Երևանի «Ուրարտուն» կանգնած է եվրոպական մրցաշարերում աննախադեպ հաջողության հասնելու շեմին։ Կոնֆերենցիաների լիգայի 2025/26 մրցաշրջանի որակավորման առաջին փուլում «Ուրարտուն» կմրցի բելառուսական «Նեման Գրոդնոյի» հետ։ Հաղթանակի դեպքում հայկական ակումբը կարող է ուղիղ դուրս գալ մրցաշարի երրորդ որակավորման փուլ՝ շրջանցելով երկրորդը։
Այս հնարավորությունը ստեղծվել ՈւԵՖԱ-ի որոշման արդյունքում, որով որակազրկվել է սլովակյան «Դունայսկա Ստրեդա» ակումբը։ ՈւԵՖԱ-ի ֆինանսական վերահսկողության առաջին պալատը պարզել է, որ «Դունայսկա Ստրեդայի» և հունգարական «Դյոր» ակումբների նախագահ Օսկար Վիլագին խախտել է ՈւԵՖԱ-ի կանոնակարգի 5.01 հոդվածը, որն արգելում է մեկ անձի կողմից երկու մրցակից ակումբների միաժամանակյա կառավարումը։ Փաստաթղթերի ուսումնասիրությունը ցույց է տվել, որ 2025 թվականի մարտի 1-ի դրությամբ երկու ակումբներն էլ գտնվել են նույն ղեկավարի վերահսկողության ներքո։
Հաշվի առնելով, որ «Դունայսկա Ստրեդան» պետք է երկրորդ փուլում մրցեր «Նեման» – «Ուրարտու» զույգի հաղթողի հետ, ՈւԵՖԱ-ի որոշումը նշանակում է, որ այս զույգի հաղթողը ավտոմատ կերպով կանցնի երրորդ փուլ։ Քանի որ վիճակահանությունն արդեն կայացել է, և փոխարինող ակումբ նշանակել հնարավոր չէ, «Ուրարտուն» կամ «Նեմանը» կշարունակեն պայքարը։
Ռոբերտ Արզումանյանի գլխավորությամբ «Ուրարտուն» կարող է առաջին անգամ իր պատմության մեջ դուրս գալ Կոնֆերենցիաների լիգայի երրորդ որակավորման փուլ։ Առաջին հանդիպումը տեղի կունենա հուլիսի 10-ին Երևանում, իսկ պատասխան խաղը՝ հուլիսի 17-ին։
