Ժոան Լապորտան կրկին հաղթանակ է տարել կատալոնական «Բարսելոնայի» նախագահական ընտրություններում՝ պահպանելով իր պաշտոնը: Այս մասին հայտնում է ակումբի մամուլի ծառայությունը։
Քվեարկությունը կայացել է մարտի 15-ին, իսկ վերջնական արդյունքներն ամփոփվել են լույս 16-ի գիշերը։ 63-ամյա Լապորտան հավաքել է ձայների 68,18 %-ը (32 934 քվե)՝ վստահորեն առաջ անցնելով իր միակ մրցակցից՝ Վիկտոր Ֆոնտից, որի օգտին քվեարկել է ընտրողների 29,78 %-ը (14 385): 53-ամյա Ֆոնտի համար սա երկրորդ պարտությունն էր Լապորտայից 2021 թվականի ընտրություններից հետո։
Մեկնաբանելով իր հաղթանակը՝ վերընտրված նախագահը շնորհակալություն է հայտնել ակումբի անդամներին վստահության համար.
«Երախտապարտ եմ այս հիանալի ակումբին, որտեղ անդամները դեռևս քվեարկում են նախագահի ընտրության համար. սա եզակի երևույթ է աշխարհում: Հատուկ շնորհակալություն բոլոր այն անդամներին, որոնք քվեարկեցին քաղաքացիական հպարտության և «Բարսայի» ոգու այս տոնին»,- Լապորտայի խոսքերն է մեջբերում Mundo Deportivo-ն։
Նա նաև նշել է, որ քվեարկության արդյունքները փաստում են ակումբի ներսում միասնության, այլ ոչ թե առճակատման ընտրության մասին։ Ըստ Լապորտայի՝ սա վստահության քվե է «Կամպ Նոուի» վերակառուցման և Espai Barca նախագծի ավարտին հասցնելու համար։
«Այս ապշեցուցիչ արդյունքը մեզ այնքան ուժ կտա, որ մեզ ոչինչ չի կանգնեցնի: Մենք կշարունակենք պաշտպանել «Բարսելոնան» հակառակ ամեն ինչի»,- հավելել է նախագահը:
Հիշեցնենք, որ Լապորտան «Բարսելոնան» ղեկավարում է 2021 թվականից: Նախկինում նա այդ պաշտոնը զբաղեցրել է նաև 2003-2010 թվականներին։ Այդ ժամանակահատվածներում նրա ղեկավարությամբ թիմը վեց անգամ դարձել է Իսպանիայի չեմպիոն, երեք անգամ նվաճել երկրի Գավաթը, երկու անգամ՝ Չեմպիոնների լիգայի գավաթը, ինչպես նաև մեկական անգամ հաղթել է ՈւԵՖԱ-ի Սուպերգավաթում և աշխարհի ակումբային առաջնությունում։
