🎥 Միջմայրցամաքային գավաթ․ Սպերցյանի հերթական ասիստը և Ալ-Ահլիի հաղթանակը

Հայաստանի ազգային հավաքականի և Սաուդյան Արաբիան ներկայացնող «Ալ-Ահլիի» կիսապաշտպան Էդուարդ Սպերցյանը հերթական արդյունավետ գործողությունն է գրանցել իր նոր ակումբի կազմում։

ՖԻՖԱ-ի Միջմայրցամաքային գավաթի խաղարկության առաջին փուլում «Ալ-Ահլին» մրցել է Նոր Զելանդիան ներկայացնող «Օքլենդի» հետ։ Հանդիպման 63-րդ րոպեին 26-ամյա Սպերցյանի կատարած հիանալի փոխանցումից հետո Սալեհ Աբու Ալ-Շամաթը բացել է խաղի հաշիվը։ Այս գոլը միակն էր հանդիպման ընթացքում, և ջիդդայական ակումբը 1:0 հաշվով պարտության է մատնել Օվկիանիայի ուժեղագույն թիմին։

Նշենք, որ «Կրասնոդարի» նախկին ավագն արդյունավետ գործողությամբ է աչքի ընկել «Ալ-Ահլիի» կազմում անցկացրած բոլոր 4 հանդիպումներում։ Նրա ակտիվում կա արդեն 2 գոլ և 3 գոլային փոխանցում։

Ջիդդան ներկայացնող թիմը Միջմայրցամաքային գավաթին մասնակցում է որպես Ասիայի Չեմպիոնների լիգայի Էլիտայի հաղթող։ Մրցաշարի երկրորդ փուլում Սպերցյանի թիմը սեպտեմբերի 19-ին ՀԱՀ-ում կմրցի աֆրիկյան ուժեղագույն ակումբի՝ «Մամելոդի Սանդաունզի» հետ։

Հավելենք նաև, որ ՈւԵՖԱ-ի Չեմպիոնների լիգայի գործող գավաթակիր ՊՍԺ-ն ավտոմատ կերպով արդեն ապահովել է իր տեղը այս մրցաշարի եզրափակիչում։

🇦🇲
Eduard Spertsyan 🇦🇲 qui récupère le ballon, traverse le terrain et réalise ENCORE une passe décisive 🅰️ avec Al Ahli 🇸🇦 contre Auckland FC 🇳🇿 en Intercontinental Cup 🏆 ! #Spertsyan pic.twitter.com/xFur60VfhQ

— Arménie Football (@ArmenieFootball) August 26, 2026