Այսօր օգոստոսի քսանյոթն է: Ընդամենը մեկ տարի առաջ, այս ամսաթիվը ձեզ միգուցե ոչինչ չէր ասում:
3 վայրկյան. հոգեբանները գտնում են, որ այս ժամանակահատվածում ենք կատարում մեր կյանքի ամենակարևոր որոշումներից շատերը: Մեզ այդքան ժամանակ է հարկավոր դուր եկած մարդուն մոտենալու որոշում կայացնելու կամ տատանվելու և հետ կանգնելու համար:
3 վայրկյան. այսքան ժամանակ է պահանջվում հաղթանակի նժարը քո կողմը շրջելու կամ այն ընդմիշտ բաց թողնելու համար:
3 վայրկյան և 3 հանդիպում. ՈՒԵՖԱ-ի Եվրոպա լիգայի խաղարկության որակավորման առաջին փուլի շրջանակում այսօր պայքարի մեջ կմտնեն հայկական 3 ակումբ. «Շիրակը», «Նոան» ու «Ալաշկերտը»:
Կարող է թվալ, որ «Շիրակին» և «Նոային» ավելի անվանի և բարդ մրցակիցներ են բաժին հասել: Բացի այդ, մեր ակումբները խաղալու են մրցակցի հարկի տակ: Նշենք, որ կորոնավիրուսի համավարակը մեզ համար մեկ խնդիր և մեկ բարի ծառայություն է մատուցել:
Խնդիր. Համավարակի վտանգներն հաշվի առնելով՝ ՈւԵՖԱ-ն որոշեց, որ մեկնարկող եվրագավաթային նոր մրցաշրջանի որակավորման փուլերի դիմակայությունները կանցկացվեն մեկ խաղով, բացառությամբ՝ ՉԼ-ի փլեյ-օֆֆ խաղերի: Դաշտի տերերն էլ ընտրվեցին վիճակահանությամբ:
«Նոան» և «Շիրակը» մրցակցի հարկի տակ պետք է ցուցադրեն իրենց ողջ ներուժը, քանի որ զրկված են սեփական դաշտում հանդիպում անցկացնելու հնարավորությունից:
Բարի ծառայություն. 12-րդ խաղացողը, COVID-19-ի սահմանափակումներով պայմանավորված, չի օգնի մեր մրցակիցներին, ուստի հավելյալ ճնշում մեր թիմի վրա տրիբունաներից չի լինի։ Սա շատ կարևոր հոգեբանական հանգամանք է, որը մեղմում է ստեղծված անհավասարությունը:
ՖԱՍԲ-«Շիրակ»
Ինչ վերաբերում է խաղային խնդիրներին, ապա այս երկուսից առավել մտահոգիչ իրավիճակում էր «Շիրակը»:
Հայաստանի Բարձրագույն խմբի առաջնության վերջին տուրից օրեր անց հայտարարվեց «Շիրակում» մեծ փոփոխությունների մասին․ թիմի մի շարք խաղացողներ, Վարդան Բիչախչյանի գլխավորությամբ, տեղափոխվեցին Երևանի «Արարատ»։ Մտավախությունը մեկն էր․ Եվրոպա Լիգայի շեմին՝ կկարողանա՞ն գյումրեցիներն այնպիսի կազմ հավաքել, որը ի զորու կլինի պայքար մղել այդ մրցաշարում։ Սա էլ դեռ քիչ էր, մեր ակումբին բաժին հասավ անենաբարդ մրցակիցներից մեկը ՝ ռումինական ՖԱՍԲ-ն:
Ահա այստեղ, երևանյան ակումբը օգնության ձեռք մեկնեց «Շիրակին»: Թիմի մի քանի նախկին ֆուտբոլիստներ ժամանակավորապես վերադարձան Գյումրին ներկայացնող ակումբ և կօգնեն «Շիրակին» հաղթահարել ռումինացիների արգելքը:
Ռումինիայի բազմակի չեմպիոնը (26 անգամ) «բարդ ընկույզների» շարքին է դասվում, ինչի մասին ArmSport-ի հետ զրույցում ասել էր գյումրեցիների ավագ Աղվան Դավոյանը։
«Հնարավոր տարբերակներից ամենաբարդը մեզ բաժին հասավ։ Իհարկե, մեզ շատ դժվար հանդիպում է սպասվում, ամեն ինչ կանենք, որ պատվով դուրս գանք այդ մրցավեճից»,-ասել էր գյումրեցիների ավագ Դավոյանը։
«Շիրակի» առջև բարդ խնդիր է դրված, բայց ՝ ոչ անիրագործելի:
«Կայրաթ»-«Նոա»
«Նոան» կհյուրընկալվի Կամո Հովհաննիսյանի «Կայրաթին»: Ղազախական ակումբը 8-րդ անգամ անընդմեջ կմասնակցի Եվրոպա լիգայի խաղարկությանը:
Եվրոպական ասպարեզում Ալմաթիի թիմի ամենամեծ հաջողությունը գրանցվել է 2015/16 մրցաշրջանում: Այդ մրցաշրջանում թիմը հասավ Եվրոպա լիգայի որակավորման փլեյ-օֆֆ, որտեղ ֆրանսիական «Բորդոյի» հետ դիմակայությունն ավարտվեց 2-2 հաշվով, սակայն մրցակցի հարկի տակ խփած գոլի շնորհիվ «Բորդոն» շարժվեց առաջ: 2019/20 մրցաշրջանում «Կայրաթը» Եվրոպա լիգայի որակավորման երկրորդ փուլից դուրս մնաց պայքարից:
Պարզ է, որ «Կայրաթը» շատ ավելի փորձառու թիմ է, որի կազմում խաղում է Վագներ Լավի նման մեծ վարպետ: «Նոան» ընդամենը մեկ տարվա նախագիծ է, սակայն այդ մեկ տարվա ընթացքում հասցրել է նշանակալից հաջողությունների հասնել, իսկ ներկայիս ներուժով ի զորու է կռիվ տալ «Կայրաթի» դեմ խաղում:
Հայկական թիմի գլխավոր մարզիչ Իգոր Պիկուշչակը ևս իր կարծիքն է հայտնել մրցակցի ու սպասվող դիմակայության մասին.
