Ֆուտբոլի միջազգային ֆեդերացիայի (ՖԻՖԱ) նախկին ֆինանսական տնօրեն Մարկուս Քաթները ամենաթարմ զոհն է՝ կազմակերպության պատմության ամենասուր ճգնաժամի, որը տասնամյակի կեսին հանգեցրեց կառույցի կառավարման գրեթե ամոբղջական նորացմանը։ Մարկուս Քաթները որակազրկվել է տասը տարի ժամկետով: ՖԻՖԱ-ի Էթիկայի հանձնաժողովը բացահայտել է նրա ստեղծած սխեման, որը թույլ է տվել գրեթե 80 միլիոն շվեյցարական ֆրանկի բոնուսներ ստանալ Քաթներին, ինչպես նաև իր երկու վերադասներին՝ Ֆեդերացիայի նախկին նախագահ Զեպ Բլատերին և գլխավոր քարտուղար Ժերոմ Վալկեին:
Ֆուտբոլի միջազգային ֆեդերացիան հայտարարել է, որ դադարեցվում է ՖԻՖԱ-ում երբեմնի շատ կարևոր դերակարտարում ունեցած Քաթների՝ ֆուտբոլին առնչվող ցանկացած գործունեությունը տաս տարի ժամկետով։ Վերջինս նաև տուգանվել է 1 միլիոն շվեյցարական ֆրանկով։ Քաթները աշխատել է ՖԻՖԱ-ում 2003 թվականից, 2007-ից 2015 թվականներին նա եղել է կառույցի ֆինանսական տնօրենը, այնուհետև ժամանակավոր հանդես է եկել որպես գլխավոր քարտուղար: Պատժամիջոցը նրա նկատմամբ կիրառվել է Էթիկայի հանձնաժողովի քննության արդյունքում:
Մարկուս Քաթները վերջին նշանակալի զոհն էր զանգվածային կոռուպցիոն ճգնաժամի մեջ, որը ցնցեց ՖԻՖԱ-ին 2015 թվականին։ Դրանից հետո ֆեդերացիայում գրեթե ամբողջ կառավարման օղակը փոխվեց, որոշ գործիչներ վերածվեցին քրեական գործերով կասկածյալների, իսկ կառույցի բարձրաստիճան պաշտոնյաները՝ նախագահ Զեպ Բլատերը և գլխավոր քարտուղար Ժերոմ Վալկեն, վարչական տույժեր ստացան՝ վեց և տաս տարի հեռացվելով ֆուտբոլային գործունեությունից:
Պրն. Քաթների նկատմամբ պատժամիջոցների պաշտոնական պատճառը նրան պատկանող USB-ում անցկացված հետաքննությանը հայտնաբերված անձնական պայմանագրերն են։
Խոսքը գնում է Քաթների, ով պատասխանատու էր նման փաստաթղթերի պատրաստման համար, ինչպես նաև նրա երկու անմիջական վերադասերի՝ Զեպ Բլատերի և Ժերոմ Վալկեի պայմանագրերի մասին: Դրանք ընդգրկում էին այն ժամանակահատվածը, որը ներառում էր աշխարհի երկու առաջնություն՝ 2010-ին Հարավային Աֆրիկայում և 2014-ին՝ Բրազիլիայում, ինչպես նաև Բրազիլիայի ԱԱ-ին նախորդող 2013-ին կայացած Կոնֆեդերացիաների գավաթը: Էթիկայի հանձնաժողովին հիմնականում հետաքրքրում էին պայմանագրերով երեք գործիչների համար նախատեսված պարգևավճարները՝ կապված այդ մրցաշարերի անցկացման հետ: Նրանք դա անվանել են «չարդարացված հարստացման» «համակարգված» փորձի ապացույց:
Ընդհանուր առմամբ, այս սխեմայի շնորհիվ երեք պաշտոնյաները վաստակել են, ըստ Էթիկայի հանձնաժողովի, շուրջ 79 միլիոն շվեյցարական ֆրանկ՝ որպես պարգևավճար:
Միևնույն ժամանակ, ինքը՝ Մարկուս Քաթները , որը մեղադրվում է ՖԻՖԱ-ի էթիկայի օրենսգրքի ընդամենը երեք հոդվածները խախտելու մեջ, ստացել է գումարի համեմատաբար փոքր մասը՝ 7 միլիոն շվեյցարական ֆրանկ: Մնացած գումարը բաժին է հասել Զեպ Բլատերին և Ժերոմ Վալկեին: