Մոտ եռամսյա դադարից հետո Ռուսաստանի խաղադաշտերը կրկին դռները կբացեն ՌՊԼ-ի ֆուտբոլիտների առջև։ Սակայն, առաջնությունը դեռ չվերսկսված, սկանդալ է հասունացել 23-րդ տուրի մեկնարկային խաղերից մեկում։ «Ռոստովի» 6 ֆուտբոլիստների COVID-19-ի թեստերի պատասխանը դրական է եղել, այդ թվում կիսապաշտպան Խորեն Բայրամյանի։ Բայրամյանը եղել է թիմում կորոնավիրուսով վարակված առաջին ֆուտոլիստը: Այս մասին հայտնում է Чемпионат-ը:
Ռուսաստանի Ֆուտբոլային Միությունը (ՌՖՄ) հայտնել էր խաղը հետաձգելու հավանականության մասին։ Իր հերթին «Սոչին» դեմ էր այդպիսի տարբերակին՝ պատճառաբանելով, որ ըստ կանոնակարգի մրցակցին ընդամենը հարկավոր է 2 դարպասապահ և 16 ֆուտբոլիստ ընդգրկել խաղի հայտացուցակում և դա անհնարին խնդիր չէ։ ՌՖՄ-ն առաջարկել է հանդիպումը հետաձգել և այն խաղարկել հուլիսի 17-ին, սակայն խաղը հետաձգելու համար ամհրաժեշտ է երկու կողմերի համաձայնությունը։ Коммерсантъ-ի աղբյուրը հայտնում էր, որ հանդիպումը չի կայանա, քանի որ ՌՖՄ-ն ըստ առաջնության կանոնակարգի չի կարող ազդել «Սոչիի» որոշման վրա։
Խաղը չկայանալու դեպքում «Ռոստովին» կգրանցվեր տեխնիկական պարտություն։ Այդ դեպքում, բնականաբար ռոստովցիները կզրկվեին հավանական երեք միավորից, իսկ եթե հաշվի առնենք, որ վերը նշված 6 ֆուտբոլիստներից բացի ակումբի 42 ներկայացուցիչ (մարզիչներ, անձնակազմ, ֆուտբոլիստներ) գտնվում են երկշաբաթյա կարանտինում, ապա թիմի առաջիկա 2-3 խաղերը ևս կարող էին չեղարկվել՝ ակումբին գրանցելով տեխնիկական պարտություն։ Դա մեծ հարված կլինի «Ռոստովի» համար, քանի որ թիմը պայքարում է եվրագավաթային գոտում ամրապնդվելու համար։
«Ռոստովի» նախագահ Արտաշես Հարությունյանցը հայտարարությամբ է հանդես եկել Ռուսաստանի Պրեմիեր-լիգայի 23-րդ տուրի՝ «Սոչիի» հետ խաղի վերաբերյալ․
«Մենք շնորհակալություն ենք հայտնում ՌՊԼ-ին կառուցողական դիրքորոշման համար: Ակումբը կատարել է բոլոր պահանջներն ու այժմ կարանտինի մեջ է: Մեզ համար մարդկանց կյանքն ու առողջությունն ավելի կարևոր է: Պատկերացրեք՝ եթե մենք ժամանեինք Սոչի, ու, Աստված մի արասցե, որևէ մեկը հիվանդանար: Դա կտրականապես չի կարելի թույլ տալ: Այդ իսկ պատճառով մենք դիմել ենք ՌՊԼ-ին և ՌՖՄ-ին՝ մեկ խաղ պահեստային օրվա վրա տեղափոխելու խնդրանքով: ՌՖՄ-ն կողմ էր մեր առաջարկին այն պայմանով, եթե «Սոչին» դեմ չլինի: Մենք չենք ցանկանում մեկնաբանել ու գնահատական տալ «Սոչիի» որոշմանը: Թող դա մնա նրանց խղճին: Մեզ համար մեր ֆուտբոլիստների ու մրցակցի խաղացողների առողջությունն ավելի կարևոր է, քան 3 միավորը»,- Հարությունյանցի խոսքերն է փոխանցում «Ռոստովի» մամուլի քարտուղարությունը:
Իր հերթին, Чемпионат-ը հայտնում էր, որ իրենց ունեցած տեղեկություններով, այսօրվա հանդիպումը կկայանա։ «Ռոստովը» մտադիր է խաղին հայտավորել 2003թ ծնված ֆուտբոլիտների թիմը և ակումբի ներկայացուցիչները այժմ զբաղվում են ֆուտբոլիստների վերահայտավորման խնդրով։ ՌՊԼ-ի կանոնակարգը թույլ է տալիս երտասարդական թիմի ֆուտբոլիստներին անհրաժեշտության դեպքում հայտավորել գլխավոր թիմի խաղերին։
