ՀԲՖ գլխավոր քարտուղար Արթուր Նազարյանը և Հայաստանի ազգային հավաքականի խաղացող Ալբերտ Թադևոսյանը հրավիրված մամուլի ասուլիսում ամփոփել են Եվրոպայի փոքր երկրների առաջնությունը, որտեղ մեր ընտրանին հաղթող ճանաչվեց։
«Հայաստանի հավաքականը Ռեքս Կալամյանի գլխավորությամբ բավականին լավ էր պատրաստվել փոքր երկրների Եվրոպայի առաջնությանը: Մինչև Մալթա մեկնելը Երևանում տեղի ունեցավ SADA cup միջազգային մրցաշարը, ինչը ցույց տվեց, որ Հայաստանի հավաքականը պատրաստ է լավ արդյունքներ գրանցելու: Կարող եմ ասել՝ Մալթայում գրանցած արդյունքը տրամաբանական էր ու սպասելի: Ռեքս Կալամյանը խնդիր էր դրել հաղթել բոլոր խաղերում, և դա ստացվեց Մալթայում:
Ցանկություն կա խաղալ Եվրոպայի, աշխարհի առաջնությունների ընտրական փուլերում, բայց նաեւ պետք է ճիշտ գնահատենք մեր ուժերը և հնարավորությունները: Դա միայն Հայաստանի բասկետբոլի ֆեդերացիայից չէ կախված: Ազգային հավաքականները հիմնականում պետական աջակցությամբ են հանդես գալիս, եթե այդ աջակցությունը լինի, ապա ապագայում մեր ներուժը ներում է խաղալ ընտրական փուլերում, բայց այս պահին մեր տեղը դեռ փոքր երկրներում է: Անշուշտ, մենք ուզում ենք խաղալ ընտրական փուլերում և այդ ուղղությամբ ընթանում են աշխատանքներ:
2016 թվականին Եվրոպայի փոքր երկրների առաջնությունում հաղթանակի ամենամեծ ձեռքբերումն այն էր, որ երկարատև դադարից հետո վերականգնվեց Հայաստանի առաջնությունը, կանոնավոր առաջնություն ձեւավորվեց: Շատ ուրախալի էր, որ այս տարի տեղական ակումբների ներկայացուցիչները հավաքականի գրեթե կեսն էին կազմում: Փորձը ցույց տվեց, որ առանց Հայաստանի առաջնության եւ կանոնավոր առաջնության հնարավոր չէ կայուն արդյունքներ ունենալ»,- ասել է Արթուր Նազարյանը:
Հայաստանի ազգային հավաքականի խաղացող Ալբերտ Թադևոսյանի խոսքով՝ ինքն անչափ ուրախ է փոքր երկրների Եվրոպայի առաջնության չեմպիոն դառնալու կապակցությամբ:
«Մինչև փոքր երկրների Եվրոպայի առաջնությունը, մեր թիմը այդքան էլ երկար ժամանակ չուներ նախապատրաստական աշխատանքների համար: Ընդամենը մի քանի շաբաթ ունեինք: Այդ կարճ ժամանակահատվածում մարզիչը մեզ պետք է շատ տեղեկատվություն փոխանցեր և տարբեր սխեմաներ բացատրեր:
Մարզիչ Քալամյանն այդ խնդիրը հիանալի կատարեց, նրա օգնականներն էլ, մասնավորապես մարզիչ Փիթը մեծ ծավալի աշխատանք կատարեցին: Մարզումները շատ հագեցած էին լինում, երբեմն թվում էր, որ մարզիչներն ավելի շատ են հոգնում, քան խաղացողները: Օրեցօր աճ էինք գրանցում, ինչը նկատվում էր:
Ինձ համար շատ կարևոր էր այս տարվա առաջնությունը, քանի որ հինգ տարի առաջ Հայաստանն Անդորրայում արդեն հաղթել էր փոքր երկրների առաջնությունում, որին ես չմասնակցեցի վնասվածքի պատճառով: Ուրախ էի տղաների համար, բայց ցավալի էր, որ իմ մասնակցությունը չունեցա այդ հաջողությանը: Այս տարի ստացվեց, ինչի համար անսահման երջանիկ եմ»,- ասաց Ալբերտ Թադևոսյանը:
Հիշեցնենք, որ Հայաստանի ազգային հավաքականը փոքր երկրների Եվրոպայի առաջնության հաղթող էր ճանաչվել՝ մրցաշարի եզրափակչում 84-68 հաշվով հաղթելով Մալթայի հավաքականին։
Մինչև այդ Հայաստանն առավելության էր հասել Ջիբրալթարի, Սան Մարինոյի և Անդորրայի հետ կայացած խաղերում:
