Վարշավայի «Լեգիայի» գլխավոր մարզիչ Ինյակի Աստիսը պատասխանել է լրագրողների հարցերին «Նոայի» դեմ կայանալիք հանդիպումից առաջ։
«Էլիտիմի և Նսամեի վնասվածքները բավականին լուրջ են։ Արթուր Յենջեյչիկը ամիսներ շարունակ պայքարում է ծնկի ցավերի դեմ, հաճախ մարզվել է ցավազրկողներով։ Գիտենք՝ որքան պինդ տղա է նա, բայց վերջին շրջանում վիճակը վատթարացել էր, ուստի մարզչական շտաբով որոշեցինք նրան հանգիստ տալ, որպեսզի պատրաստ լինի վերջին երկու հանդիպումներին։ Ռադովան Պանկովը աճուկի հետ կապված խնդիրներ ունի, ինչը հեշտ չէ բուժել․ ցավը պարբերաբար վերադառնում է։ Ռաշան թեև աշխատում է, բայց 100%-ով պատրաստ չէ, այդ պատճառով թիմի հետ չի մեկնել։ Իսկ Վայսհաուպտը հիվանդացել է գրիպով․ վերջին 2-3 օրը թիմի հետ չէր, ուստի մնացել է Վարշավայում։
Մեկ տարի առաջ «Նոայում» իրավիճակն այլ էր՝ այլ մարզիչ, չեմպիոնություն, Կոնֆերենցիաների լիգա։ Վերջին շրջանում նրանք նույնպես լավ մարզավիճակում չեն՝ հաղթել են վերջին տասը խաղից միայն մեկում։ Այնուամենայնիվ, սա ագրեսիվ թիմ է, որը լավ է պայքարում առանց գնդակի։ Ունեն որակյալ ֆուտբոլիստներ, որոնք կարող են եղանակ ստեղծել։ «Նոան» այն թիմն է, որն իրեն ավելի լավ է զգում գնդակով, քան առանց դրա։ Նրանք քիչ գոլ են բաց թողնում, և մենք պետք է պատրաստ լինենք դրան։
Սա լավագույն պահը չէ մեզ համար։ Ոչ ոք չէր ենթադրում, որ առանց հաղթանակների շարքը այսպիսի տեսք կունենա։ Ես անընդհատ այլընտրանքներ և գաղափարներ եմ փնտրում։ Գիտակցում ենք, որ բարդ իրավիճակում ենք, բայց ամենակարևորն այն է, որ պատասխանը տանք խաղադաշտում՝ մեր երկրպագուների և ակումբի համար։ Մենք պետք է ցույց տանք, որ միասնական ենք։ Յուրաքանչյուր խաղում պահեր ենք ստեղծում, ինչը դրական է, բայց պետք է կարողանանք դրանք եզրափակել։ Խաղի բոլոր ասպեկտներում պետք է գործենք որպես թիմ և օգնենք միմյանց։
Արդյունքը որոշում են մանրուքները։ «Պիաստի» դեմ վերջին խաղը գեղեցիկ չէր։ Նման պահերին պետք է լինել վճռական, կազմակերպված և մրցակցից ավելի լավը։ Ես մեծ աջակցություն եմ ստանում բոլորից՝ մարզչական շտաբից, ակումբի աշխատակիցներից, ֆուտբոլիստներից, սպորտային տնօրեններից մինչև նախագահ։ Բոլորս էլ շահագրգռված ենք դուրս գալ այս իրավիճակից։
Մրցաշրջանի սկզբում շատ խաղացողներ ստացան իրենց շանսը։ Վահան Բիչախչյանը մեկնարկեց հիմնական կազմում, հետո թեթև վնասվածք ստացավ և վերականգնվելու համար ժամանակ պահանջվեց։ Նրա՝ պահեստային մնալը զուտ տակտիկական որոշում էր։ Տեսնում եմ, որ մարզումներին նա բարձր մակարդակ է ցուցադրում։ Ամեն օր ապացուցում է, որ ուզում է օգնել թիմին և պատրաստ է։ Վահանը վնասվածքի պատճառով չմեկնեց հավաքական։ Մենք պետք է ճիշտ կառավարեինք նրա ծանրաբեռնվածությունը, որպեսզի վնասվածքը չբարդանա։ Մրցակցի մասին որոշակի տեղեկություններ հարցրել ենք նաև Վահանից։ Գիտենք, որ մրցակիցը լավագույն մարզավիճակում չէ, բայց անհատապես որակյալ խաղացողներ ունի։ Մենք շատ տեղեկություններ ունենք նրանց մասին, բայց ամենակարևորն այն է, թե մենք ինչպես կխաղանք։ Ես նախընտրում եմ կենտրոնանալ իմ թիմի վրա և այն բանի, թե ինչը կարող ենք ավելի լավ անել»,- նշել է մասնագետը։
Հիշեցնենք, որ «Նոա» — «Լեգիա» հանդիպումը կկայանա վաղը՝ դեկտեմբերի 11-ին, 21։45-ին։