«Հեշտ չի լինելու, «Կայրաթն» ունի շատ որակյալ ֆուտբոլիստներ՝ աստղեր։ Դրան գումարած նաև այն, որ մեզ արտագնա խաղ է սպասում, որտեղ մրցակիցը, բնականաբար, առավելություն է ստանում։ Իհարկե, փորձելու ենք որակյալ, արագ ֆուտբոլ խաղալ, բայց շատ ծանր է լինելու: Ասեմ, որ եղած 4 թիմերից ամենաքիչը կուզենայինք իրենց դեմ խաղալ: Մեր առավելությունն այն է, որ կորոնավիրուսի համավարակի պատճառով նրանց առաջնությունը դադարեցված էր և «Կայրաթի» ֆուտբոլիստները խաղային պրակտիկայի խնդիր կարող են ունենալ»,- ասել էր Պիկուշչակը:
Սա այն դեպքերից է, երբ անհաջողության դեպքում ոչ ոք չի կարող «քար նետել» երևանյան ակումբի կողմը: «Նոան» երիտասարդ մի նախագիծ է, իսկ մենք գիտենք, որ երիտասարդները շատ ավելի անվախ և նպատակասլաց են:
«Ալաշկերտ»-«Ռենովա»
Հայկական միակ ակումբը, որն իր հանդիպումը կանցկացնի Հայաստանում ՝ «Ալաշկերտն» է: Հատկանշական է, որ Եղիշե Մելիքյանի գլխավորած թիմը նախկինում հանդիպել է ՖԱՍԲ-ին: 2019 թվականին Եվրոպա Լիգայի որակավորման երկրորդ փուլում «Ստյաուան» բաժին էր հասել Երևանի «Ալաշկերտին»։ Երևանում կայացած առաջին խաղում մեր թիմը խոշոր՝ 0-3 հաշվով պարտություն էր կրել։ Բուխարեստում ալաշկերտցիները կարողացան հաջողության հասնել՝ հաղթելով 3-2 հաշվով։ Սակայն, դիմակայության ընդհանուր 3-5 պարտությամբ մեր թիմը դուրս մնաց հետագա պայքարից։
Հատկանշական է, որ «Ալաշկերտը» «փորձարկել» է նաև «Նոայի» այս տարվա մրցակից ղազախական «Կայրաթին»։ 2015 թվականին Եվրոպա Լիգայի որակավորման կրկին երկրորդ փուլում «Ալաշկերտը» ընդհանուր 2-4 հաշվով պարտությամբ լքել էր պայքարը։
Այժմ, մեր թիմին բաժին է հասել մակեդոնական «Ռենովան»: Եվ երրորդ հատկանշականը. մրցաշարի նախորդ խաղարկությունում «Ալաշկերտը» ևս հանդիպել էր մակեդոնական ակումբի` հաղթահարելով բալկանյան ակումբի արգելքը:
Ի տարբերություն մեր մյուս ակումբների, կարող ենք նշել, որ դիմակայության ֆավորիտը հայկական ակումբն է: «Ալաշկերտի» կազմը, որը մեծապես համալրված է բարձրակարգ լեգիոներներով, շատ ավելի գրավիչ տեսք ունի, քան մակեդոնական ակումբինը: Կարելի է ասել, որ Հայաստանում «Ալաշկերտն» ամենազորեղ կազմն ունեցող 2 թիմերից մեկն է: «Ռենովայի» կորիզը հիմնականում կազմում են տեղացի ֆուտբոլիստները: Կան լեգիոներներ Ալբանիայից, Կոսովոյից, Բոսնիայից ու Խորվաթիայից:
Հայաստանի նախորդ առաջնության երրորդ մրցանակակիրը այս հանդիպմանը մոտենում է ֆավորիտի կարգավիճակով:
Իսկ ի՞նչ պետք է անենք մենք ՝ երկրպագուներս: Ամեն ինչ շատ պարզ է. պետք է օգտագործենք մեզ ընձեռնված 3 վայրկյանը:
Մեր թիմերին կբավարարի մեկական վայրկյանը, մեկական խփած գնդակը, մեկական հաղթանակը: Կարևորը, սեփական դարպասը անառիկ պահելն է: Այդ գործում մենք տղաների հետ ենք. թեկուզ հեռվից, թեկուզ պաշտպանիչ դիմակներով, բայց նրանք պետք է զգան մեր աջակցությունը:
Այնպես որ, մի զլացեք և երեք վայրկյանի ընթացքում կրկնեք.
«Հաղթելու ենք, Հաղթելու ենք, Հաղթելու ենք»…
