ՀՖՖ գրասենյակում սկսվել է ՀՖՖ 23-րդ հերթական ժողովը, որի օրակարգային հարցերից մեկը ՀՖՖ Գործադիր կոմիտեի անդամների ընտրությունն է:
Հավաքականի մարզչի ընտրության մասին խոսելուց հետո Մելիքբեկյանն անդրադարձավ ՀՖՖ ռազմավարությանն ու այդ աշխատանքներին.
«Իմ նախագահության 3 տարիներին ես ու իմ թիմը փորձում ենք ավելի շատ աշխատել, քան խոսել: Գրեթե բոլոր անդամների հետ մենք քննարկումներ ենք ունենում, ինչի արդյունքում ստեղծվում են նախագծեր, ու ես կարծում եմ, որ մեր անդամներից շատերն էլ փորձում են գործել, ոչ թե խոսել: Որպեսզի իմ ասածները լոկ խոսքեր չլինեն, նշեմ մի շարք կետեր, քանի որ հնարավոր չէ բոլորին անդրադառնալ: Մինչև 2025 թվականը կազմակերպված մանկապատանեկան ֆուտբոլում ունենք նպատակ երեխաների թիվը հասցնել 10.000-ի: Այս պահին ունենք 8 հազար:
Ենթակառուցվածքների մասին շատ ենք խոսում: Մինչև 2025-ը պետք է ավելացնենք միջազգային մարզադաշտերի քանակը՝ հասցնելով 8-ի: Այս պահին ավարտում ենք Շենգավիթի մարզադաշտի լուսավորությունը: Ի դեպ, Շենգավիթի մարզադաշտը մասնավոր ներդրման փայլուն օրինակ է:
Կետերից մեկն այն է, որ պետք է շարունակենք մարզերում դպրոցների ստեղծումը: Գալիք տարում կսկսենք 4 նոր դպրոցի կառուցում: Ծրագիրն աննախադեպ է: Ակադեմիաներից 3-ը կառուցվելու են մարզերում: Ես կարծում եմ, որ սա ևս մի օրինակ է, որ մենք գործում ենք, ոչ թե խոսում:
Այս օրինակները կարող ենք շարունակել: Մենք դեռ աշխատում ենք, որպեսզի հասնենք մեր նպատակներին: մինչև 2025-ը մենք պետք է ավելացնենք մասսայական ֆուտբոլի մեջ ներգրավված մարդկանց թիվը: Մեր տվյալներով այժմ 40 հազար է մոտավորապես: Այս առումով մենք կարևորում ենք ենթակառուցվածքների զարգացումը, այդ թվում՝ դպրոցական առաջնության խաղերը: Գալիք երկու տարում կտրուկ կավելացնենք մեր աշխատանքները: Դպրոցական առաջնությունը մեզ մոտ վերականգնվել է ու լայն թափ է ստանում: Այս ամենը մեզ կօգնի մոտենալ այն թվին, որը նախանշել ենք ռազմավարության մեջ:
Տարբեր նախագծեր ենք արել: Արդեն ունենք մեկ սիրողական առաջնություն, մյուս տարի կունենանք 2-րդը: Այս ամենն արվել է 2020-ից հետո ՝ Քովիդի ու աշխարհում անկայուն վիճակ լինելու պայմաններում, բայց դա մեզ չի խանգարել հաստատուն քայլերով անել մեր գործը:
Շնորհակալություն եմ հայտնում բոլոր նրանց, ովքեր աշխատում են, ոչ թե խոսում: Գալիք կարևոր տարում ցանկանում եմ բոլորին բեղմնավոր աշխատանք, քանի որ մեր նպատակները շատ հստակ են: Բոլորին հաջողություն եմ մաղթում, շնորհակալություն հաջողության համար»,-ասաց Մելիքբեկյանը:
Հիշեցնենք, որ ՀՖՖ անդամների կողմից առաջադրվել է ՀՖՖ Գործադիր կոմիտեի անդամի 15 թեկնածու, որոնցից 14-ի թեկնածությունը հաստատվել:
