Հայաստանի ֆուտբոլի ֆեդերացիայում մեկնարկել է ՀՖՖ 20-րդ տարեկան ժողովը:
5 րոպե դադարից հետո ներկաները ՀՖՖ նախագահ Արմեն Մելիքբեկյանի գլխավորությամբ շարունակեցին ժողովը: ՀՖՖ գործունեության հաշվետվության հաստատումը ներկայացրեց ՀՖՖ նախագահ Արմեն Մելիքբեկյանը, ով խոսեց անցնող տարում գրանցած հաջողությունների մասին:
«Հարգելի գործկոմի անդամներ, ֆուտբոլային աշխարհի ներկայացուցիչներ: 2020-ը ավարտվում է: Սա ամբողջ աշխարհի և հատկապես Հայաստանի համար կրկնակի ծանր տարի էր, որը հարվածեց նաև հայկական ֆուտբոլին՝ բոլոր մակարդակներով: Հայկական ֆուտբոլը հանձնեց այս փորձությունը՝ գրանցելով մի շարք հաջողություններ, և ամուր հիմք դրեցինք ապագա հաջողությունների համար: Ամբողջ իրադարձությունների մասին չեմ հասցնի խոսել, բայց կարծարծեմ մի քանի կարևոր թեմաներ, որոնցից առաջինը Հայաստանի հավաքականն է:
Այս հաղթանակի մասին ես պետք է հպարտությամբ խոսեմ: Դա ոչ միայն Ազգերի լիգայի խմբային փուլում հաղթանակն է, այլ այն, թե ինչ մոտեցում են ցուցաբերել հավաքականի ֆուտբոլիստներն ու անձնակազմը այս ընթացքում: Պետք է խոսեմ այս ամենի հումանիտար ասպեկտի մասին: Հաղթանակից զատ, կարևոր էր նվիրումը այս ծանրագույն պահին, ովքեր հումանիտար օգնություն էին ցուցաբերում: Մեկ բռունցք դարձած՝ նրանք աջակցել են եվրոպական տարբեր երկրներում հայկական օջախների կողմից տրամադրված օգնության տեղափոխմանը Հայաստան: Մասնակցել են արցախահայերի համար կազմակեպված դրամահավաքներին և այս ամենը համատեղել են ֆուտբոլային հանդիպումների հետ: Մի պատմություն կա, որի մասին պետք է խոսեմ: Երբ հումանիտար օգնություն էր բերել եվրոպական երկրներից մեկի հայ համայնքը, այդ երկրում կորոնավիրուս էր, և մեզ բանվորական ուժ չտվեց օդանավակայանը, մեր ամբողջ անձնակազմը՝ ֆուտբոլիստներով ներառյալ, տեղափոխում էինք տոննաներով բեռը, որը հետո պետք է գնար օդանավ: Ես խորապես շնորհակալ եմ բոլորին, ովքեր մասնակցել են: Ես անձամբ նույնպես մասնակցել եմ, բայց կոռեկտ չի հիմա խոսել դրա մասին: Ամեն ինչ արել ենք ուժերի գերլարումով:
Ցանկանում եմ անդրադառնալ նաև մարզչական անձնակազմին: 8 ամսվա ընթացքում Կապառոսն ու օգնականները ահռելի աշխատանք են կատարել: Կապառոսն անձամբ շատ զրուցել է այն ֆուտբոլիստների հետ, ովքեր պետք է հրավիրվեին հավաքական: ՀՖՖ-ն իր հերթին նույնպես զբաղվել է այդ հարցերով: Խոսքը տարբեր տարիքային հավաքականների մասին է:
Մեծ երջանկություն և հպարտություն է ԲԿՄԱ-ի նախագիծը: Չեմ վախենա ասել, որ նրանցից շատերը թռիչքային աճ են գրանցել, ու սպասում ենք նրանց ազգային հավաքականում»,-ասաց Մելիքբեկյանը:
