Armsport-ը «Ֆուտբոլային Սկաուտ» շարքի շրջանակներում անդրադարձել է մի շարք առաջնությունների տաղանդավոր և հեռանկարային ֆուտբոլիստների։ Մեր շարքի ուշադրությունը սևեռում ենք թոփ-5 լիգաներին։
Մենք կանրադառնանք մեր հերոսներին արդեն նոր ձևաչափով․ ամեն շաբաթ մեր դիտակետում կհայտնվեն թոփ-5 լիգաների երկու ակումբների ֆուտբոլիստներ։ Այս անգամ մեր հորիզոնում են Բունդեսլիգայի երկու ակումբների՝ «Վերդերի» և «Այնտրախտի» ամենահեռանկարային ֆուտբոլիստները, որոնց շուտով հնարավոր է տեսնենք որևէ գրանդ ակումբի մարզաշապիկով։
Մարկո Ֆրիդլ
🇦🇹 Ավստրիա
«Վերդեր»
21 տարեկան
Ավստրիացի 21-ամյա ֆուտբոլիստը համարվում է բրեմենյան թիմի պաշտպանության հենասյուներից մեկը։ Մարկոն առաջին լիարժեք մրցաշրջանն է անցկացնում Բունդեսլիգայում․ նա երեք տարի առաջ է տեղափոխվել «Վերդեր» Մյունխենի «Բավարիայից», որի սանն էլ համարվում է ավստրիացին։ Գերմանական գրանդում նա չկարողացավ հաստատվել, սակայն Բրեմենում ստացավ իր հնարավորությունը և այժմ ոչ մեծ քայլերով, սակայն իր աշխատասիրության շնորհիվ՝ գրանցում է առաջընթաց, և շուտով մենք կտեսնենք նրան նաև Ավստրիայի հավաքականի հիմնական կազմում։
Անդրե Սիլվա
🇵🇹 Պորտուգալիա
«Այնտրախտ»
24 տարեկան
Ժամանակին Ռոնալդուն հենց Անդրեին էր տեսնում, որպես իր փոխարինող Պորտուգալիայի հավաքականում։ Այն ժամանակ դրա համար իսկապես կային նախադրյալներ․ «Պորտուի» կազմում անցկացրած հիանալի մրցաշրջանից հետո նա տեղափոխվեց «Միլան» և․․․ շարունակությունը ոչ մեկի համար գաղտնիք չէ․ ֆուտբոլիստը հայտնվեց միլանյան ակումբում, մեղմ ասած, ոչ ճիշտ ժամանակին։ Ինքը՝ ֆուտբոլիստը ևս չարդարացրեց իր վրա դրված հույսերը և այս մրցաշրջանից առաջ վարձավճարով տեղափոխվեց գերմանական ակումբ։ Այժմ «Այնտրախտի» համար ևս լավ ժամանակներ չեն Բունդեսլիգայում․ միգուցե թիմը պատրաստ չէր պայքարել երկու ֆրոնտում (Եվրոպա Լիգա և Բունդեսլիգա)։ Սակայն Սիլվան վերջերս սկսել է ավելի կայուն հանդես գալ, կատարել իր հիմնական պարտականությունը՝ գոլեր խփել։ Նա ընդամենը 24 տարեկան է, շատ ֆուտբոլիստների մոտ այս տարիքում դեռ նոր է սկսվում առաջընթացը, իսկ Սիլվան, ունենալով ահռելի պոտենցիալ, ճիշտ աշխատանքի և ինչու ոչ՝ ճիշտ թիմում հայտնվելով, դեռ կարող է արդարացնել Կրիշտիանուի հույսերը․․․
Ջոշուա Սարջենտ
🇺🇸 ԱՄՆ
«Վերդեր»
20 տարեկան
