Անգլիայի հավաքականի և «Մանչեսթեր Յունայթեդի» լեգենդար հարձակվող Ուեյն Ռունին Disney+-ի նոր վավերագրական ֆիլմաշարում անսպասելի բացահայտում է արել իր ծագման վերաբերյալ։
«The Real Rooneys» (Իրական Ռունիները) 10-սերիանոց նախագծի չորրորդ դրվագում, որը պատմում է Ռունիի, նրա կնոջ՝ Քոլինի և նրանց չորս երեխաների մասին, 40-ամյա նախկին ֆուտբոլիստը նշում է, որ վերջերս իմացել է մայրցամաքային Եվրոպայում իր ունեցած արմատների մասին։
«Վերջերս պարզեցի, որ մայրիկիս մոր, այսինքն՝ տատիկիս ընտանիքը լեհ հրեաներ են եղել»,- ասում է Ռունին։ Ֆիլմի պրոդյուսերներից մեկը կադրից դուրս նկատում է, որ հուդայականության մեջ ավանդույթի համաձայն՝ կրոնն ու ազգությունը փոխանցվում են մայրական գծով, ուստի «տեխնիկապես Ռունին նույնպես հրեա է»։
«Ես կաթոլիկ եմ,- արձագանքում է Ռունին,- բայց միշտ հարցեր էի տալիս ինքս ինձ՝ ինչո՞ւ մենք հրեա չենք»։
Երբ Ուեյնն այս թեման քննարկում է մոր՝ Ջանեթի հետ, վերջինս բացատրում է, որ նրա նախատատը Լեհաստանից փախել էր Լիվերպուլ։ Ենթադրվում է, որ նրա ազգանունը Գրինբերգ է եղել։ Սա առաջին անգամն էր, որ Ռունին լսում էր այս պատմությունը։
Կատակելով այն մասին, թե արդյոք այս բացահայտումը կարող է հիմք դառնալ նոր սփին-օֆֆ շոուի համար, Ռունին ժպտալով առաջարկում է. «Հրեա Ռո՞ւն»:
Ֆիլմում Ռունիների ընտանիքը՝ Ուեյնը, Քոլինը և նրանց որդիներից երկուսը՝ 10-ամյա Քիթն ու 8-ամյա Քասը, այցելում են Լեհաստան՝ Կրակով և Օսվենցիմի համակենտրոնացման ճամբար, քանի որ Քիթը դպրոցում ուսումնասիրում է Երկրորդ համաշխարհային պատերազմի պատմությունը։
Քոլինը նշում է, որ Ուեյնը միշտ հետաքրքրված է եղել պատմությամբ և մեծ սեր ունի տարբեր երկրների, մշակույթների ու արժեքների ուսումնասիրության հանդեպ:
Ինքը՝ Ռունին, Օսվենցիմում եղել էր նաև 2012 թվականին՝ Անգլիայի հավաքականի կազմում Եվրոպայի առաջնության ժամանակ:
«Որպես ծնող՝ շատ ծանր է տեսնել այն, ինչ տեղի է ունեցել այստեղ։ Տեսնում ես երեխաների հագուստներն ու կոշիկները… սա իսկապես շատ տխուր է։ Դա պետք է տեսնել սեփական աչքերով»,- այն ժամանակ ասել էր Ուեյնը։
Վավերագրական ֆիլմաշարի իրադարձությունները սկսվում են 2024 թվականի դեկտեմբերից անմիջապես հետո, երբ Ռունին հեռացվեց «Պլիմուտի» գլխավոր մարզչի պաշտոնից՝ 24 խաղում ընդամենը 5 հաղթանակ տոնելուց հետո։ Սրան նախորդել էին նույնքան անհաջող փորձերը «Բիրմինգհեմում», «Դի Սի Յունայթեդում» և «Դերբի Քաունթիում»։
Ռունին չի թաքցնում, որ դժվար թե վերադառնա մարզչական աշխատանքին.
«Մեծ է հավանականությունը, որ ես այլևս երբեք չեմ մարզի։ Սա երևի առաջին անգամն է, որ ես ֆուտբոլում ներգրավված չեմ լինելու։ Ես հեռանում եմ մի բանից, որն ամբողջ կյանքումս սիրել եմ»։
Նշենք, որ եթե Ռունին պաշտոնապես համարվի հրեա, ապա կարող է հավակնել Պրեմիեր լիգայի պատմության մեջ առաջին անգլիացի հրեա ֆուտբոլիստի կարգավիճակին։ Մինչ այս համարվում էր, որ այդ կոչումը պատկանում է Նիք Բլեքմենին (նորամուտը՝ 2009թ.), մինչդեռ Ռունին իր նորամուտը նշել է 7 տարի ավելի վաղ՝ 2002-ին:
