«Իհարկե շատ անսպասելի էր Սուպերլիգայի մասին հայտարարությունը, չնայած մինչև այդ էլ շատ խոսակցություններ կային, որ մեծ ակումբները ցանկանում են առանձնանալ ու իրենց առաջնությունն ունենալ»,-այս մասին ArmSport-ի հետ զրույցում ասաց Հայաստանի հավաքականի նախկին հարձակվող Լևոն Պաչաջյանը:
Հիշեցնենք, որ օրեր առաջ եվրոպական թոփ-ակումբները հայտարարեցին Սուպերլիգայի ստեղծման մասին, որը, կարծես թե ամպրոպ էր՝ պարզ երկնքում: 12 ակումբների պաշտոնական հայտարարությունից հետո ֆուտբոլային աշխարհում իսկական բում առաջացավ: ՈւԵՖԱ-ն հանդես եկավ կոշտ հայտարարություններով՝ հայտնելով, որ Սուպերլիգային մասնակցող թիմերը կզրկվեն ազգային առաջնություներում հանդես գալուց, իսկ ֆուտբոլիստները՝ հավաքականում խաղալուց: Սուպերլիգայի ակումբները զերծ չմնացին նաև ֆուտբոլային աշխարհի ներկայացուցիչների, ինչպես նաև ֆանատների մեծ քննադատությունից: Ի վերջո, երեկ հայտնի դարձավ, որ Սուպերլիգան, այնուամենայնիվ, չի կայանա:
«Ակումբները ստեղծում են Սուպերլիգա, այսքան բյուջե ունեն և այլն, ու այդ նորությունն իրենք հայտնում են կեսգիշերին: Այդ ամենը ուղղակի արժեզրկեց իրենց արածը, երկրորդն էլ տեսաք, թե ինչ արձագանք ունեցավ դա թե՛ երկրպագուների, թե՛ մասնագետների և թե՛ ՈւԵՖԱ-ի ու ՖԻՖԱ-ի կողմից»,-նշեց Պաչաջյանը:
Հայ ֆուտբոլիստի կարծիքով Սուպերլիգայի հիմնադիր ակումբների գլխավոր նպատակը մեծ գումարներ վաստակելն է.
«Ես էլ, ինչպես շատերը, միանշանակ դեմ էի այդ երևույթին, որովհետև կարծում եմ՝ դա միտված է միայն կոմերցիոն հարցեր լուծելուն, և այն ակումբները, որոնք դա կազմակերպել էին, զուտ ուզում էին մեծ գումարներ վաստակել, ու այդտեղ սպորտային ոչ մի հետաքրքրություն չէր կարող լինել: Ես դեմ չեմ՝ ՈւԵՖԱ-ում և եվրոպական ֆուտբոլում խնդիրներ կան, կոռուպցիաներ կան, ակումբներն են դժգոհում, որ գումարներ քիչ են վաստակում, հատկապես կորոնավիրուսի պայմաններում բավականին ֆինանսական խնդիրներ են առաջ եկել, բայց այսպիսի ձևով շանտաժի ենթարկել ու ցանկանալ ինչ-որ հարց լուծել, սա ուղղակի անթույլատրելի էր»,-ասաց Պաչաջյանն ու ավելացրեց. «Արձագանքը եղավ այն, որ հազարավոր ֆաներ, հատկապես Անգլիայում, որտեղ ֆուտբոլային մեծ ավանդույթներ կան, բացասաբար արձագանքեցին: Մինչև ՖԻՖԱ նեգատիվ արձագանքներ եղան այս ամենին: Նախ առաջինը՝ այդ կազմակերպիչները խայտառակ եղան, ու սա ցույց տվեց ևս մեկ անգամ, որ համաշխարհային ֆուտբոլային ընտանիքը՝ չնայած շատ խնդիրների, միևնույն է միասին է և թույլ չի տա՝ նման VIP ակումբներ ձևավորվեն և ինչ-որ ֆինանսական հարցեր լուծեն: Անպես որ ուրախ եմ, որ այս ամենը շատ արագ չեղարկվեց»,-նշեց Պաչաջյանը:
Նրա խոսքով Սուպերլիգայի տապալումը պատճառ կդառնա, որ հետագայում նման դեպքեր չկրկնվեն. «Հենց առաջին օրվանից, երբ իմացա այդ ծրագրի մասին, նշել եմ շատ տեղերում, որ շատ կարճ կյանք է ունենալու ու միտված է ներսում ֆինանսական հարցեր լուծելուն: Ինչպես տեսանք, դրա արդյունքում երևի թե ՈՒԵՖԱ-ն էլ մի փոքր զիջումների գնաց ու խոսակցություններ կան, որ ՉԼ բյուջեն արդեն հասնելու է 7 մլրդի: Իմ կարծիքով ներսում էլ այս հարցը կքննարկվի և ակումբները կկարողանան, կոպիտ ասած, ինչ-որ բան պոկել ՈւԵՖԱ-ից: Եվրոպական ֆուտբոլային գերատեսչությունը, կարծում եմ, խնդիրը այլ տեսանկյունից է դիտարկում: Հուսով եմ այս հարցը կփակվի և մենք այլևս չենք ունենա նման խնդիր»,- եզրափակեց Պաչաջյանը:
Երվանդ Հակոբյան
