ՀՊԼ-ի՝ 15-րդ տուրից հետաձգված խաղում «Ուրարտուն» սեփական հարկի տակ 2-0 հաշվով առավելության է հասել«Արարատի» նկատմամբ։ Հաղթանակից հետո խաղի մասին իր կարծիքով կիսվել է Տիգրան Եսայանը․
«Շնորհավորում եմ տղաներին հաղթանակի կապակցությամբ։ Կարծում եմ, որ շատ լավ խաղ անցկացրինք, այն պետք է որ դուր գար երկրպագուներին։ Խաղի մեկնարկից մինչև ավարտ մենք խաղում էինք բարձր կարգապահությամբ ու կենտրոնացվածությամբ։ Ամենակարևորը տակտիկապես գրագետ խաղացինք։
Երկրորդ կեսում «Արարատը» մեծացրեց ճնշումը, ստիպեց որ հետ քաշվենք, մենք սկսեցինք ավելի շատ գործել հակագրոհներով։ Երկրորդ կեսում կարողացանք լավ հակագրոհներ կազմակերպել, կարող էինք ավելի շատ գոլ խփել, ինչևէ․․․
Շնորհավորում եմ տղաներին լավ խաղի ու աշխատանքի համար։ Առաջիկայում էլ ունենք շատ կարևոր խաղ, որը եզրափակիչ է մեզ համար։ Պետք է պատրաստվենք այդ խաղին»,,- Եսայանի խոսքերն է փոխանցում երևանյան ակումբի պաշտոնական կայքը։
Այս առաջնությունում «Ուրարտուին» մնաց անցկացնելու ևս մեկ խաղ։ Սեփական հարկի տակ, բայց հյուր թիմի կարգավիճակով «Ուրարտուն» կխաղա «Փյունիկի» հետ։ Այդ հանդիպումը կկայանա «Ուրարտու» մարզադշտում մայիսի 28-ին և կմեկնարկի ժամը 16։45-ին։
