«Մանչեսթեր Յունայթեդի» նախկին ավագ Պատրիս Էվրան պատմել է, որ իրեն սպառնացել են սպանել «Լիվերպուլի» նախկին հարձակվող Լուիս Սուարեսի հետ ունեցած կոնֆլիկտից հետո: Էվրան Սուարեսին մեղադրել էր ռասիզմ դրսևորելու մեջ և հրաժարվել էր սեղմել ուրուգվայցու ձեռքը.
«Մանչեսթեր Յունայթեդը» բազում սպառնալի նամակներ էր ստանում: Ինձ գրում էին. «Մենք հիմա բանտում ենք, երբ դուրս գանք, կսպանենք քեզ ու քո ընտանիքին»: Երկու ամիս շարունակ այդպիսի նամակներ էի ստանում: Ամենուր անվտանգության աշխատակիցներ ունեի, ամեն տեղ գնում էի թիկնապահների ուղեկցությամբ: Նրանք գիշերը իմ տան մոտ էին լինում: Բարդ ժամանակներ էին, բայց ես չէի վախենում:
Իմ ընտանիքը վախեցած էր՝ կինս, եղբայրս, բայց ոչ ես: Ես չէի կարողանում հասկանալ, թե ինչու էին մարդիկ ինձ ատում: Նրանք չգիտեին ճշմարտությունը»,- ասել է Էվրան ու շարունակել.
«Սուարեսն ինձ իսպաներենով ասաց. «Ինձ ձեռք մի տուր, ես նեգրների հետ չեմ խոսում»: Գուցե նա չգիտեր, որ ես խոսում էի իսպաներեն: Այն ժամանակ ես հարցրի՝ նա ինչ էր ասում: Նա պատասխանեց. «Այո, ամեն ինչ ճիշտ է: Ես չեմ խոսում ներգրերի հետ»: Մոտեցավ մրցավարը, նա հարցրեց, թե ինչ է տեղի ունենում: Ես նրան ասացի ռասայական վիրավորանքների մասին, նա խոստացավ խաղից հետո պարզաբանել իրավիճակը:
Երբ մենք փորձում էինք պարզաբանել, Սուարեսը ստեց: Նա ասաց, որ negro բառը նշանակում է «ընկեր»: Ես ասացի. «Իմ անունն այդպես չէ, ծնողներս ինձ անուն են տվել, ոչ թե ինչ-որ գույն»: Վերջիվերջո, նա ամեն ինչ խոստովանեց, նրան 8 խաղով որակազրկեցինք և մեծ տուգանք նշանակեցին:
Հիշում եմ, որ նրան հետո աջակցեցին «Լիվերպուլի» երկրպագուներն ու ֆուտբոլիստները: Սուարեսին տուգանել էին ռասիստական վիրավորանքի համար, բայց նրանք աջակցում էին նրան: Ես հիասթափված էի»,- Էվրայի խոսքերն է փոխանցում Daily Mail-ը:
