Ֆուտբոլային սկաուտ․ ՌՊԼ-ի ամենահեռանկարային ֆուտբոլիստները

Այս անգամ Ֆուտբոլային սկաուտ շարքում ընդգրկել ենք Ռուսաստանի Պրեմիեր Լիգայում հանդես եկող այն ֆուտբոլիստներին, ովքեր մոտ ապագայում կարող են իրենց կարիերան շարունակել արևմտաեվրոպական լիգաներից մեկում, ինչու ոչ՝ թոփ ակումբներում։

Էլդոր Շոմուրոդով

🇺🇿 Ուզբեկիստան
«Ռոստով»
23 տարեկան

Բարձրահասակ կենտրոնական հարձակվողն արդեն երրորդ մրցաշրջանն է անցկացնում ՌՊԼ-ում, սակայն հենց այս մրցաշրջանում նա բոլորին լսեցնել տվեց իր մասին։ Ուզբեկ ֆուտբոլիստն այս մրցաշրջանում ամենաարդյունավետն էր «Ռոստովի» կազմում (11 գոլ, 7 գոլային փոխանցում)։ Էլդորը դասական կենտրոնական հարձակվող է, ում գլխավոր պարտականությունը մրցակցի դարպասը գրավելն է, սակայն նա բավականին աշխատասեր է, իր հասակի համար բավականին արագաշարժ, ինչի շնորհիվ հարկ եղած դեպքում կատարում է նաև վինգերի պարտականություններ։ Նրանով արդեն իսկ հետաքրքրված են եվրոպական մի շարք ակումբներ (օրինակ՝ «Գենտ»), սակայն ռուսական ակումբը չի շտապում բաժանվել իր գոլահարից։ Եվս մեկ հաջող մրցաշրջան, և Ուզբեկստանի հավաքականի առաջատարներից մեկին արդեն դժվար կլինի պահել։

Մալքոմ

🇧🇷 Բրազիլիա
«Զենիթ»
23 տարեկան

Բրազիլացու կարիերան ոչ այդքան հաջող դասավորվեց «Բարսելոնայում»․ 2018 թվականին նա 41 մլն եվրոյով տեղափոխվեց կատալոնական ակումբ ֆրանսիական «Բորդոյից», որի կազմում հիանալի մրցաշրջան էր անցկացրել Լիգա 1-ում։ Սակայն նա չկարողացավ ամրապնդվել «Բարսայում», և մեկ տարի անց գրեթե նույն գումարով տեղափոխվեց ռուսական ակումբ։ Սակայն նոր առաջնությունում անհաջողությունների շղթան ևս շարունակվեց․ նա լուրջ վնասվածք ստացավ և բաց թողեց ՌՊԼ-ի այս մրցաշրջանի 2/3-ը։ Սակայն, վերջերս ապաքինվելով ծանրագույն վնասվածքից, նա հասցրեց մասնակցել մրցաշրջանի վերջին մի քանի տուրերի խաղերին, որոնցում կրկին ապացուցեց իր բարձր կարգը։ Հուսանք, որ անհաջողությունների շղթան արդեն անցյալում է և բրազիլացին կվերադառնա իր նախկին խաղամակարդակին, և չի բացառվում, որ մեկ-երկու հաջող մրցաշրջաններից հետո, մենք կրկին նրան կտեսնենք որևէ թոփ լիգայում։

Նիկոլա Վլաշիչ

🇭🇷 Խորվաթիա
ԲԿՄԱ
23 տարեկան

Օլիչ, Կրասիչ, Տոշիչ, Ռախիմիչ․․․ իսկ այժմ էլ Վլաշիչ․ ԲԿՄԱ-ի կազմում վերջին քսանամյակում բալկանյան երկրների ներկայացուցիչները բավականին հաջող են հանդես գալիս։ Խորվաթ ֆուտբոլիստը չկարողացավ ամրապնդվել անգիլական «Էվերտոնում» և տեղափոխվելով մոսկովյան ակումբ՝ արդեն երկրորդ մրցաշրջանն է, ինչ բավականին հաջող է հանդես գալիս։ Այս մրցաշրջանում նա, ընդհանրապես, իր թիմի լավագույն ռմբարկուն էր ՌՊԼ-ում (12 գոլ), և այժմ պատահական չէ, որ Վլաշիչի ծառայություններով հետաքրքված են մի շարք թոփ ակումբներ։ Վերջերս հայտնի էր դարձել, որ իտալական «Նապոլին» ցանկանում է տեսնել խորվաթ ֆուտբոլիստին իր կազմում։

