Մեկամյա դադարից հետո «Վեստ Արմենիա» ֆուտբոլային ակումբը վերսկսեց իր ելույթները Առաջին խմբի առաջնությունում: Թիմի նորամուտը Հայաստանի առաջնությունում եղավ 2019 թվականին, սակայն այդ մրցաշրջանը մնաց անավարտ՝ կապված Առաջին խմբի մի շարք թիմերի կողմից պայմանավորված խաղեր անցկացնելով: 2020/21 մրցաշրջանում «Վեստ Արմենիան» զբաղեցրեց 4-րդ տեղը՝ իրենից առաջ թողնելով «Սևանին», ԲԿՄԱ-ին ու «Նորավանքին», իսկ նախորդ առաջնությանը չմասնակցեց:
Մոտ երկու ամիս առաջ ակումբը հայտարարեց, որ վերսկսում է ելույթներն Առաջին խմբի առաջնությունում: Ավելի ուշ հայտնի դարձավ, որ թիմը գլխավորելու է Գագիկ Սիմոնյանը.
«Ակումբի նախագահի հետ հանդիպեցինք, ծանոթացա ծրագրերին, այն էր՝ ստեղծել մարտունակ թիմ, գրավել առաջին տեղն ու Պրեմիեր լիգայի ուղեգիր ձեռք բերել: Համաձայնեցի ու որոշեցի երկար դադարից հետո վերադառնալ ֆուտբոլ: Երկար չեմ մտածել ու միանգամից ընդունել եմ առաջարկը, քանի որ ինձ աշխատանք էր հարկավոր ու ցանկանում էի լինել ֆուտբոլում: Նպատակ միշտ էլ եղել է, որ վերադառնամ ֆուտբոլ, որոշ հանգամանքների պատճառով ձգձգվեց»,- ArmSport- հետ զրույցում ասաց Սիմոնյանը:
«2.5 տարի դատավարությունը գնացել է, բայց դատ չի եղել: Ես 6 ամիս եմ եղել անազատության մեջ: Իմ իրավաբանն ու ֆեդերացիայի իրավաբանը հանդիպեցին ու որոշեցին, որ եթե գործը կարճվի, ուրեմն ինձ ֆեդերացիան կարդարացնի: Ես հանդիպեցի Արթուր Վանեցյանի հետ, երբ նա ԱԱԾ պետ ու ՀՖՖ նախագահ էր: Նրան ասացի, որ ամբողջ գործերը ձեր ձեռքի տակ են, և եթե նույնիսկ մի փոքր կասկած կարող եք գտնել, կստորագրեմ ու իմ պատիժը կկրեմ: Բայց ես կապ չունեի ոչ մի բանի հետ, դրա համար էլ արդարությունը վերականգնվեց»,-վերհիշում է Սիմոնյանը:
Գագիկ Սիմոնյանը հիմա նպատակ ունի «Վեստ Արմենիային» դուրս բերել Պրեմիեր լիգա ու մարտունակ թիմ ստեղծել: Թե ինչ կլինի հետո, ասում է՝ դա իր ձեռքում չէ:
«Վեստ Արմենիայի» սեփականատեր Անդրանիկ Մարտիրոսյանը նշում է, որ նախորդ տարի ակումբը ֆինանսական խնդիրների պատճառով դադարեցրեց ելույթները, բայց հիմա ամեն ինչ շտկվել է.
«Նախ պետք է նշեմ, որ առաջնությունից հեռանալը գոնե ինձ համար եղել է մի քայլ, որն այդ պահին կատարել եմ ստիպված, բայց միևնույն ժամանակ գիտակցում էի, որ այդ քայլը ժամանակավոր բնույթ է կրելու: Պարզապես կորոնավիրուսի ժամանակ առաջացան ֆինանսական խնդիրներ, և խաղային տարվա ավարտից հետո որոշում կայացրեցի ժամանակավորապես դադարեցնել ելույթներն Առաջին խմբում: Հիմա արդեն լուծվել են այդ խնդիրներն, ու ես մեծ ոգևորությամբ գնում եմ իմ երազանքի հետևից»,-ասում է ակումբի սեփականատերը:
Նրա խոսքով ակումբ հիմնելուց նախ պետք է ունենալ հստակ նպատակներ, որպես ակումբի սեփականատեր ինքդ քո առջև դրված խնդիրներ ու հստակ տեսլական: Մեզ հետ զրույցում Անդրանիկ Մարտիրոսյանը խոսեց նաև այս ընթացքում հայկական ֆուտբոլի շուրջ իր մտորումների մասին.
