Հայաստանի Բարձրագույն խմբի առաջնության դադարից հետո ու եվրագավաթների և հաջորդ առաջնության մեկնարկից առաջ ArmSport-ը փորձել է պարզել՝ ինչով են զբաղվում մեր ակումբներն այս ընթացքում։
Հայաստանի կրկնակի չեմպիոն «Արարատ-Արմենիայի» մամուլի ծառայությունից տեղեկացնում են, որ թիմն այս պահին արձակուրդում է․ մարզումները կվերսկսվեն հուլիսի 23-ից ՀՖՖ Տեխնիկական կենտրոն Ավանի ակադեմիայում։ Ակումբում ընկերական խաղերի վերաբերյալ դեռևս տեղեկություններ ու պայմանավորվածություններ չկան։ Ինչպես հայտնի է՝ առաջնության ավարտից հետո թիմի գլխավոր մարզիչ Վարդան Մինասյանը հեռացավ զբաղեցրած պաշտոնից․ նոր գլխավոր մարզչի վերաբերյալ տեղեկություն ակումբից չտվեցին։
Հայաստանի գավաթակիր «Նոայի» մամուլի քարտուղար Ռուբեն Մելոյանը հայտնում է, որ առաջնության ավարտից հետո թիմը մի քանի օր արձակուրդում է եղել․ որոշվել է, սակայն, ժամանակի սղության պատճառով ուսումնամարզական հավաք չանցկացնել։ Երկուշաբթի օրվանից՝ հուլիսի 20-ից, թիմը վերսկսել է մարզումները ՀՖՖ Տեխնիկական կենտրոն Ավանի ակադեմիայում։ Մելոյանը նշում է, որ թիմի բոլոր ֆուտբոլիստները Հայաստանում են, նրանք նաև համակարգային բուժզննում են անցել։
«Ներկայումս թիմն ինտենսիվորեն նախապատրաստվում է օգոստոսի 8-ին «Արարատ-Արմենիայի» դեմ կայանալիք Հայաստանի Սուպերգավաթի խաղին, ապա՝ ներքին առաջնության մեկնարկին»,- ասում է թիմի մամուլի քարտուղարը։
«Նոան» ակտիվորեն զբաղվում է կազմի համալրմամբ՝ հաշվի առնելով եվրագավաթներն ու մեկնարկող առաջնությունը։ Ի թիվս այլ խաղացողների, «Նոայի» կազմը համալրել է նաև Հայաստանի ազգային հավաքականի կոլումբահայ պաշտպան Ժոաո Ժորդի Մոնրոյ Արարատը.
«Բնականաբար, կլինեն թիրախային ձեռքբերումներ, այդ գործընթացում կլինեն նորեկներ և հեռացողներ, ինչի մասին ակումբն անմիջապես տեղեկացնելու է»,- ավելացնում է Մելոյանը։
Հայաստանի բրոնզե մեդալակիր «Ալաշկերտը» ևս հուլիսի 20-ից արդեն վերսկսել է մարզումները։ Թիմի մամուլի քարտուղար Սամվել Սուքիասյանը նշում է, որ ակումբը կունենա և՛ հեռացողներ, և՛ ձեռքբերումներ, սակայն դրանց մասին կհայտարարվի ավելի ուշ։ Մինչ եվրագավաթների մեկնարկը «Ալաշկերտը» 3 ընկերական խաղ կանցկացնի․ մրցակիցները հստակեցման փուլում են։ Թիմը հուլիսի 28-ից նաև ուսումնամարզական հավաք կանցկացնի Հայաստանում։
Եվրագավաթային մեր մյուս թիմում՝ «Շիրակում», ամեն ինչ այնքան էլ հստակ չէ։ Ինչպես ավելի վաղ հայտնել էինք՝ ըստ մեզ հասած լուրերի՝ գյումրեցիների գլխավոր մարզիչ Վարդան Բիչախչյանը թիմի մի շարք ֆուտբոլիստների հետ կարող է տեղափոխվել Երևանի «Արարատ»։ Այս և թիմին վերաբերող այլ հարցերի ակումբն առայժմ չի արձագանքել։
«Մեկուսացումը, պարզվեց, բավական դժվար երեւույթ է։ Հատկապես՝ շոգին։ Երեւանաբնակ ֆուտբոլիստներն ու աշխատակազմը մեկուսացել են տներում։ Օտարերկրացիներն աշխատակազմի մի քանի այլ ներկայացուցիչների հետ՝ Վանաձորում։
Փլեյսթեյշն, ֆիլմեր, երաժշտություն, զրույցներ … Հնարավոր ամեն ինչով փորձում ենք զբաղվել, որպեսզի դիմանանք։ Ծանր դեպքեր չունենք։ Բոլորը լավ են տանում վարակը, հիմնականում՝ ասիմպտոմ»,-պատմում է «Լոռիի» մամուլի քարտուղար Սպարտակ Պետրոսյանը, որը ակումբի անձնակազմի մնացած անդամների պես ինքնամեկուսացված է. ԲԽ առաջնության նախավերջին տուրից հետո «Լոռիից» 17 հոգու մոտ կորոնավիրուս էր հաստատվել:
Թիմի անդամները մեկուսացումից դուրս են գալու միայն ամսվա վերջին, որպեսզի լիովին առողջ լինեն և պատրաստ՝ մարզումներին ու բնականոն աշխատանքին վերադառնալուն։ Թե առաջիկա ինչ պլաններ ու ինչ փոփոխություններ կլինեն թիմում՝ մամուլի քարտուղարը տեղյակ չէ. մեկուսացված է Վանաձորում ու ղեկավարության հետ դեռ ապագա պլանների մասին չի խոսել:
