VBet Հայաստանի Գավաթի խաղարկության կիսաեզրափակիչ պատասխան խաղերի արդյունքում այսօր`հունիսի 24-ին, հայտնի կդառնան այն երկու թիմերը, որոնք եզրափակչում միմյանց միջև կվիճարկեն բաղձալի տիտղոսը:
«Նոա»-«Ուրարտու» (առաջին խաղը՝ 1-0)
Երևան, «Նաիրի» մարզադաշտ
Մեկնարկը`17:30
Խաղային օրը կմեկնարկի «Նոայի» և «Ուրարտուի» միջև դիմակայությամբ: Վադիմ Բորեցի սաները բավականին տպավորիչ ելույթներ են ունենում Հայաստանի Բարձրագույն խմբի առաջնության փլեյ-օֆֆում ու գտնվում են հիանալի մարզավիճակում: Գործերը հաջող են ընթանում նաև Գավաթի խաղարկությունում. VBet Հայաստանի Գավաթի ընթացիկ խաղարկությունում թիմը դեռևս ոչ մի գոլ բաց չի թողել ու շատ մարտական է տրամադրված`իր պատմության մեջ առաջին տիտղոսը նվաճելու և ամենակարճ ճանապարհով Եվրոպա լիգայում տեղն ապահովելու ճանապարհին: Կիսաեզրափակչի առաջին խաղում էլ մրցակցի հարկի տակ խփած գոլն (Ալան Տատաևն էր աչքի ընկել խփած գնդակով) ու նվազագույն հաշվով հաղթանակն, իհարկե, փոքր-ինչ առավելություն ու վստահություն կտան թիմին:
Այդուհանդերձ, Ալեքսանդր Գրիգորյանի թիմը հեշտ մրցակիցներից չէ ու վստահաբար մինչև վերջին րոպեն կպայքարի մրցաշրջանը փրկելու միակ հնարավորությունից օգտվելու համար: Այն, որ առաջիկա խաղն ամենակարևորներից է «Ուրարտուի» համար ընթացիկ մրցաշրջանում, խոստովանում է նաև թիմի ռուս հարձակվող Եվգենի Կոբզարը.
«Մեզ սպասվում է մրցաշրջանի կարևորագույն խաղը։ Գավաթային կիսաեզրափակչի պատասխան խաղում պետք է դուրս գանք՝ ինչպես իսկական մարտի ու մեռնել խաղադաշտում լավագույն արդյունքին հասնելու համար։ Տրամադրվածությունը ֆանտաստիկ է, նման խաղերին նույնիսկ տրամադրել պետք չէ, ֆուտբոլիստն ինքն է գիտակցում պահի կարևորությունը։ Մենք եվրագավաթային ուղեգիր վաստակելու հնարավորություն ունենք, սա միակ ճանապարհն է»,- ասել է Կոբզարն Ուրարտուի» պաշտոնական կայքի հետ զրույցում:
«Ուրարտուն» Հայաստանի եռակի գավաթակիր է ու 7-րդ տարին անընդմեջ կպայքարի եզրափակիչ դուրս գալու համար:
«Գանձասար-Կապան»-«Արարատ-Արմենիա» (առաջին խաղը` 0-1)
Երևան, ֆուտբոլի ակադեմիայի մարզադաշտ
Մեկնարկը`19:45
Խաղային օրվա մյուս դիմակայությունը սպասվում է արդեն երեկոյան: Կապանցիներն այս փուլին հասնելու համար բավականին բարդ ճանապարհ են անցել`նախ 1/8 եզրափակչում 2-1 հաշվով առավելության հասնելով Գյումրիի «Շիրակի» նկատմամբ, ապա քառորդ եզրափակչում պայքարից դուրս թողնելով գործող գավաթակիր «Ալաշկերտին»` 3-1 հաշվով հաղթելուց հետո, և, անկասկած, հեշտ հանձնվողներից չեն, հատկապես հաշվի առնելով այն, որ ինչպես «Ուրարտուի» դեպքում, կապանցիների համար սա ևս մրցաշրջանի միակ տիտղոսը նվաճելու ու եվրագավաթներում տեղն ապահովելու հնարավորությունն է:
Ինչ վերաբերում է «Արարատ-Արմենիային», ապա վիճակահանությունը բավականին բարեհաճ գտնվեց Վարդան Մինասյանի թիմի նկատմամբ: Թիմը հանդիպեց նախ «Վեստ Արմենիային» (5-0), ապա «Սևանին», որին ջախջախեց ոչ ֆուտբոլային հաշվով (11-2): Այդուհանդերձ, այն, որ ԲԽ-ի ընթացիկ առաջնության առաջատարն ու գործող չեմպիոնը լուրջ մրցակից է, ոչ ոք կասկածի տակ չի դնում:
«Գանձասար-Կապանի» հետ պատասխան դիմակայությունից առաջ էլ «Արարատ-Արմենիան» նվազագույն առավելություն ունի. առաջին խաղում թիմը սեփական հարկի տակ 1-0 հաշվով հաղթանակ է տարել Լուիս Օգանայի միակ գոլի շնորհիվ: Նիգերիացի հարձակվողն, ի դեպ, VBet Հայաստանի Գավաթի ընթացիկ խաղարկության լավագույն ռմբարկուն է` խփած 6 գոլով:
Ստեղծված իրավիճակում որքան՝ Գավաթի համար պայքարն է խոստանում թեժ լինել, այնքան էլ այսօրվա խաղերը՝ անչափ հետաքրքիր: Թիմերին մնացել է վերջին վճռական քայլը կատարել դեպի եզրափակիչ ու պարզել՝ ով կմիանա եվրագավաթային պայքարին:
Նարե Հովհաննիսյան