Սերդար Ազմուն

🇮🇷 Իրան
«Զենիթ»
25 տարեկան

Իրանցի ֆուտբոլիստն արդեն 8-րդ մրցաշրջանն է անցկացնում ՌՊԼ-ում՝ հանդես գալով «Ռուբին», «Ռոստով» և «Զենիթ» ակումբներում, իսկ այս մրցաշրջանը թերևս լավագույնն էր նրա կարիերայում․ 17 գոլով նա կիսեց մրցաշրջանի լավագույն ռմբարկուի կոչումը իր թիմակից Ձյուբայի հետ։ Ընդհանուր առմամբ բոլոր մրցաշարերում նա այս մրցաշրջանում դարձել է 21 գոլի և 10 գոլային փոխանցման հեղինակ։ Սերդարն արդեն իսկ ՌՊԼ-ում հասել է ամեն ինչի, նա ընդամենը 25 տարեկան է և, միգուցե, ժամանակն է արդեն փորձել ուժերը ավելի բարձրակարգ առաջնությունում, հատկապես, որ նրա ծառայություններով հետաքրքրված են մի շարք թոփ ակումբներ։

Ալեքսեյ Միրանչուկ

🇷🇺 Ռուսաստան
«Լոկոմոտիվ»
24 տարեկան

«Լոկոմոտիվի» առաջատարը բավականին հաջող մրցաշրջան անցկացրեց, ինչը չվրիպեց մի շարք արտերկրյա թոփ ակումբների աչքից։ Մասնավորապես, «Միլանի» սպորտային տնօրեն Ռիկի Մասսարան արդեն իսկ բանակցություններ է վարում «Լոկոմոտիվի» հետ՝ Ալեքսեյ Միրանչուկի տրանսֆերի շուրջ, հայտնում է Tuttosport-ը: Միրանչուկի նկատմամբ դեռ վաղուց հետաքրքրություն է ցուցաբերում «Միլանի» գլխավոր մարզիչ Ստեֆանո Պիոլին: Միրանչուկը «Լոկոմոտիվում» է 2013 թ-ից: ՌՊԼ-ի ընթացիկ առաջնությունում անցկացրած 27 խաղում ռուս հարձակվողը դարձել է 12 գոլի ու 3 արդյունավետ փոխանցման հեղինակ: 2015 թ-ից հրավիրվում է Ռուսաստանի ազգային հավաքական և վերջին տարիներին դարձել է ազգային թիմի առաջատարներից մեկը։ Միգուցե, Ալեքսեյը ևս փորձի կրկնել Գոլովինի եվրոպական ոդիսականը և մենք ականատես կլինենք ևս մեկ ռուս ֆուտբոլիստի հաջող ելույթներին թոփ առաջնությունում․․․

Վար Բաբայան

Շարքի նախորդ մասերը

Վալենսիան շարունակում է մնալ ֆուտբոլային քաղաք

Աֆրիկայի ամենաթանկարժեք 5 ադամանդները

5 ռմբարկուներ ոչ թոփ առաջնություններից

ՌԲ Լայպցիգը՝ ապագա աստղերի դարբնոց

Դեղձանիկները դեռ կճախրեն ֆուտբոլային երկնակամարում

Շոտլանդիայի առաջնության ամենահեռանկարային ֆուտբոլիստները

Լավագույնները Ա Սերիայի նկուղում

Ամերիկացիների երիտասարդ դեսանտը Եվրոպայում

Բեռլինում նոր աստղեր են հասունանում

Այս հիանալի Զալցբուրգը․․․