Մադրիդի «Ռեալի» հարձակվող Կիլիան Մբապեն, ամենայն հավանականությամբ, չի մասնակցի Ակումբային աշխարհի առաջնության խմբային փուլին։ Ինչպես հայտնում է Cadena SER-ը, 26-ամյա ֆրանսիացին դեռ վերականգնվում է սուր գաստրոէնտերիտից, և ակումբը չի ցանկանում ռիսկի դիմել նրա առողջության հաշվին։
Հունիսի 19-ին Մբապեն հոսպիտալացվել էր աղիքային ինֆեկցիայի պատճառով, սակայն նույն օրը դուրս է գրվել։ Չնայած դրան, նա դեռ լիովին չի ապաքինվել։ Ըստ El Partidazo de COPE-ի, նա բաց կթողնի հունիսի 22-ի «Պաչուկայի» դեմ խաղը, իսկ փլեյ-օֆֆից առաջ վերադարձը քիչ հավանական է։
«Ռեալը», որն առաջին խաղում ոչ-ոքի (1:1) է խաղացել «Ալ-Հիլալի» հետ, դեռ կհանդիպի «Պաչուկային» (հունիսի 22) և «Ռեդ Բուլ Զալցբուրգին» (հունիսի 27)։ Ակումբը հայտնում է, որ Մբապեի վերադարձը հնարավոր է միայն փլեյ-օֆֆում՝ լիարժեք վերականգնումից հետո։
