Գործակալ Հեկտոր Պերիսը, որը ներկայացնում է «Բարսելոնայի» կենտրոնական կիսապաշտպան Պեդրիի շահերը, հանդիպում է ունեցել «Բլաուգրանայի» մարզական տնօրեն Դեկուի հետ, որտեղ քննարկվել է 21-ամյա ֆուտբոլիստի հետ պայմանագրի երկարաձգման հարցը։ Այս մասին հայտնում է Mundo Deportivo-ն։
Աղբյուրի փոխանցմամբ՝ այս հանդիպումն արդյունավետ է եղել, և երկուստեք ցանկություն է հայտնվել հետագա համագործակցության համար։ Սակայն այս պահին կատալոնական ակումբը չի կարող կոնկրետ առաջարկ անել Պեդրիին իր տնտեսական վիճակի պատճառով։
Այս մրցաշրջանում Պեդրին բոլոր մրցաշարերում մասնակցել է վեց հանդիպման, որոնցում դարձել է երկու գոլի հեղինակ։ Ֆուտբոլիստի ներկայիս աշխատանքային պայմանագիրն ակումբի հետ նախատեսված է մինչև 2026 թվականի ամառը: Transfermarkt պորտալում ներկայացված տեղեկատվության համաձայն՝ ֆուտբոլիստի շուկայական արժեքը կազմում է 80 միլիոն եվրո:
