Իսպանիայի ազգային հավաքականի նախկին գլխավոր մարզիչ Վիսենտե Դել Բոսկեն ու ազգային թիմի նախկին ավագ Իկեր Կասիլյասը պատմել են, թե ինչպես է 2011 թվականին կարճ ժամանակահատվածում կայացած 4 Էլ կլասիկոները ազդել հավաքականի վրա։
2011 թվականին 18 օրվա ընթացքում «Ռեալն» ու «Բարսելոնան» հանդիպեցին իրար 4 անգամ։ Կասիլյասը պատմում է, որ հանդիպումները քաղաքական երանգ էին ստացել ու դա խանգարում էր հավաքականին։
«Մենք պատրաստ չէինք 4 հանդիպման այդքան կարճ ժամանակահատվածում։ Այդ 4 խաղերը, ասես, բնութագրում էին իսպանական ֆուտբոլն ու այն ամենը ինչ կատարվում էր շուրջը։ Այդ խաղերը քաղաքական երանգ ստացան։ Երբ հաղթում էր «Բարսելոնան», դա ընկալվում էր, որ Կատալոնիան հաղթել է Մադրիդին»,-ասել է Կասիլյասը El Pais-ի հետ զրույցում։
«Ես կարծում եմ, որ հանդերձարանը բաժանվել էր։ Ու դա արտաքին ազդեցությունների պատճառով էր, այլ ոչ թե ներքին։»,-ավելացրել է Դել Բոսկեն։
Դել Բոսկեն նաև պատասխանել է Կասիլյասի այն դիտարկմանը, թե իբր ֆուտբոլիստներն իրար մեջ ունեին հակասություններ այս հարցով․
«Ես ոչ մեկի կողմը չեմ անցել։ Ես միշտ չեզոք եմ մնացել։ Ես երբեք քաղաքականության մասին չեմ լսել ազգային թիմում։ Գուցե դուք ձեր մեջ խոսում էիք, բայց ինձ մոտ դուք հազվադեպ եք դա արել»,-ասել է Դել Բոսկեն։
