39-ամյա լեգենդար հարձակվող Լիոնել Մեսսիի՝ Արգենտինայի ազգային հավաքականում կարիերան ավարտելուց հետո հայտնի է դարձել, թե ով է կրելու նրա խորհրդանշական 10 համարի մարզաշապիկը։ Ազգային թիմի գլխավոր մարզիչ Լիոնել Սկալոնին ծրագրում է այն վստահել իտալական «Կոմոյի» 21-ամյա կիսապաշտպան Նիկո Պասին։
Ինչպես հաղորդում է ESPN Argentina-ի լրագրող և ինսայդեր Ֆեդերիկո Բուենոն, երիտասարդ կիսապաշտպանն այս հարցում շրջանցել է ազգային թիմի ավելի աստղային ֆուտբոլիստների։ Նշվում է, որ խորհրդանշական մարզաշապիկը փոխանցելու որոշումն ուղղակիորեն կապված է մարզչական շտաբի ապագայի հետ․ սպասվում է, որ առաջիկա ամիսներին կողմերը կքննարկեն Սկալոնիի պայմանագիրը մինչև 2030 թվականը երկարաձգելու հարցը։
Ազգային հավաքականում Պասը նախկինում հանդես է եկել 18 համարի ներքո։ Նա թիմի կազմում ընդհանուր առմամբ անցկացրել է 11 հանդիպում՝ դառնալով մեկ գոլի և մեկ արդյունավետ փոխանցման հեղինակ։ Նախորդ աշխարհի առաջնությունում, որտեղ արգենտինացիները նվաճեցին արծաթե մեդալներ, 21-ամյա ֆուտբոլիստը մասնակցեց խմբային փուլի երկու խաղի, սակայն արդյունավետ գործողություններով աչքի չընկավ։
Ակումբային մակարդակում արգենտինացին արդեն ապացուցել է իր բարձր կարգը. անցած մրցաշրջանում նա հենց 10 համարի մարզաշապիկով հանդես եկավ «Կոմոյի» կազմում՝ դառնալով 13 գոլի և 7 գոլային փոխանցման հեղինակ, ինչով մեծապես օգնեց իտալական ակումբին դուրս գալ Չեմպիոնների լիգա։
Հիշեցնենք, որ Լիոնել Մեսսին Արգենտինայի հավաքականի 10 համարի մարզաշապիկը կրել է 17 տարի շարունակ։ Նա այն առաջին անգամ հագել է 2009 թվականի մարտին, երբ ազգային թիմը գլխավորում էր Դիեգո Մարադոնան։
