ՀՖՖ նախագահ Արմեն Մելիքբեկյանն այսօր կայացած ասուլիսի ընթացքում խոսել է «» «Սևան» և «Հայասա» ակումբների հայտարարության մասին․
«Գլոբալ անդրադառնանք այս հարցին։ «Հայասայից» մենք պաշտոնական գրություն չենք ստացել և հուսով ենք, որ Հայասան» կխաղա՝ դա մեզ համար շատ կարևոր է։ Իրենց հայտարարությունում կային էպիզոդներ, որոնք չէին համապատասխայում իրականությանը։ Սա մի կողմ։ «Հայասայի» հետ ես խնդիրներ չեմ տեսնում, կխոսենք՝ կհասկանանք, իսկ մնացածի մասին կխոսեմ գլոբալ, քանի որ կան մեծ մանիպուլիացիաներ։
Ինչ է իրականում տեղի ունենում: Դիտարկենք այդ երեք ակումբները, որոնք դուրս են եկել առաջնությունից:
«Գանձասար-Կապան» Երևանի թիմն է դուրս մնացել նախորդ տարի, հետո եղել է «Լոռին» ու «Սևանը»։ Այս թիմերից միայն «Լոռին» է եղել մարզային թիմ: Շատ պարադոսքալ երևույթ կա այստեղ: ՀՖՖ-ն չի փորձում ամեն ինչ նախապես ասել դեպքերից հետո, քանի որ հարգում է անմեղության կանխավարկածը։ Այսինքն, մենք չենք հայտարարում ինչ-որ բաներ, որպեսզի ճնշում չգործադրենք կարգապահական կոմիտեի վրա: Դա անկախ մարմին է:
Անցած տարի՝ պատերազմի ժամանակ «Գանձասարի» մասնակցությամբ միջադեպ եղավ, դրանից հետո ակումբը հայտարարեց, որ փակում են թիմն ու այդ գումարը տալիս բանակին։ Պատերազմն ավարտվեց մի քանի օր անց: Իմ տեղեկություններով մինչև հունվար ակումբի անձնակազմը ստացել է աշխատավարձերը, թիմը փակվեց, մենք չիմացանք ու չենք էլ կարող իմանալ՝ այդ գումարները փոխանցվեցի՞ն բանակին, թե ոչ:
Իսկ իրականում պատճառն այն էր, որ հարվածել էին գլխավոր մրցավարին ու ակումբին սպասվում էր երկարատև որակազրկում: Այդ պրոցեսները մեզ մոտ միանգամից չի արվում, կարգապահական կոմիտեն երկար աշխատանք է տանում, ստացվեց այնպես, որ մենք չխոսեցինք ու «Գանձասարը» դուրս եկավ։ Գուցե պատահականություն է, չնայած չեմ կարծում, բայց այդպիսի բաները միշտ լինում է հավաքականի խաղերից առաջ։
Նույնը եղավ նաև «Լոռի» ակումբի հետ: Մենք հետագայում ՖԻՖԱ-ից նամակներ ստացանք, մոտավորապես 450 հազար եվրոյի չափով ֆուտբոլիստներին պարտք կա, ու իմ կարծիքով ակումբի փակվելու ռեալ պատճառը դա էր։ Նույնը շարունակվեց «Սևան» ակումբի պարագայում: Հայտարարություն եղավ հավաքականի խաղերից առաջ: Այս իրավիճակի շիկացումը կատարվում է հավաքականի խաղերից առաջ ու տպավորություն է, որ հավաքականը պատկանում է ֆեդերացիային, ոչ թե բոլորիս։ «Սևան» ակումբի հայտարարությունը մեծ մանիպուլյացիա էր, քանի որ մինչև դա՝ «Նոա-«Սևան» խաղից հետո, «Սևանի» ղեկավարները ծեծի են ենթարկել մրցավարին ու բոլոր ապացույցները կան: Նրանք գիտեին, որ մեծ որակազրկումներ է ապասվում։ «Սևանը» նախահարձակ եղավ, հայտարարեց միջադեպի մասին, բայց չխոսեց բուն եղելության մասին։ Այս արատավոր երևույթները պետք է ավարտին հասցվեն:
Մենք գնալու ենք ցիվիլ աշխատանքի ճանապարհով։ Եթե մարդիկ ծեծի են ենթարկում մրցավարին, դա անթույլատրելի է, և ամենահեշտը այն է, որ դա պատճառաբանեն որպես տարաձայնություն ՀՖՖ-ի հետ: Բոլորը մանիպուլյացիաներ են ու ամպագոռգոռ հայտարարություններ՝ ուրիշ ոչինչ չկա»,-ասաց Մելիքբեկյանը։