Քիչ առաջ հայտնի դարձավ, որ հանդիպումը ի վերջո կկայանա։ Ակումբներին վերջապես հաջողվել է համաձայնության գալ, այդ մասին հայտնում է «Սոչիի» պաշտոնական կայքը։ «Ռոստովի» 2003թ ծնված ֆուտբոլիստների թիմը արդեն մեկնել է Սոչի։ Խաղը կկայանա այսօր՝ Երևանի ժամանակով 21։00-ին։
«Ռոստովի» գլխավոր մարզիչ Վալերի Կարպինը հայտարարել է, որ կարանտինում է և ներկա չի լինի «Սոչիի» դեմ խաղին․ «Ես չեմ գտնվի այդ հանդիպմանը: Ո՞վ կգնա, եթե ամբողջ թիմը կարանտինացված է»,- մեջբերում է Կարպինին РБК-ն:
Հիշեցնենք, որ «Սոչիի» կազմում հանդես են գալիս Հայաստանի հավաքականի ֆուտբոլիստներ Ալեքսանդր Կարապետյանն ու Էրիկ Վարդանյանը։ Հանդիպումը կկայանա այսօր՝ 21։00-ին։
Առաջնության միանձնյա առաջատարը «Զենիթն» է, ով դժվար բաց թողնի 9 միավորի առավելությունը առաջիկա 8 խաղերում։ Պետեբուրգյան թիմը, ընդհանարպես, նախորդ տարվա սեպտեմբերից ոչ մի պարտություն չի կրել ներքին առաջնությունում։ Այնպես որ, չեմպիոնության հարցը 90%-ով կարելի է փակված համարել, սակայն, մյուս կողմից, չմոռանանք՝ սա ֆուտբոլ է և այդ մարզաձևում ամեն ինչ հնարավոր է․․․ Չեմպիոնների լիգայի ուղեգրի համար (ՉԼ-ի ուղեգիր են ստանում լավագույն եռյակյում տեղ զբաղեցրած թիմերը) թեժ պայքար կընթանա 4 ակումբների միջև՝ «Լոկոմոտիվի», «Կրասնոդարի», «Ռոստովի» և ԲԿՄԱ-ի։
Հետաքրքիր կլինի հետևել «Լոկոմոտիվին»։ Մոսկովյան ակումբի լեգենդար մարզիչ Յուրի Սյոմինը լքել է իր զբաղեցրած պաշտոնը, իսկ նրան կփոխարինի սերբ մասնագետ Մարկո Նիկոլիչը և հետաքրքիր է՝ ինչպիսի՞ն կլինի «երկաթուղայինների» նոր խաղային ձեռագիրը և ինչպե՞ս կազդի մարզչական փոփոխությունը թիմի արդյունքների վրա։
Եթե «Զենիթը» նվաճի նաև Ռուսաստանի գավաթը, ապա համառ պայքար է ակնկալվում նաև Եվրոպայի Լիգայի ուղեգիր տվող 6-րդ հորիզոնականի համար, որին տեսականորեն կարող են հավակնել գրեթե բոլոր թիմերը, քանի որ մրցաշարային աղյուսակի երկրորդ հատվածում թիմերի դասավորվածությունը բավականին խիտ է։ Նույնը կարելի է ասել նաև առաջնությունը լքելու հավանակնության մասին։ Մրցաշարային աղյուսակի երկրորդ հատվածի ցանկացած թիմ առաջնության արդյունքներով կարող է հայտնվել թե՛ եվրագավաթային գոտում, թե՛ աղյուսակի վերջնամասում։
Առաջնության ռմբարկուների ցուցակը գլխավորում է «Զենիթի» առաջատար Արտյոմ Ձյուբան, ում հաշվին 13 գոլ է։ Նրան հաջորդում են «Ռոստովի» ուզբեկ հարձակվող Էլդոր Շոմուրոդովը (11 գոլ), Ձյուբայի խաղընկեր Սերդար Ազմունը (10 գոլ) և «Սպարտակի» նորեկ Ալեքսանդր Սոբոլևը (10 գոլ)։ Առաջնությունում գոլային փոխանցումների քանակով լավագույնը կրկին Ձյուբան է (9):
Այսօր նախատեսված մյուս խաղում կհանդիպեն առաջնության հետնապահները․ «Կռիլյա Սովետովը» սեփական հարկի տակ կընդունի «Ախմատին»։ Վաղը՝ հունիսի 20-ին, Երևանի ծամանակով 15։00-ին Վարազդատ Հարոյանի «Ուրալը» կընդունի «Ռուբինին»։ Իսկ ահա երեկոյան՝ 20։00-ին տեղի կունենա տուրի կենտրոնական հանդիպումը՝ ԲԿՄԱ- «Զենիթ»
Տուրի մյուս հանդիպումները․
Հունիսի 20
«Արսենալ»- «Սպարտակ» 17։30
Հունիսի 21
«Ուֆա»- «Տամբով» 16։00
«Լոկոմոտիվ»- «Օրենբուրգ» 18։30
«Կրասնոդար»- «Դինամո» 21։00
Վար Բաբայան
