Ռայան Ռեյնոլդսի «Ռեքսհեմը» բարձրացել է Չեմպիոնշիփ։ Լիգա 1-ի ավարտին մնացել է մեկ տուր, և ամերիկացի դերասանին պատկանող թիմն ապահովեց երկրորդ տեղը Անգլիայի երրորդ ուժեղագույն դիվիզիոնի աղյուսակում։
Այսպիսով, «Ռեքսհեմը» հաջորդ մրցաշրջանում հանդես կգա Չեմպիոնշիփում։
«Ռեքսհեմը» դարձել է պատմության մեջ առաջին թիմը, որը երեք անգամ անընդմեջ դուրս է եկել անգլիական ֆուտբոլի լավագույն հինգ դիվիզիոնների հաջորդ լիգա
2022/23 մրցաշրջանում թիմը բարձրացավ Լիգա 2 (չորրորդ ուժեղագույն դիվիզիոն), 2023/24 մրցաշրջանում՝ բարձրացավ Լիգա 1 և 2024/25 մրցաշրջանում՝ Չեմպիոնշիփ։
«Ծրագիրն այն է, որ 10 տարի հետո թիմը հանդես Պրեմիեր լիգայում: Եթե տեսականորեն դա հնարավոր է, ապա՝ ինչու ոչ։ Ոչ ոք այս աշխարհում երբևէ մեծ բան չի արել՝ մտածելով. «Մենք ուզում ենք անցնել ճանապարհի կեսը»: Մենք ուզում ենք գնալ մինչև վերջ։ Եվ մենք հավատում ենք, որ կարող ենք անել դա»-, ժամանակին ասել էր Ռեյնոլդսը։
Ուելսյան «Ռեքսհեմը» մեկն էր այն ակումբներից, ով տարիներ շարունակ հանդես է եկել կիսապրոֆեսիոնալ անգլիական դիվիզիոնում՝ իր հին մարզադաշտում հավաքելով ավելի քան 4000 երկրպագու, և գրեթե անհայտ էր երկրից դուրս: Խելահեղ գաղափարի արդյունքում՝ ակումբը գնեցին ամերիկացի դերասաններ Ռայան Ռեյնոլդսն ու Ռոբ Մաքելհենին՝ տարված լինելով թիմի մասին վավերագրական սերիալ նկարահանելու գաղափարով։ Ըստ ծրագրի՝ թիմը, հաղթահարելով դժվարությունները, բարձրանում է դիվիզիոնից դիվիզիոն։ Եվ «Ռեքսհեմը» դա արեց․ նախ 15 տարվա մեջ առաջին անգամ ակումբը լքեց սիրողական համարվող անգլիական ֆուտբոլի հինգերորդ դիվիզիոնը՝ բարձրանալով պրոֆեսիոնալ համարվող չորրորդ դիվիզիոն: Ու այդ ամենը երկու տարի անց այն բանից հետո, երբ ակումբի նոր սեփականատերերը եկան Ուելս՝ փոքր ակումբից համաշխարհային մեդիա նախագիծ կառուցելու համար: Իսկ հիմա ակումբն արդեն Չեմպիոնշիփում է։
Դե ինչ՝ «Ռեքսհեմի» հեքիաթը շարունակվում է։
