Անգլիայի ազգային հավաքականի գլխավոր մարզիչ Թոմաս Տուխելը մեկնաբանել է Ազգերի լիգայի 2026/27թթ․ խաղարկության մեկնարկային տուրում Իսպանիայից կրած տնային պարտությունը (2:3)։ Այս խաղում անգլիացիները ոչ միայն ցավալի պարտություն կրեցին, այլև 21-րդ դարում առաջին անգամ պաշտպանական հակառեկորդ սահմանեցին:
Խոսելով բուն հանդիպման մասին՝ գերմանացի մասնագետը չի թաքցրել դժգոհությունը թիմի գործողություններից.
«Իսպանիայի պես թիմի դեմ, որը սիրում է վերահսկել խաղը, մենք շատ անհաջող մեկնարկ ունեցանք: Դա մի փոքր խարխլեց մեր վստահությունը, ինչը, սակայն, նորմալ է: Մենք ևս երկու կոպիտ սխալ թույլ տվեցինք և երկու հիանալի պահ բաց թողեցինք: Բայց հետո կարողացանք հավաքվել և աստիճանաբար մտնել խաղի մեջ: Խաղում էինք շատ համարձակ՝ առանց գնդակը կորցնելու, ավելի ու ավելի լավ էինք գործում և պահեր ստեղծում: Տարբերությունն այն էր, որ նրանք ավելի սառնասիրտ ու վստահ էին գործում դաշտի վերջին երրորդում:
Ցավոք, հերթական տեխնիկական սխալը մեզ համար շատ թանկ արժեցավ. մենք գոլ բաց թողեցինք խաղային իրավիճակից, թեև միանշանակ պետք է շատ ավելի լավ պաշտպանվեինք: Չեմ հասկանում, թե ինչու ենք այդքան շատ սխալներ թույլ տալիս: Իհարկե, մենք խաղում ենք լավագույնների դեմ, բայց դա չափազանց հաճախ է տեղի ունենում, իսկ բարձր մակարդակում մեզ անմիջապես պատժում են»,- Տուխելի խոսքերն է մեջբերում Sky Sports-ը:
Խաղի բեկումնային պահերից մեկը ավագ Հարի Քեյնի չիրացրած 11-մետրանոցն էր 54-րդ րոպեին, երբ հաշիվը 2:1 էր՝ հօգուտ Անգլիայի։ AS-ի փոխանցմամբ՝ Տուխելը հատուկ ընդգծել է այդ դրվագի կարևորությունը.
«Ցավոք, Հարին չկարողացավ իրացնել հարվածը, իսկ դա կարող էր վճռորոշ լինել: Գուցե իսպանացիներն առաջին անգամ հավատային, որ իրենց երկարատև անպարտելի շարքը մոտ է ավարտին: Բայց գնդակը հայտնվեց դարպասից դուրս… Թիմը որակյալ և անձնուրաց խաղ ցուցադրեց, կային շատ լավ դրվագներ, սակայն վերջնական արդյունքը դա չի արտացոլում»:
Գլխավոր մարզիչն անդրադարձել է նաև մեկնարկային կազմում անակնկալ որոշմանը. հիմնական դարպասապահ Ջորդան Փիքֆորդի փոխարեն խաղում էր Ջեյմս Թրաֆորդը։
«Ես դարպասապահների գծով մասնագետ չեմ և չեմ կարող վերլուծել նրանց խաղը: Բայց Թրաֆորդը վաստակել է երկու խաղում դաշտ դուրս գալու իրավունքը: Նա լավ է սկսել մրցաշրջանը Պրեմիեր լիգայում և հանդիսանում է «Լիդսի» հիմնական դարպասապահը: Փիքֆորդի նկատմամբ ոչ մի բողոք չկա: Մենք պարզապես ցանկանում ենք այս մրցաշարն օգտագործել՝ գնահատելու Ջեյմսի ներկայիս մակարդակը։ Նա կանցկացնի նաև Չեխիայի դեմ երկրորդ տուրի հանդիպումը, որպեսզի ավելի լավ հասկանա կազմակերպվածությունն ու փորձ ձեռք բերի»,- պարզաբանել է Տուխելը:
Ինչպես հաղորդում է BBC-ն, այս պարտությամբ Անգլիայի հավաքականը հասել է անցանկալի հակառեկորդի. թիմը երկրորդ խաղում անընդմեջ 3 և ավելի գնդակ է բաց թողնում, ինչը 21-րդ դարում տեղի է ունենում առաջին անգամ․ նախորդ անգամ նման բան գրանցվել էր 1995 թվականի հունիսին: Հիշեցնենք, որ նախորդ հանդիպումում անգլիացիները ԱԱ-2026-ի երրորդ տեղի համար գոլառատ խաղում 6:4 հաշվով հաղթել էին Ֆրանսիային։
Վիճակագրությունը փաստում է, որ Տուխելի թիմի պաշտպանությունում լուրջ ճեղքվածքներ են առաջացել. վերջին 6 խաղերում բոլոր մրցաշարերում «Երեք առյուծները» բաց են թողել 13 գոլ, ինչը գրեթե կրկնակի գերազանցում է գերմանացու գլխավորությամբ անցկացրած առաջին 17 խաղերի ցուցանիշը (ընդամենը 7 բաց թողած գոլ):
Բացի այդ, թիմը պարտվեց այն դեպքում, երբ հաղթում էր առաջին խաղակեսից հետո: Նման բան վերջին անգամ գրանցվել էր 2019-ի հունիսին՝ կրկին Ազգերի լիգայում Նիդերլանդների դեմ խաղում: Այդ ժամանակից ի վեր, Անգլիան հաղթել էր 42 խաղերից 41-ում, որոնցում ընդմիջման էր գնացել առաջատարի կարգավիճակով (ևս մեկ հանդիպում ավարտվել էր ոչ-ոքի):
