«Բարսելոնայի» գլխավոր մարզիչ Հանս-Դիտեր Ֆլիկը Չեմպիոնների լիգայի քառորդ եզրափակիչի՝ Մադրիդի «Ատլետիկոյի» դեմ կայանալիք առաջին հանդիպումից առաջ կիսվել է սպասելիքներով և պաշտպանել թիմի երիտասարդ աստղ Լամին Յամալին։
Գերմանացի մասնագետը նախ ընդգծել է մրցակցի ուժը, ապա անդրադարձել 18-ամյա իսպանացու պահվածքին: Լա լիգայի շրջանակում նույն «Ատլետիկոյի» դեմ կայացած նախորդ խաղից հետո Յամալը ցուցադրաբար անցել էր Ֆլիկի կողքով և ձեռքերի շարժումներով դժգոհություն հայտնել:
««Մադրիդի «Ատլետիկոն» շատ ուժեղ թիմ է։ Նրանք հիանալի տրամադրվածություն և ինտենսիվություն ունեն, ինչպես նաև ֆանտաստիկ ֆուտբոլիստներ։ Օրերս նրանց մի քանի խաղացողներ հանգստանում էին, բայց փոխարենը խաղադաշտ դուրս եկան բարձրակարգ այլ ֆուտբոլիստներ։ «Ատլետիկոյին» երկու գոլ խփելը հեշտ չէ։ Երկու հանդիպումներում էլ մեծ էմոցիաներ են լինելու։ Մենք կփորձենք վաղը լավ արդյունքի հասնել, բայց հասկանում ենք, որ դեռ պետք է խաղանք նաև Մադրիդում»,- գերմանացի մասնագետի խոսքերն է մեջբերում իսպանական AS պարբերականը։
Խոսելով մարտավարության և հնարավոր անակնկալների մասին՝ Ֆլիկը նշել է, որ թիմն ունի իր ուրույն խաղաոճը և պետք է հավատարիմ մնա դրան՝ ճնշում գործադրելով և ազատ տարածություններ գտնելով։ Նրա խոսքով՝ հատուկ անակնկալներ չեն պատրաստել, քանի որ ժամանակը տրամադրել են վերականգնմանն ու մարզումներին, և այժմ կարևոր է մարզումների ժամանակ արված աշխատանքը կիրառել խաղադաշտում։ Նա նաև շեշտել է, որ Չեմպիոնների լիգայի կիսաեզրափակիչ դուրս գալը թիմի գլխավոր նպատակն է:
Անդրադառնալով Յամալի զայրույթին՝ մարզիչը պաշտպանել է ֆուտբոլիստին. «Ես ամեն ինչ ասել եմ դեռ շաբաթ օրը։ Պետք է հասկանանք, որ Լամինը 18 տարեկան է, և նա անհավանական ֆուտբոլիստ է։ Եթե նորից դիտեք խաղը, կտեսնեք, թե ինչ զարմանալի բաներ է նա անում խաղադաշտում։ Նա շրջանցեց հինգ ֆուտբոլիստի և քիչ մնաց գրավեր դարպասը։ Նա հիասթափված հեռացավ խաղադաշտից. նա էմոցիոնալ է, ինչը լավ է։ Ես միշտ աջակցելու եմ նրան։ Մենք պետք է զգույշ լինենք, չէ՞ որ նրա ոչ բոլոր արարքներն են արվում պարզապես աղմուկ բարձրացնելու համար։ Ես ասել եմ նրան, որ ես միշտ պաշտպանելու եմ իրեն։ Նա հիանալի խաղացող է և ապագայում, հնարավոր է, լավագույնը դառնա»։
Թիմերի միջև Չեմպիոնների լիգայի քառորդ եզրափակիչի առաջին հանդիպումը կկայանա ապրիլի 8-ին Բարսելոնայում և կմեկնարկի Երևանի ժամանակով 23:00-ին:
