Հայաստանի ազգային հավաքականի և իսպանական «Տեներիֆեի» հարձակվող Հրանտ-Լեոն Ռանոսը շարունակում է ապաքինվել վնասվածքից։
Ֆուտբոլիստը մեկնել է Մադրիդ, որտեղ նրա վերականգնողական գործընթացով զբաղվում է անձամբ Հայաստանի հավաքականի ֆիզիոթերապևտ Պաբլո Լյանեսը։
Ինչպես հայտնի էր դարձել ավելի վաղ, 23-ամյա հարձակվողի պաշտոնական նորամուտը նոր ակումբի կազմում հետաձգվել էր իսպանական Սեգունդայի մեկնարկային տուրերում։ Մկանային խնդիրների և կոճի հետ կապված անհանգստությունների պատճառով հայ ֆուտբոլիստը ստիպված էր բաց թողնել երկրորդ տուրի՝ «Ալմերիայի» դեմ կայացած հանդիպումը, որն ավարտվել էր 1-0 հաշվով: Քանի որ ակումբի բժշկական անձնակազմը որոշել էր ռիսկի չդիմել, Ռանոսը ժամանակավորապես դադարեցրել էր մարզումները լիարժեք ապաքինվելու համար: Այժմ Մադրիդում Լյանեսի հսկողությամբ տարվող հատուկ թերապիան նպատակ ունի հնարավորինս արագ և անվտանգ շարք վերադարձնել խաղացողին։
Հիշեցնենք, որ Հրանտ-Լեոն Ռանոսն իսպանական «Տեներիֆեին» միացել է ընթացիկ ամառային տրանսֆերային պատուհանի ընթացքում, սակայն մինչ օրս որևէ պաշտոնական խաղի չի մասնակցել նոր թիմի կազմում։
Հարձակվողի շուտափույթ ապաքինումը կարևոր նշանակություն ունի նաև Հայաստանի ազգային հավաքականի համար: Ազգերի լիգայի 2026/27 մրցաշրջանի C լիգայի 2-րդ խմբում մեր ընտրանին առաջիկա սեպտեմբերին երկու տնային հանդիպում ունի անցկացնելու. սեպտեմբերի 25-ին՝ ժամը 20:00-ին, թիմը կընդունի Լատվիային, իսկ սեպտեմբերի 28-ին՝ նույն ժամին, կմրցի Չեռնոգորիայի ընտրանու հետ։
