Իտալական «Միլանի» գլխավոր մարզիչ Պաուլո Ֆոնսեկան խոսել է Չեմպիոնների լիգայի ընդհանուր փուլի 4-րդ տուրում Մադրիդի «Ռեալի» հետ արտագնա խաղում (3:1) իր թիմի անսպասելի հաղթանակի մասին։
«Մենք հաղթեցինք մեր խաղացողների խիզախության շնորհիվ, ովքեր չէին վախենում խաղադաշտ դուրս գալ: Նախապես պատրաստվել էինք՝ պլանավորելով վերահսկել գնդակը։ Առաջին խաղակեսում կարողացանք կարևոր առավելություն ստանալ։ Չնայած երկրորդ խաղակեսում ավելի դժվարացավ, մենք միասին հաղթահարեցինք այն:
Հաղթանակին արժանի էինք ոչ միայն խփած երեք գոլերի, այլև խաղի որակի շնորհիվ։ Եվրոպական մրցումներում նախաձեռնության պահպանումն ու գնդակի նկատմամբ վերահսկողությունը շատ կարևոր է: Այսօր մենք ցույց տվեցինք, որ իտալական ակումբներն ունակ են ավելիին, քան պարզապես պաշտպանվել: Մեզ համար կարևոր է շարունակել ձգտել զարգացման»,- Ֆոնսեկայի խոսքը մեջբերում է լրագրող Ջանլուկա դի Մարցիոյի կայքը։
«Միլանը» չորս տուրից հետո վեց միավորով զբաղեցնում է Չեմպիոնների լիգայի մրցաշարային աղյուսակի 18-րդ հորիզոնականը: Մադրիդի «Ռեալը», որը նույնպես ունի վեց միավոր, 17-րդ տեղում է։
