Իտալական «Լացիոյի» պաշտպան Ռոմանո Ֆլորիանի Մուսոլինին իր նորամուտն է նշել հռոմեական ակումբի գլխավոր թիմի կազմում՝ մասնակցելով Ա սերիայի մեկնարկային տուրի՝ «Բոլոնիայի» դեմ արտագնա խաղին (1:0):
23-ամյա ֆուտբոլիստը փոխարինման է դուրս եկել հանդիպման 19-րդ րոպեին՝ փոխարինելով վնասվածք ստացած Ադամ Մարուշիչին, իսկ 22-րդ րոպեին հասցրել է դեղին քարտ ստանալ։
Այս նորամուտը հատկանշական է իր պատմական զուգադիպությամբ։ Ռոմանո Ֆլորիանին Իտալիայի նախկին վարչապետ, ֆաշիստական ռեժիմի առաջնորդ Բենիտո Մուսոլինիի ծոռն է։ Ուշագրավ է, որ երիտասարդ պաշտպանն իր առաջին հանդիպումն անցկացրել է «Բոլոնիայի» տնային արենայում՝ «Ռենատո Դալ Արա» մարզադաշտում, որը գրեթե 100 տարի առաջ՝ 1926 թվականի հոկտեմբերին, անձամբ բացել էր նրա նախապապը։ Ավելին, մինչև Մուսոլինիի ռեժիմի անկումն այս մարզադաշտում տեղադրված է եղել դիկտատորի՝ ձի հեծած արձանը։
Ռոմանո Ֆլորիանին Մաուրո Ֆլորիանիի և Ալեսանդրա Մուսոլինիի (Բենիտո Մուսոլինիի թոռնուհին) որդին է։ Բենիտո Մուսոլինին ժամանակին ակտիվորեն հետաքրքրվում էր ֆուտբոլով և երկրպագում էր հենց «Լացիոյին», ուստի Ռոմանոյի ելույթներն այս ակումբում յուրովի ընտանեկան ավանդույթի շարունակություն են։
Պաշտպանը հռոմեական ակումբի սան է։ Թեև նա գլխավոր թիմի մարզումներին սկսել է ներգրավվել դեռ 2021 թվականից, սակայն 2023-ից վարձավճարով հանդես էր գալիս իտալական այլ ակումբներում՝ «Պեսկարայում» և «Կրեմոնեզեում», որպեսզի խաղային պրակտիկա ձեռք բերի։ «Լացիոյի» հետ նրա գործող պայմանագիրը նախատեսված է մինչև 2028 թվականի հունիսը։