«Այդ միջանկյալ ժամանակահատվածն իրականում շատ պատեհ առիթ էր մանրամասն խորհելու, սխալները շտկելու և ապագային միտված նպատակներին նորովի մոտենալու համար: Իսկ ինչ վերաբերվում է հայկական ֆուտբոլին, կարող եմ ասել, որ հայկական ֆուտբոլը դինամիկ զարգանում է, թեպետ իմ կարծիքով այստեղ ևս պահանջվում է անդադար հետևողական աշխատանք»,-ասում է ակումբի սեփականատերը:
51-ամյա մարզիչ Սիմոնյանի կարծիքով հայկական ֆուտբոլի գլխավոր խնդիրը մանկապատանեկան ֆուտբոլն է․
«Հայ ֆուտբոլիստները դառնում են 17-18 տարեկան, բայց փոխանցում կատարելու որակ նույնիսկ չունեն: Ես չեմ ուզում ինչ-որ մեկին վիրավորել, բայց մարզիչներ կան, որ ֆուտբոլի չեն հաճախել, բայց մարզիչ են աշխատում մանկապատանեկան ֆուտբոլում: Մարզիչները պետք է լինեն տեխնիկապես զարգացած, որպեսզի կարողանան փոխանցում ու կասեցում կատարել սովորեցնել: Դա ֆուտբոլի հիմքն է, որ կարողանաս դրա վրա տակտիկա կառուցել: Մատների վրա կարելի է հաշվել համապատասխան մարզիչներին: Նրանք մեղք չունեն, իրենց կրթողներն են մեղավոր: Էլի եմ կրկնում, ֆուտբոլի զարգացման համար ամենակարևորը մարզիչն է, որը պետք է կարողանա այբուբենը սովորեցնի: Եթե դա չեղավ, մեր ներկայիս վիճակն է լինելու միշտ»։
Վերադառնալով ակումբի թեմաներին՝ Անդրանիկ Մարտիրոսյանը նշում է, որ ցանկանում է «Վեստ Արմենիան» լինի Հայաստանում ուժեղագույն ակումբներից մեկը՝ խթանելով հայկական ֆուտբոլի զարգացմանը, ինչպես նաև մրցունակ լինի միջազգային հարթակներում: Նրա խոսքով, նպատակները ակումբի հետ կապված չեն փոխվել, բայց փոքր ինչ փոխվել են մոտեցումները:
«Կարծում եմ մեզ հաջողվել է հավաքել բավականին մրցունակ թիմ, պրոֆեսիոնալ թե՛ ֆուտբոլիստներ, թե՛ մարզչական շտաբ: Ես լավատես եմ, ես հավատում եմ մեր թիմի հաջող մրցելույթներին»-ասում է Մարտիրոսյանը:
Գագիկ Սիմոնյանը մանրամասնում է, որ թիմի կազմն ընտրելուց հնարավորություն են տվել շուրջ 100-120 հոգու ու նրանց միջից ընտրել մի քանիսին։
«Փոխել ենք թիմի ամբողջ կազմը: Ով դիմել է մեզ՝ բոլորին հնարավորություն ենք տվել: Մեզ մոտ տղաներ կան, որ Առաջին խմբում խաղալու համար մեծ են, իսկ Պրեմիեր լիգայում տեղ չունեն: Մենք այդ տղաներին նորից շունչ ենք տվել ֆուտբոլում լինելու: Մեր նպատակը ընդհանուր առաջնությունում լավ հանդես գալն է, բայց լավ հասկանում ենք, որ առաջին խաղերը դժվար են լինելու: Ֆուտբոլիստ կա 6 կամ 8 ամիս բաց է թողել, այդ պատճառով դիմացկունության խնդիր կա»,-ասում է Սիմոնյանը:
Թիմի առաջ հստակ խնդիր կա՝ դառնալ Առաջին խմբի առաջնության հաղթող և դուրս գալ Պրեմիեր լիգա: Ակումբը դեռ չի ավարտել սելեկցիան: Առաջիկայում կլինեն նոր համալրումներ:
«Հիմնական շեշտը դրել ենք տեղացիների վրա: Մենք ցանկացանք մաղել մեր տրամադրության տակ եղած ֆուտբոլիստներին ու տեսնել, թե ինչ կմնա արդյունքում: Հիմա տեսնում եք՝ ինչ ստացանք: Առաջնության առաջին խաղը ցույց տվեց, որ ֆուտբոլում մանրուքներ չկան, ու եթե պատրաստ չես՝ չես կարող խաղալ: Մեզ չբավականացրեց դիմացկունությունը, ուժը, համագործակցությունը: Բայց մենք չենք հիասթափվում, քանի որ մեր նպատակները երկար են ու մենք գիտենք, որ մեկ ամիս հետո թիմն ավելի մարտունակ կդառնա»,-նշում է Սիմոնյանը:
