Պորտուգալացի հանրահայտ ֆուտբոլիստ Լուիշ Նանին որոշել է վերսկսել մարզական կարիերան և պայմանագիր է կնքել ղազախական «Ակտոբեի» հետ։ Այս մասին պաշտոնապես հայտնել է ակումբի մամուլի ծառայությունը։
39-ամյա հարձակվողի պայմանագիրը նախատեսված է մինչև 2026 թվականի ավարտը։ Հիշեցնենք, որ Նանին կարիերան ավարտելու մասին հայտարարել էր 2025 թվականի դեկտեմբերին, իսկ նրա վերջին ակումբը պորտուգալական «Էշտրելան» էր։
Ըստ Sports.kz-ի տեղեկությունների՝ Նանին ոչ միայն կխաղա թիմում, այլև կստանձնի «Ակտոբեի»՝ միջազգային առաջխաղացման գծով մենեջերի պարտականությունները (խաղացող-մենեջեր): Աղբյուրը նշում է, որ պորտուգալացին կստանա Ղազախստանի առաջնության պատմության մեջ ռեկորդային աշխատավարձ՝ ամսական 70 հազար դոլար։
Մեկնաբանելով իր տեղափոխությունը՝ Նանին նշել է.
«Շատ ուրախ եմ միանալ «Ակտոբեին»: Անհամբեր սպասում եմ, թե երբ եմ կարողանալու իմ ներդրումն ունենալ ակումբի և ղազախական ֆուտբոլի զարգացման գործում: Շնորհակալ եմ ակումբի սեփականատեր Նուրլան Արտիկբաևին, նախագահ Արման Օսպանովին և նահանգապետ Ասխատ Շախարովին՝ հյուրընկալության և աջակցության համար: Ինձ շատ տպավորեց ակումբի ապագայի տեսլականը, և ես քրտնաջան կաշխատեմ, որպեսզի թիմը նոր բարձունքների հասնի թե՛ ներքին առաջնությունում, թե՛ միջազգային ասպարեզում»։
Հավելենք, որ իր հարուստ կարիերայի ընթացքում Նանին հանդես է եկել պորտուգալական «Սպորտինգում», անգլիական «Մանչեսթեր Յունայթեդում», իսպանական «Վալենսիայում» և այլ ակումբներում։ «Մանչեսթեր Յունայթեդի» կազմում պորտուգալացին դարձել է Չեմպիոնների լիգայի գավաթակիր։