Ջոշուան կամ պարզպես՝ Ջոշը (հաճախ ֆուտբոլիստին այդպես են անվանում), ֆուտբոլային ընտանիքից է․ նրա և՛ հայրը, և՛ մայրը ժամանակին զբաղվել են ֆուտբոլով և խաղացել են ԱՄՆ-ի ուսանողական լիգայում։ Երկու տարի առաջ ամերիկացի ֆուտբոլիստը տեղափոխվեց Հին աշխարհ և սկսեց հանդես գալ «Վերդերի» երկրորդ թիմում։ Նրանից երկար ժամանակ չպահանջվեց՝ ապացուցելու համար իր բարձր կարգը, և նրան ընգրկեցին թիմի հիմնական կազմում։ Այս մրցաշրջանում հարձակվողն արդեն 18 հանդիպում է անցկացրել Բունդեսլիգայում՝ աչքի ընկնելով 3 գոլով։ Սարջենտը ԱՄՆ-ի հավաքականի կազմում անցկացրել է 12 հանդիպում և խփել 5 գոլ․․․ և դա դեռ 20 տարեկան հասակում։
Դաիչի Կամադա
🇯🇵 Ճապոնիա
«Այնտրախտ»
23 տարեկան
Ճապոնացի այս ֆուտբոլիստին «Այնտրախտը» գնել էր 2,5 տարի առաջ, բայց Դաիչին այդպես էլ չկարողացավ միանգամից փայլել Բունդեսլիգայում։ Սակայն անցած մրցաշրջանում «Սենթ Տրյուդենում», որտեղ հանդես էր գալիս վարձավճարով, հարձակվողական ոճի կիսապաշտպանը փայլուն ֆուտբոլ ցուցադրեց. նա խփեց 16 գոլ, կատարեց 9 գոլային փոխանցում: Չնայած ընթացիկ մրցաշրջանը «Այնտրախտի» համար չի ընթանում այնպես, ինչպես նախորդն էր, սակայն Կամադայի ցուցադրած ֆուտբոլը հույս է ներշնչում, որ գերմանական ակումբում ամեն ինչ այդքան էլ վատ չէ: Հատկապես տպավորիչ են նրա ելույթները Եվրոպա լիգայում․ հիշենք թեկուզ նրա հեթ-տրիկը «ՌԲ Լայպցիգի» հետ խաղում․․․ Ուշադիր հետևեք այս տղային, նա դեռ կասի իր խոսքը համաշխարհային ֆուտբոլում։
Միլոտ Ռաշիցա
🇽🇰 Կոսովո
«Վերդեր»
23 տարեկան
Իսկ ահա Ռաշիցան արդեն երկրորդ մրցաշարջանն է, ինչ համարվում է «բրեմենյան երաժիշտների» առաջատարը։ Թիմի դիրիժորը, ով աչքի է ընկանում բավականին հասուն և գրագետ խաղով, ունի լավ տեխնիկա, արագություն․․․ նրանով արդեն իսկ հետաքրքրվում են ԱՊԼ-ի մի շարք ակումբներ, սակայն նրա համար պայքարում ներկա դրությամբ ֆավորիտը համարվում է դորտմունդյան գրանդը․ «Բորուսիան» դիտարկում է Կոսովոյի հավաքականի կիսապաշտպանին, որպես Ջեյդոն Սանչոյին փոխարինող, ով ամռանը կարող է լքել ակումբը։
Վար Բաբայան
Շարքի նախորդ մասերը
Էրեդիվիզիի ամենահեռանկարային ֆուտբոլիստները (Մաս 3)
Էրեդիվիզիի ամենահեռանկարային ֆուտբոլիստները (Մաս 2)
Էրեդիվիզիի ամենահեռանկարային ֆուտբոլիստները (Մաս 1)
Պորտուգալիան՝ ցատկահարթակ դեպի մեծ ֆուտբոլ
Բելգիան շարունակում է մնալ ապագա աստղերի դարբնոց (Մաս 2)
Բելգիան շարունակում է մնալ ապագա աստղերի դարբնոց (Մաս 1)
Սամուրայների նոր սերունդը Եվրոպայում
Բրազիլիայի առաջնության ամենահեռանկարային ֆուտբոլիստները (Մաս 2)
Բրազիլիայի առաջնության ամենահեռանկարային ֆուտբոլիստները (Մաս 1)
MLS-ի 7 ֆուտբոլիստներ, ովքեր կարող են փայլել Հին աշխարհում