Երևանի «Արարատը» դեռ արձակուրդում է, իսկ մի քանի օրից կսկսի նախապատրաստական շրջանը:
«Հավաք կանցկացնենք Հայաստանում, քանի որ արտասահման մեկնելը խնդիր է»,-նշում են ակումբի մամուլի ծառայությունից:
Իսկ կազմի վերաբերյալ ասում՝
«Այո լինելու է կազմի մեծ փոփոխություն, շուտով կտեղեկացնենք մեր նոր ձեռքբերումների մասին, ինչպես նաև նրանց մասին, ովքեր կլքեն ակումբը»:
Նախորդ առաջնությունում անցկացրած վերջին խաղից հետո «Ուրարտուի» ֆուտբոլիստներին եռօրյա հանգիստ է տրվել, որից հետո ֆուտբոլիստները վերադարձել ու սկսել են նոր մրցաշրջանի նախապատրաստությունը։ Ակումբի մամուլի ծառայությունից հայտնում են, որ թիմը մարզվում է բավականին հագեցած ծրագրով՝ պարբերաբար անցկացնելով օրական երկու մարզում։ Թիմը նոր մրցաշրջանին պատրաստվելու է սեփական մարզաբազայում։ Նախապատրաստական շրջանում պլանավորված են ստուգողական հանդիպումներ։ Հուլիս 23-ին թիմը կմրցի «Վանի», 25-ին՝ «Գանձասար-Կապանի», 30-ին ԲԿՄԱ-ի հետ, պլանավորվում է ևս երկու ստուգողական հանդիպում, այժմ հստակեցվում են մրցակիցները։
Ակումբի մամուլի քարտուղարությունից նշում են, որ թիմը նոր մրցաշրջանին կնախապատրաստվի սեփական մարզաբազայում։ Ուսումնամարզական այլ հավաքներ նախապատրաստական ծրագրում չկան։ Առաջիկա երեք ստուգողական հանդիպումներն էլ «Ուրարտուն» կանցկացնի սեփական հարկի տակ։
«Թիմից արդեն մի շարք ֆուտբոլիստներ հեռացել են, որոնց մասին պաշտոնապես հայտարարվել է։ Թիմում չեն Վահագն Այվազյանը, Ռուբեն Ռամիրեսը, Յուրիցա Գրգեցը, Մարկո Բրտանը, Սեմյոն Սինյավսկին, Էդվարդ Կպոդոն, Էբերտը։ Իգոր Պադերինը ֆուտբոլիստի կարիերան ավարտելու որոշում է կայացրել, Արամ Բարեղամյանը՝ նույնպես ու արդեն համալրել է ակումբի գլխավոր թիմի մարզչական շտաբը։ Թիմն այս պահին արդեն 4 նորեկ ունի։ Ակումբը պայմանագիր է ստորագրել Օլեգ Պոլյակովի, Մաքսիմ Մաշնյովի, Վիտինյոյի և Ջեյմս Սանթոսի հետ։ Համալրումներ կան նաև թիմի մարզչական, բժշկական անձնակազմերում։ Հնարավոր ձեռքբերումների մասին կտեղեկացնենք առաջիկայում»,- ասում է ակումբի մամուլի քարտուղար Դավիթ Մարտիրոսյանը։
«Փյունիկ» ՖԱ-ն ՀՖՖ տեխնիկական կենտրոն ֆուտբոլի ակադեմիայում վերսկսել է նոր մրցաշրջանի նախապատրաստական փուլը։ Այս մասին տեղեկացնում է ակումբի մամուլի ծառայությունը:
Թիմը հուլիսի 25-ից օգոստոսի 6-ն ուսումնամարզական հավաք կանցկացնի Դիլիջանում, որտեղ կանցկացնի 2 ընկերական հանդիպում՝ «Գանձասար-Կապանի» և «Վանի» հետ։
Մինչև ուսումնամարզական հավաքի մեկնարկը թիմը ևս 1 ընկերական հանդիպում կանցկացնի՝ մրցելով ԲԿՄԱ-ի հետ։
Եվս 1 ընկերական հանդիպում թիմը կանցկացնի արդեն Երևանում, ուսումնամարզական հավաքի ավարտից հետո՝ Երևանի «Ուրարտուի» հետ:
Հիշեցնենք, որ օրերս թիմը նոր գլխավոր մարզիչ ունեցավ՝ Արտակ Օսեյանը, որն ավելի վաղ աշխատել էր երևանյան ակումբում:
«Գանձասար-Կապանի» մամուլի ծառայությունից տեղեկանում ենք, որ թիմը նոր մրցաշրջանի նախապատրաստությունը սկսել է օրեր առաջ, իսկ հուլիսի 19-ին արդեն ընկերական խաղ է անցկացրել «Վանի» հետ (1-1): Հաջորդ ստուգողական հանդիպումը կապանյան թիմը կանցկացնի հուլիսի 25-ին՝ մրցելով «Ուրարտուի» հետ, իսկ դրանից երկու օր անց ուսումնամարզական հավաքի կմեկնի Հանքավան, որտեղ ևս նախատեսում է ընկերական երկու խաղ անցկացնել:
«Գանձասար-Կապանի» կազմն արդեն համալրել են մի քանի խաղաացող. նիգերիացի կիսապաշտպան Ժոզեֆ Ադահ Օման, որի հետ կնքվել է մեկ տարվա պայմանագիր, մեկական տարվա պայմանագրեր է կնքվել նաև պաշտպան Հայկ Իշխանյանի ու պորտուգալացի ֆուտբոլիստ Դիոգո Մանուել Գոնսալեզ Կոելյոյի հետ:
Ստելլա Բաբլոյան
