբը նաև ընդգծել է իր և մյունխենյան գրանդի միջև առկա գերազանց ինստիտուցիոնալ հարաբերությունները.
«Մեզ կապում է փոխադարձ հարգանքի, համագործակցության և հիացմունքի երկարամյա պատմություն, ուստի ցավում ենք իրականությանը չհամապատասխանող շահարկումների տարածման համար։ Մեր ակումբները միշտ պահպանել են վստահության վրա հիմնված կապեր։ Մենք համոզված ենք, որ մեկ այլ ակումբի պատկանող ֆուտբոլիստի նկատմամբ ցանկացած հնարավոր հետաքրքրության դեպքում հարցը նախևառաջ պետք է կարգավորվի ակումբների միջև՝ ինստիտուցիոնալ լոյալության սկզբունքներին համապատասխան, ինչն էլ պատմականորեն եղել է «Բավարիայի» և «Ռեալի» հարաբերությունների հիմքում»։
Հիշեցնենք, որ ավելի վաղ ֆրանսիացի վինգերի նկատմամբ մադրիդցիների հետաքրքրության մասին հայտնել էին հայտնի ինսայդեր Ֆաբրիցիո Ռոմանոն, ինչպես նաև իսպանական հեղինակավոր Marca, Mundo Deportivo և AS պարբերականները։
